ଭୁବନେଶ୍ୱର, ୦୧/୦୫ : ସାଧାରଣ ପ୍ରଶାସନ ବିଭାଗଠୁ ଜାଗା ଆଣି ତରବରିଆ ଭାବେ ଘର ତୋଳି ବିକ୍ରି କରିଦେଲେ। ପଛରେ ଜାଣିଲେ ଯେଉଁଠି ଘର ହୋଇଛି, ତାହା ଜଙ୍ଗଲ ଜମି । ବରମୁଣ୍ଡା ହାଉସିଂ ବୋର୍ଡ ପ୍ରଜ୍ଞାବିହାରରେ ବିକ୍ରି ହୋଇଥିବା ଏଚ୍ଆଇଜି ଘରକୁ ନେଇ ଫଶିଛି ବିଡିଏ । ଏବେ ବିଡିଏ କୋରାପୁଟରେ ୫ ଗୁଣା ଜାଗା ବନ ବିଭାଗକୁ ଦେବେ । ବରମୁଣ୍ଡା ହାଉସିଂ ବୋର୍ଡ ଜାଗା ବିକ୍ରିକୁ ନେଇ ବିବାଦ ଦେଖାଦେଇଥିଲା । ଜିଏ- ବିଡିଏ-ଜଙ୍ଗଲ ବିଭାଗ ମଧ୍ୟରେ କଳି ଶେଷରେ ସରକାରଙ୍କ ପାଖରେ ପହଞ୍ଚିଥିଲା । ଏନେଇ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ଏହି ବୈଠକରେ ସବୁ ବିଭାଗୀୟ ଅଧିକାରୀ ଉପସ୍ଥିତ ଥିଲେ ।
ଭୁବନେଶ୍ୱରରେ ବିଡିଏ ପାଖରେ ୧୨.୯୪୪ ଏକର ଜଙ୍ଗଲ ଜମି ରହିଛି । ଏହି ଜମି ବଦଳରେ କୋରାପୁଟର ଏକ ଜାଗା ଚିହ୍ନଟ କରାଯାଇଛି । ଏହି ଜାଗା ରାଜସ୍ୱ ବିଭାଗରୁ ସାଧାରଣ ପ୍ରଶାସନ ଆଣିବ । ଟଙ୍କା ବିଡିଏ ଖର୍ଚ୍ଚ କରିବ । ସେ ଜାଗାକୁ ବନ ବିଭାଗକୁ ହସ୍ତାନ୍ତର କରିବ । ଏହା ପରେ ଜଙ୍ଗଲ ବିଭାଗ ପ୍ରଜ୍ଞା ବିହାର ଜାଗା ବିଡିଏ ନାଁରେ କରିବ । ଏଭଳି ଭାବେ ସମାଧାନର ବାଟ ଫିଟିବ ବୋଲି ବିଡିଏର ଜଣେ ବରିଷ୍ଠ ଅଧିକାରୀ କହିଛନ୍ତି । ବିଡିଏ ପକ୍ଷରୁ ବରମୁଣ୍ଡା ହାଉସିଂ ବୋର୍ଡ କଲୋନୀରେ ୧୯୯୧-୯୨ରେ ଏଚ୍ଆଇଜି ଘର ବିକ୍ରି କରିଥିଲା । ୨୩.୪୮୨ ଏକରରେ ବିଡିଏ ପକ୍ଷକୁ କୋର ହାଉସ ନିର୍ମାଣ କରି ବିକ୍ରି କରାଯାଇଥିଲା । ପ୍ରତି ଘର ବାବଦକୁ ବିଡିଏ ୪.୬୫ ଲକ୍ଷ ଟଙ୍କା ନେଇଥିଲା । କିଛିଦିନ ପରେ କଥା ପଦାରେ ପଡିଥିଲା । ବିଡିଏ ଘର କରି ନିର୍ମାଣ କରିଥିବା ପ୍ରାୟ ୧୨.୯୪୪ ଏକର ଜାଗାରେ ଜଙ୍ଗଲ କିସମ ଜମି ରହିଥିଲା । ଏହାକୁ ନେଇ ବନ ବିଭାଗ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଥିଲା । ଯାହାକୁ ନେଇ ଅକଳରେ ପଡିଥିଲା ବିଡିଏ ।
ବିଡିଏ ପକ୍ଷରୁ ସଫେଇ ଦିଆଯାଇଥିଲା ଯେ ଜାଗା ସାଧାରଣ ପ୍ରଶାସନ ସେମାନଙ୍କୁ ଦେଇଥିଲା । ଏହାପରେ ସେମାନେ ଘର ନିର୍ମାଣ କରି ବିକ୍ରି କରିଥିଲେ । ଅନ୍ୟପକ୍ଷରେ ଏହି ବିବାଦୀୟ ଜମିରେ ବିଡିଏର ଏଚ୍ଆଇଜି ଘର କିଣି ଅକଳରେ ପଡିଥିଲେ ୨୫୮ ପରିବାର । ହାଡ଼ଭଙ୍ଗା ପରିଶ୍ରମ କରି ବିଡିଏକୁ ଟଙ୍କା ଦେଇ ଘର କିଣିଥିଲେ । ହେଲେ ୩୪ ବର୍ଷ ହେଲା ସେମାନେ ମାଲିକାନା ପାଇ ପାରୁନାହାନ୍ତି । ଏପରି କି ଲିଜ୍ ଡିଡ୍ କରି ପାରୁନାହାନ୍ତି । ଏନେଇ ହାଉସିଂ ବୋର୍ଡ କଲୋନୀ ବାସିନ୍ଦା ୨୦୧୫ରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ୨୦୧୯ରେ ହାଇକୋର୍ଟ ବିଡିଏକୁ ଜବାବ ମାଗିବା ସହ ୨ ମାସ ଭିତରେ ଏହାର ସମାଧାନ କରିବାକୁ ନିର୍ଦ୍ଦେଶ ଦେଇଥିେଲେ । ହେଲେ ଏଯାଏ ଏହାର ସମାଧାନ ହୋଇ ପାରିନି । ସେପଟେ ନ୍ୟାୟକୁ ଅପେକ୍ଷା କରି କଲୋନୀର ପ୍ରାୟ ୨୦ ଜଣ ଲୋକ ଆଖି ବୁଜିଲେଣି । ପ୍ରଜ୍ଞାବିହାର ବିକାଶ ପରିଷଦର ସମ୍ପାଦକ ମନ୍ମଥ କୁମାର ଦଳାଇ କହିଛନ୍ତି ଯେ, କେବଳ ଆଲାର୍ଟମେଣ୍ଟ ଲେଟରରେ ଘର ବିକ୍ରି କଲେ । ଆମ ପାଖରେ ମାଲିକାନା ନଥିବାରୁ ଏବେ ଘର ବିକ୍ରି କରିପାରୁନୁ । କି ବ୍ୟାଙ୍କ ଲୋନ୍ ଆଣି ପାରୁନୁ । ବିଡିଏ ସଚିବ ମାନସ ରଞ୍ଜନ ଦତ୍ତ କହିଛନ୍ତି ଯେ, ଏନେଇ ଆମେ ସାଧାରଣ ପ୍ରଶାସନ ବିଭାଗକୁ ଚିଠି ଲେଖୁଛି । ଖୁବ୍ଶୀଘ୍ର ଏହାର ସମାଧାନ କରାଯିବ ।
