ଯାଜପୁର, ୨୩/୧୧ : ବିରଜା ହାଟରେ ପରିବା ବ୍ୟବସାୟୀଙ୍କୁ ଆକ୍ରମଣ ମାମଲା। ଜେଲ ଗଲେ ଯାଜପୁର ପୂର୍ବତନ ପୌରାଧ୍ୟକ୍ଷ ଭବ ପ୍ରସାଦ ଦାସ। ସୂଚନା ଦେଲେ ଭବ ପ୍ରସାଦଙ୍କ ଓକିଲ ପୂର୍ଣ୍ଣଚନ୍ଦ୍ର ଦେଓ। ଭବଙ୍କୁ ଗିରଫ କରିବା ପରେ ଟାଉନ ଥାନା ପୋଲିସ ତାଙ୍କୁ କୋର୍ଟ ଚାଲାଣ କରିଥିଲା। ହେଲେ କୋର୍ଟରେ ବେଲ୍ ଆବେଦନ ପାଇଁ ସେ ମନା କରିଦେଇଥିଲେ। ବିନା ଦୋଷରେ ପୋଲିସ ଅନେକଙ୍କୁ ଗିରଫ କରୁଛି। ତେଣୁ ସେ ଜେଲ୍ ଯିବାକୁ ଇଚ୍ଛା ପ୍ରକାଶ କରୁଛନ୍ତି ବୋଲି କହିଥିଲେ।
ସେପଟେ ଏହି ଘଟଣା ଭିନ୍ନ ମୋଡ଼ ନେଇଛି। ଭବ ପ୍ରସାଦଙ୍କ ନାଁରେ ଅଭିଯୋଗ କରିଥିବା ବ୍ୟବସାୟୀ ମଦନ ନାୟକ ମାମଲା ପ୍ରତ୍ୟାହାର କରିନେଇଛନ୍ତି। ମଦନ ନାୟକ ଟାଉନ ଥାନାରେ ପହଞ୍ଚି ଭବ ପ୍ରସାଦଙ୍କ ନାମରେ ଦେଇଥିବା ଏତଲା ପ୍ରତ୍ୟାହାର କରିଛନ୍ତି। ଆକ୍ରମଣ କରିବା ଏବଂ ଟଙ୍କା ନେବା କଥା ମିଛ, ଭୁଲ୍ରେ ଏଭଳି କରିଦେଇଛି ବୋଲି ବ୍ୟବସାୟୀ ଜଣଙ୍କ କହିଛନ୍ତି।
ପ୍ରକାଶ ଥାଉକି, ବବି ଦାସଙ୍କ ଭାଇ ଭବପ୍ରସାଦ ଦାସ ବିରଜା ହାଟରେ ଜଣେ ବ୍ୟବସାୟୀଙ୍କୁ ଆକ୍ରମଣ କରିବା ସହ ତାଙ୍କ ପରିବା ଫିଙ୍ଗି ଦେଇଥିବା ୨ ଦିନ ତଳେ ଅଭିଯୋଗ ହୋଇଥିଲା। ବ୍ୟବସାୟୀ ମଦନ ନାୟକ ଏନେଇ ଟାଉନ ଥାନାରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ଟାଉନ ଥାନା ପୋଲିସ ଭବପ୍ରସାଦଙ୍କୁ ଶୁକ୍ରବାର ଘରୁ ରାତି ଅଧିଆ ଉଠାଇ ଆଣିଥିଲା। ଆଜି କୋର୍ଟ ଚାଲାଣ କରିଥିଲା।
