କଟକ,୧୨/୦୭: ରୁଷ୍ର ରାଜଧାନୀ ମସ୍କୋଠାରେ ଆୟୋଜିତ ଭାରତ ଉତ୍ସବ-୨୦୨୫ରେ କଟକ ତାରକସିର ଚମକ ଦେଖିବାକୁ ମିଳିଛି। ସାରା ଭାରତରୁ ମନୋନୀତ ଶ୍ରେଷ୍ଠ ୫ଟି ହସ୍ତଶିଳ୍ପ ସାମଗ୍ରୀ ଏଠାରେ ପ୍ରଦର୍ଶିତ ହୋଇଛି । ଏଥିରେ ସ୍ଥାନ ପାଇଛି କଟକର ରୁପା ତାରକସି । ତାରକସିକୁ ସେଠାକୁ ନେଇ ଯାଇଛନ୍ତି କଟକର ପ୍ରସିଦ୍ଧ କାରିଗର ପଙ୍କଜ କୁମାର ସାହୁ । ତାରକସିକୁ ଜିଆଇ ମାନ୍ୟତା ମିଳିବା ପରେ ଏଭଳି ଏକ ବିଶ୍ୱସ୍ତରୀୟ ମଞ୍ଚରେ ଏହି ସାମଗ୍ରୀ ପ୍ରଦର୍ଶିତ ହେବା କଟକ ପାଇଁ ଗୌରବ ଆଣିଛି । ପଙ୍କଜଙ୍କ ଘର କାଫଲାବଜାର ଅଞ୍ଚଳରେ ହୋଇଥିବାବେଳେ ପୂର୍ବରୁ ସେ ବହୁ ଜାତୀୟ ଓ ଅନ୍ତର୍ଜାତୀୟ ହସ୍ତଶିଳ୍ପ ପ୍ରଦର୍ଶନୀରେ ଭାଗ ନେଇସାରିଛନ୍ତି । ଅତୀତରେ ଓଡ଼ିଶାରେ ଅନୁଷ୍ଠିତ ହକି ବିଶ୍ୱକପ୍ରେ ଖେଳାଳି ଓ ଅତିଥିମାନଙ୍କୁ ଦିଆଯାଇଥିବା ତାରକସି ସ୍ମାରକୀ ତିଆରି କରି ଶ୍ରୀ ସାହୁ ବେଶ୍ ଚର୍ଚ୍ଚା ସୃଷ୍ଟି କରିଥିଲେ ।
ମସ୍କୋରେ ଥିବା ଭାରତୀୟ ଦୂତାବାସ ଓ ରୁଷ ସରକାରଙ୍କ ସହଯୋଗରେ ଭାରତ ଉତ୍ସବ-୨୦୨୫ ଆୟୋଜନ ହେଉଛି । ଗତ ୫ତାରିଖରୁ ଆରମ୍ଭ ହୋଇଥିବା ଏହି ଉତ୍ସବ ୧୩ ତାରିଖ ପର୍ଯ୍ୟନ୍ତ ଚାଲିବ । ଭାରତ-ରୁଷ୍ ଦ୍ୱିପାକ୍ଷିକ ସମ୍ପର୍କକୁ ଅଧିକ ମଜଭୁତ୍ କରୁଥିବା ଏହି ଉତ୍ସବକୁ ରୁଷରେ ଥିବା ଭାରତର ରାଷ୍ଟ୍ରଦୂତ ବିନୟ କୁମାର ଏବଂ ମସ୍କୋ ସହର ପର୍ଯ୍ୟଟନ କମିଟିର ଉପାଧ୍ୟକ୍ଷ ବୁଲାଟ ନୁରମୁଖାନୋଭ ମିଳିତ ଭାବରେ ଉଦଘାଟନ କରିଥିଲେ ।
ହସ୍ତଶିଳ୍ପ ପାଇଁ ରପ୍ତାନି ପ୍ରୋତ୍ସାହନ ପରିଷଦ (ଇପିସିଏଚ୍) ଏବଂ ବିକାଶ କମିସନର (ହସ୍ତଶିଳ୍ପ) କାର୍ଯ୍ୟାଳୟ ସହଯୋଗରେ ଭାରତର ସ୍ୱତନ୍ତ୍ର ହସ୍ତଶିଳ୍ପକୁ ପ୍ରତିନିଧିତ୍ୱ କରୁଥିବା ପାଞ୍ଚ ଜଣ ମାଷ୍ଟର କାରିଗର ଏଥିରେ ଅଂଶଗ୍ରହଣ କରିଛନ୍ତି । ଧାତୁ ଶିଳ୍ପ, ମଧୁବନୀ ଚିତ୍ରକଳା, ପଶ୍ମିନା ବୟନ, କାଠ ଖୋଦନ ଏବଂ ରୁପା ତାରକସି ଅଳଙ୍କାରର ଲାଇଭ୍ ପ୍ରଦର୍ଶନ କରାଯାଉଛି । ଯାହା ଦର୍ଶକମାନଙ୍କ ଆଗରେ ଭାରତୀୟ କାରିଗରିର ଉତ୍କର୍ଷ ପ୍ରତିପାଦନ କରୁଛି । ପ୍ରଦର୍ଶନୀକୁ ଆସୁଥିବା ଅଧିକାଂଶ ବ୍ୟକ୍ତି କଟକ ରୁପା ତାରକସି କାର୍ଯ୍ୟକୁ ଦେଖି ବିମୋହିତ ହେଉଛନ୍ତି । ତାରକସିର ସୂକ୍ଷ୍ମ କଳାକୌଶଳକୁ ଲୋକେ ପସନ୍ଦ କରୁଛନ୍ତି । ପଙ୍କଜ କୁମାର ସାହୁ ମଧ୍ୟ ସ୍ୱଦେଶୀ ବେଶରେ ବାନ୍ଧ କୁର୍ତ୍ତା ପିନ୍ଧି ତାରକସି କାରିଗରି ପ୍ରଦର୍ଶନ କରୁଥିବା ଦେଖିବାକୁ ମିଳିଛି।
