ଭୁବନେଶ୍ୱର,୨୨/୦୧ : ଏବେ ଚାଲିଛି ପିକନିକ୍ ଋତୁ। ନିଜ ନିଜ ପରିବାର କିମ୍ଵା ସାଙ୍ଗସାଥୀଙ୍କ ସହ ବଣଭୋଜି କରିବା ପାଇଁ ପିକନିକ୍ ସ୍ପଷ୍ଟକୁ ଯାଉଛନ୍ତି ଲୋକେ। ଭୁବନେଶ୍ଵରରେ କିଏ ଜୟଦେବ ବାଟିକା ଯାଉଛି ତ ଆଉ କେହି ଶିଖର ଚଣ୍ଡୀ। ହେଲେ ଭୁବନେଶ୍ଵରରେ ଏବେ ବଣଭୋଜିର ନୂତନ ସ୍ପଟ୍ ପାଲଟିଛି ଟଙ୍କପାଣି ରୋଡ୍ ସ୍ଥିତ ବାଙ୍କୁଆଳ। କୁଆଖାଇ ନଦୀ କୂଳରେ ଅତ୍ୟନ୍ତ ଶାନ୍ତ, ସୁନ୍ଦର ଓ ମନୋରମ ପରିବେଶ ମଧ୍ୟରେ ରହିଛି ଏହି ସ୍ଥାନଟି। ଏଥିଯୋଗୁ ଛୁଟିଦିନରେ ଜମୁଛି ପର୍ଯ୍ୟଟକଙ୍କ ଭିଡ଼। ବଣଭୋଜି ପାଇଁ ଗ୍ରାମ କମିଟି ମଧ୍ୟ ସହଯୋଗ କରୁଛି।
ପୂର୍ବରୁ ଏହି ସ୍ଥାନରେ ବଣ ଭୋଜି ହେଉନଥିଲା । ହେଲେ କିଛିବର୍ଷ ହେବ ଏହି ନଦୀପଠାରେ ବୋଇତବନ୍ଦାଣ କାର୍ଯ୍ୟକ୍ରମ ଚାଲିଛି । ତେଣୁ ଧୀରେଧୀରେ ଲୋକେ ବାଙ୍କୁଆଳକୁ ଆସିବା ଆରମ୍ଭ କରିଛନ୍ତି । ନଦୀପଠାରେ ଜଙ୍ଗଲ ସହ ଉଚ୍ଚ ଗଛ ରହିଛି । ସେହିପରି ବାବା ବାଲୁଙ୍କେଶ୍ୱର, ମା’ ବାଙ୍କୁଳାଇଙ୍କ ମନ୍ଦିର ଅଛି । କେବଳ ସେତିକିନୁହେଁ, ନଦୀପଠାକୁ ଯିବା ରାସ୍ତାରେ ବାବା ମେଘେଶ୍ୱର, ଟଙ୍କପାଣି ସାଇ ମନ୍ଦିର ପଡ଼ିବ। ଗାଁ ସେପଟେ ହିରାପୁରର ପ୍ରସିଦ୍ଧ ଚଉଷଠି ଯୋଗିନୀ ମନ୍ଦିର ମଧ୍ୟ ଅବସ୍ଥିତ । ସେଥିପାଇଁ ଦୈନନ୍ଦିନ ଭୁବନେଶ୍ୱର ସମେତ ଆଖପାଖ ଗାଁର ଶ୍ରଦ୍ଧାଳୁମାନେ ଏହିସବୁ ମନ୍ଦିର ଓ ପର୍ଯ୍ୟଟନସ୍ଥଳ ସହ ଗାଁର ଏହି ଦୁଇଟି ମନ୍ଦିରକୁ ଆସିଥାନ୍ତି ।
ଏପଟେ ଶୀତଦିନେ ଜଙ୍ଗଲ ପରିବେଶଟି ସୁନ୍ଦର ଦେଖାଯାଉଥିବାରୁ ବାଙ୍କୁଆଳ ଗାଁ କମିଟି ପକ୍ଷରୁ ଏଠାରେ ନିଶୁଳ୍କ ବଣଭୋଜି ସ୍ପଟ୍ କରିବାକୁ ନିଷ୍ପତ୍ତି ନିଆଯାଇଥିଲା । ସେଥିପାଇଁ ଚଳିତବର୍ଷ ଏଠାରେ ବଣଭୋଜି ଆରମ୍ଭ ହୋଇଛି । ଗାଁଲୋକଙ୍କ ସହଯୋଗକ୍ରମେ ନଦୀପଠାରେ ପରିଦର୍ଶକଙ୍କ ବସିବା ପାଇଁ କଂକ୍ରିଟ ଚୌକି, ପାଣିକୁଣ୍ଡ ଓ ଡଷ୍ଟବିନ୍ ରଖାଯାଇଛି । ତେଣୁ ବଣଭୋଜି ପାଇଁ ଏହି ସ୍ଥାନଟି ସୁହାଉଛି । ତେବେ ଗାଁ କମିଟି ତରଫରୁ ଏହି ସ୍ଥାନକୁ ସଫା, ସୁତୁରା ରଖିବାକୁ କୁହାଯାଉଛି । ତେବେ ଆଗକୁ ପର୍ଯ୍ୟଟନ ବିଭାଗ ଏଦିଗରେ ଦୃଷ୍ଟି ଦେଲେ ଏଠାକୁ ଆହୁରି ପରିଦର୍ଶକ ଆସିପାରିବେ ବୋଲି ଗାଁ କମିଟି ପକ୍ଷରୁ କୁହାଯାଇଛି ।
