ନୂଆଦିଲ୍ଲୀ,୨୯/୦୫: ଅଲିମ୍ପିକ୍ସ କ୍ରୀଡ଼ା ଆୟୋଜନ ନେଇ ଜର୍ମାନୀ ଆଗ୍ରହ ପ୍ରକାଶ କରି ୨୦୩୬, ୨୦୪୦ କିମ୍ବା ୨୦୪୪ କ୍ରୀଡ଼ା ପାଇଁ ଅଫିସିଆଲ ଭାବେ ଆଇଓସି (ଅନ୍ତର୍ଜାତୀୟ ଅଲିମ୍ପିକ୍ସ କମିଟି) ନିକଟରେ ବିଡ୍ ଦାଖଲ କରିଛି । ବର୍ଲିନ ଆୟୋଜକ ସହର ରହିଛି । ଦେଶର ବିଭିନ୍ନ ରାଜ୍ୟରେ ଯେଉଁ ସବୁ କ୍ରୀଡ଼ା ଭେନ୍ୟୁ ରହିଛି ତାହାର ପୁନରୁଦ୍ଧାର କରି କ୍ରୀଡ଼ା ଆୟୋଜନ କରିବା ନେଇ ଜର୍ମାନୀ ଯୋଜନା ରଖିଛି ।
ସଂସ୍କରଣକୁ ସଂସ୍କରଣ ଅଲିମ୍ପିକ୍ସ କ୍ରୀଡ଼ା ଆୟୋଜନ ବେଶ ବ୍ୟୟବହୁଳ ହେଉଛି । ଏହାକୁ ଦୃଷ୍ଟିରେ ରଖି ବର୍ଲିନ ବିଡ୍ରେ ଉପରୋକ୍ତ ପ୍ରସ୍ତାବ ଦେଇଛି । ଶେଷ ଥର ୧୯୩୬ରେ ବର୍ଲିନରେ ଅଲିମ୍ପିକ୍ସ ଆୟୋଜିତ ହୋଇଥିଲା । ତେଣୁ ୧୦୦ ବର୍ଷ ପୂର୍ତ୍ତିକୁ ଲକ୍ଷ୍ୟରେ ରଖି ଜର୍ମାନୀ କ୍ରୀଡ଼ା ଆୟୋଜନ ନେଇ ଆଗ୍ରହ ପ୍ରକାଶ କରିଛି । ଯଦି ୨୦୩୬ ସଂସ୍କରଣ ଆୟୋଜନ ଅଧିକାର ନମିଳେ, ତେବେ ୨୦୪୦ କିମ୍ବା ୨୦୪୪ କ୍ରୀଡ଼ା ଆୟୋଜନ ନେଇ ଆଗ୍ରହୀ ରହିଛି ।
ପୂର୍ବରୁ ୨୦୨୨ ଶୀତକାଳୀନ କ୍ରୀଡ଼ା ଏବଂ ୨୦୨୪ କ୍ରୀଡ଼ା ଆୟୋଜନ ନେଇ ଜର୍ମାନୀ ବିଡ୍ ଦାଖଲ କରିଥିଲା, କିନ୍ତୁ ଆୟୋଜନ ଅଧିକାର ପାଇବାରେ ବିଫଳ ରହିଥିଲା । ବର୍ଲିନ ସମେତ ଅନ୍ୟ ରାଜ୍ୟ ଗୁଡ଼ିକର ଜନସାଧାରଣ କ୍ରୀଡ଼ା ଆୟୋଜନ ସପକ୍ଷରେ ନାହାନ୍ତି । ଯଦିଓ କିଛି ସମର୍ଥନ କରୁଛନ୍ତି । ଯେଉଁମାନେ ବିରୋଧ କରୁଛନ୍ତି ସେମାନଙ୍କ ଯୁକ୍ତି ଯେ, ଯେଉଁ ଅର୍ଥ ଅଲିମ୍ପିକ୍ସ ଆୟୋଜନ ପାଇଁ ଖର୍ଚ୍ଚ ହେବ ତାହା ଦେଶରେ କ୍ରୀଡ଼ାର ଉନ୍ନତି ପାଇଁ ବ୍ୟବହାର କରାଯାଉ ।
