ନୂଆଦିଲ୍ଲୀ: ଗୁରୁବାର ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ସୁପ୍ରିମକୋର୍ଟରୁ ବଡ ଆଶ୍ବସ୍ତି ମିଳିଛି । କୋର୍ଟ ଇମ୍ରାନ ଖାନଙ୍କୁ ୨୦୨୩ ମେ ୯ ସହ ଜଡିତ ୮ ମାମଲାରେ ଜାମିନ ପ୍ରଦାନ କରିଛନ୍ତି। ଏହାକୁ ନେଇ ସମର୍ଥକଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି । 

ସୂଚନାଥାଉକି, ୯ ମେ ୨୦୨୩ରେ ଇସଲାମାବାଦରେ ଇମ୍ରାନ ଖାନଙ୍କ ଗିରଫଦାରୀ ପରେ ତାଙ୍କ ସମର୍ଥକ ମାନେ ଅନେକ ସହରରେ ହିଂସା ଏବଂ ଭଙ୍ଗାରୁଜା କରିଥିଲେ। ଏହା ପରେ, ଦଙ୍ଗା ପାଇଁ ଖାନ ଏବଂ ତାଙ୍କ ଦଳ ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ)ର ଅନେକ ନେତାଙ୍କ ବିରୋଧରେ ମାମଲା ରୁଜୁ ହୋଇଥିଲା।

ସୁପ୍ରିମକୋର୍ଟର ତିନି ସଦସ୍ୟ ବିଶିଷ୍ଟ ଖଣ୍ଡପୀଠ ମାମଲାର ଶୁଣାଣି କରୁଥିଲେ। ପ୍ରଧାନ ବିଚାରପତି ଆଫ୍ରିଦିଙ୍କ ନେତୃତ୍ୱରେ ବିଚାରପତି ଶଫି ସିଦ୍ଦିକି ଏବଂ ବିଚାରପତି ମିଆଁଗୁଲ ଔରଙ୍ଗଜେବ ସାମିଲଥିଲେ । ଉଭୟ ପକ୍ଷର ଯୁକ୍ତି ଶୁଣିବା ପରେ, କୋର୍ଟ ଇମ୍ରାନ ଖାନଙ୍କୁ ଜାମିନ ପ୍ରଦାନ କରିଛନ୍ତି। ଖାନଙ୍କ ପକ୍ଷରୁ ଓକିଲ ସଲମାନ ସଫଦର ଏବଂ ସରକାରଙ୍କ ପକ୍ଷରୁ ପଞ୍ଜାବର ସ୍ୱତନ୍ତ୍ର ପବ୍ଲିକ ପ୍ରସିକ୍ୟୁଟର ଜୁଲଫିକର ନକଭି ଯୁକ୍ତି ଉପସ୍ଥାପନ କରିଥିଲେ। ଇମ୍ରାନ ଖାନଙ୍କ ଦଳ ପିଟିଆଇ ଏହି ନିଷ୍ପତ୍ତିକୁ ସ୍ୱାଗତ କରିଥିଲା ଏବଂ ସୋସିଆଲ ମିଡିଆ ପ୍ଲାଟଫର୍ମ X ରେ #VictoryForImranKhan ହ୍ୟାସଟ୍ୟାଗ୍ ସହିତ ଖୁସି ପ୍ରକାଶ କରିଥିଲା।

ପିଟିଆଇର ଅନ୍ତର୍ଜାତୀୟ ମୁଖପାତ୍ର ଜୁଲଫିକର ବୁଖାରୀ କହିଛନ୍ତି,"ସୁପ୍ରିମ କୋର୍ଟ ମେ ୯ ମାମଲାରେ ଇମ୍ରାନ ଖାନଙ୍କୁ ଜାମିନ ଦେଇଛନ୍ତି। ଏବେ କେବଳ ଗୋଟିଏ ମାମଲାରେ ଜାମିନ ଆବଶ୍ୟକ,ତାହା ହେଉଛି ଅଲ-କାଦିର ଟ୍ରଷ୍ଟ ମାମଲା, ଯାହା ପରେ ତାଙ୍କୁ ଜେଲରୁ ମୁକ୍ତ କରାଯାଇ ପାରିବ। ତଥାପି, ବୁଖାରୀ ସ୍ପଷ୍ଟ କରିଛନ୍ତି ଯେ ଏହି ଜାମିନ ସତ୍ତ୍ୱେ, ଖାନଙ୍କୁ ଏପର୍ଯ୍ୟନ୍ତ ମୁକ୍ତ କରାଯିବ ନାହିଁ, କାରଣ ସେ ୧୯୦ ମିଲିୟନ ପାଉଣ୍ଡ ଦୁର୍ନୀତି ଅଲ-କାଦିର ଟ୍ରଷ୍ଟ ମାମଲାରେ ସଜା କାଟୁଛନ୍ତି।