ବ୍ରହ୍ମପୁର, ୨୯/୦୩: ଭାରତୀୟ ଖାଦ୍ୟ ସୁରକ୍ଷା ଓ ମାନକ ପ୍ରାଧିକରଣ (ଏଫ୍ଏସ୍ଏସ୍ଏଆଇ) ପକ୍ଷରୁ ବ୍ରହ୍ମପୁର ମଣ୍ଡଳ କାରାଗାରକୁ "ଇଟ୍ ରାଇଟ୍ କ୍ୟାମ୍ପସ୍' ମାନ୍ୟତା ମିଳିଛି । ଦେଶରେ ଏଫ୍ଏସ୍ଏସ୍ଏଆଇ ପକ୍ଷରୁ ଶହେଟି ଜେଲ୍କୁ ଏହି ମାନ୍ୟତା ଦିଆଯାଇଥିବା ବେଳେ ଓଡ଼ିଶାର ପ୍ରଥମ କାରାଗାର ଭାବେ ବ୍ରହ୍ମପୁର ଜେଲ୍ ସାମିଲ ହୋଇଛି । ୧୬୨ ବର୍ଷ ପୁରୁଣା ବ୍ରହ୍ମପୁର ଜେଲ୍କୁ ତିନି ତାରକା ରେଟିଂ ସହିତ ୨୪ ମାର୍ଚ୍ଚ ୨୦୨୫ରୁ ୨୩ ମାର୍ଚ୍ଚ ୨୦୨୭ ପର୍ଯ୍ୟନ୍ତ ଦୁଇ ବର୍ଷ ପାଇଁ ବୈଧ ଏହି ମାନ୍ୟତା ମିଳିଛି ।
ଜେଲ୍ ସିନିୟର ସୁପରିଣ୍ଟେଣ୍ଡେଣ୍ଟ୍ ଧୀରେନ୍ଦ୍ରନାଥ ବାରିକ କହିଛନ୍ତି- ଜେଲ କର୍ତ୍ତୃପକ୍ଷ, କଏଦୀ, କର୍ମଚାରୀ ସମସ୍ତଙ୍କ ପ୍ରଚେଷ୍ଟାରେ ରାଜ୍ୟର ପ୍ରଥମ ଜେଲ୍ ଭାବେ ଏହି ମାନ୍ୟତା ମିଳିଛି । ବ୍ରହ୍ମପୁର କାରାଗାରରେ ପ୍ରତିଦିନ ଏଫ୍ଏସ୍ଏସ୍ଏଆଇର କଠୋର ସୁରକ୍ଷା ନିୟମକୁ ଅନୁସରଣ କରି ଦୈନିକ ହଜାରେ କଏଦୀଙ୍କ ପାଇଁ ଖାଦ୍ୟ ପ୍ରସ୍ତୁତି ଏବଂ ପରିବେଷଣ ସହ ସ୍ୱଚ୍ଛତାକୁ ଗୁରୁତ୍ୱ ଦେଉଛନ୍ତି ଜେଲ କର୍ତ୍ତୃପକ୍ଷ । ଖାଦ୍ୟ ସୁରକ୍ଷା ଦିଗରେ ପ୍ରତିବଦ୍ଧତା ସ୍ୱରୂପ ୫୦ ଜଣ ଜେଲ୍ କର୍ମଚାରୀ ଓ କଏଦୀ ସଫଳତାର ସହ ଏଫ୍ଏସ୍ଏସ୍ଏଆଇର ତାଲିମ ଏବଂ ପ୍ରମାଣପତ୍ର (ଏଫ୍ଓଏସ୍ଟିଏସି) କାର୍ଯ୍ୟକ୍ରମ ସାରିଛନ୍ତି । ଏହା ସେମାନଙ୍କୁ ମୌଳିକ କ୍ୟାଟରିଂ ବା ଖାଦ୍ୟ ପ୍ରସ୍ତୁତି ଓ ବିତରଣ ଅଭ୍ୟାସରେ ଅତ୍ୟାବଶ୍ୟକ ଜ୍ଞାନ ଏବଂ ଦକ୍ଷତା ପ୍ରଦାନ କରିଛି । "ଇଟ୍ ରାଇଟ୍ କ୍ୟାମ୍ପସ୍' ପଦକ୍ଷେପର ଉଦ୍ଦେଶ୍ୟ କାର୍ଯ୍ୟସ୍ଥଳୀ, ଶିକ୍ଷାନୁଷ୍ଠାନ ଏବଂ ଡାକ୍ତରଖାନା ସମେତ ବିଭିନ୍ନ ଆନୁଷ୍ଠାନିକ ବ୍ୟବସ୍ଥାରେ ଖାଦ୍ୟ ସୁରକ୍ଷା ଏବଂ କଲ୍ୟାଣର ସଂସ୍କୃତିକୁ ପ୍ରୋତ୍ସାହିତ କରିବା ।
ବ୍ରହ୍ମପୁର କାରାଗାର ଏହାର କଠୋର ମୂଲ୍ୟାଙ୍କନ ମାନଦଣ୍ଡ ପାଳନ କରି ଦୃଷ୍ଟାନ୍ତମୂଳକ ପ୍ରଦର୍ଶନ କରିଛି । ଏକ ପାନେଲଭୁକ୍ତ ଏଜେନ୍ସି ଦ୍ୱାରା ପରିଚାଳିତ ବ୍ୟାପକ ଅଡିଟ୍ ମୌଳିକ ସ୍ୱଚ୍ଛତା, ଖାଦ୍ୟ ପ୍ରସ୍ତୁତି ଅଭ୍ୟାସ ଏବଂ ସରକାରଙ୍କ ଦ୍ୱାରା ନିର୍ଦ୍ଧାରିତ ଖାଦ୍ୟ ସାରଣୀ ଅନୁଯାୟୀ ପୁଷ୍ଟିକର ଖାଦ୍ୟର ବ୍ୟବସ୍ଥା ସମେତ ଅତ୍ୟାବଶ୍ୟକ ପରିମାପକ ସହିତ ଜେଲର ଅନୁପାଳନକୁ ମୂଲ୍ୟାଙ୍କନ କରିଥିଲା । ଗତ ଫେବ୍ରୁଆରୀ ମାସରେ ଏଫ୍ଏସ୍ଏସ୍ଏଆଇର ୩ ଜଣିଆ ଟିମ୍ ଆସିଥିଲା । କାରାଗାର ପରିସରରେ ବିଭିନ୍ନ ବ୍ୟବସ୍ଥା ସହ ନିଜସ୍ୱ ମସଲା, ଅଟା ଓ ଅନ୍ୟାନ୍ୟ ଖାଦ୍ୟ ସାମଗ୍ରୀ ପ୍ରସ୍ତୁତି କରାଯାଉଥବା କୋଠରୀ ବୁଲି ଦେଖିଥିଲା ।
