କଟକ,୦୩/୦୮: ସୁପ୍ରିମ୍ କୋର୍ଟଙ୍କ ବାରମ୍ବାର ନିର୍ଦ୍ଦେଶ ସତ୍ତେ୍ୱ ଫାଇନାନ୍ସ କମ୍ପାନିଙ୍କ ଜୁଲମ୍ ସରୁନାହିଁ । କିସ୍ତି ଦେଇପାରୁ ନଥିବା ଅଭିଯୋଗରେ ଗାଡ଼ିଗୁଡ଼ିକୁ ରାସ୍ତାରୁ ଜବରଦସ୍ତ ଛଡ଼ାଇ ଅଣାଯାଉଛି । ସେଗୁଡ଼ିକୁ ଟିକସ ଫାଙ୍କି ବିନା କାଗଜପତ୍ରରେ ପୁଣି ବିକ୍ରି କରି ଦିଆଯାଉଛି । ଏଭଳି ଜାଲିଆତି କରି ଗୋଟେ ଫାଇାନାନ୍ସ ସଂସ୍ଥା ପ୍ରାୟ ୫୦ଟି ୬ରୁ ୧୦ ଚକିଆ ଗାଡ଼ି ବିଭିନ୍ନ ଲୋକଙ୍କୁ ବିକ୍ରି କରି ଦେଇଥିବା ଜଣାପଡ଼ିଛି । ଏହି ଗାଡ଼ି କିଣିବା ପରେ ଗାଡ଼ି ମାଲିକମାନେ କଟକ ଆର୍ଟିଓଙ୍କ କାର୍ଯ୍ୟାଳୟ ଆସିବା ପରେ ଏହି ଘୋଟାଲାର ପର୍ଦ୍ଦାଫାସ୍ ହୋଇଛି । ଏଥିରୁ ୫ଟି ଗାଡ଼ି କଟକ ଆର୍ଟିଓଙ୍କ ହାବୁଡ଼ରେ ପଡ଼ିଛି । ୧୩ ଲକ୍ଷ ଟଙ୍କାର ଟିକସ ଫାଙ୍କି ରାସ୍ତାରେ ଚାଲୁଥିବା ଏକ ବସ୍କୁ ଜବତ କରାଯିବା ପରେ ଫାଇନାନ୍ସ କମ୍ପାନିଙ୍କ ଜୁଲମ୍ର ପର୍ଦ୍ଦାଫାସ୍ ହେବାକୁ ଯାଉଛି ।
ଓଡି୦୫-ଏଲ୍-୬୭୮୮ ନମ୍ବରର ଏକ ବସ୍ ଉପରେ ୧୨ ଲକ୍ଷ ୯୭ ହଜାର ୯୦୯ ଟଙ୍କା ଟିକସ୍ (ଜରିମାନାକୁ ମିଶାଇ) ବକେୟା ଗଡ଼ି ଆସୁଥିଲା । କଟକ ଆର୍ଟିଓଙ୍କ ନିକଟରେ ପଞ୍ଜୀକରଣ ହୋଇଥିବା ଏହି ଗାଡ଼ିକୁ ଧରିବା ପାଇଁ ଆର୍ଟିଓଙ୍କ ପକ୍ଷରୁ ଯୋଜନା ଆରମ୍ଭ ହୋଇଥିଲା । ମିଳିଥିବା ସୂଚନା ଆଧାରରେ ଏହି ବସ୍ଟି ନୟାଗଡ଼ର ଏକ ପେଟ୍ରୋଲ୍ ପମ୍ପ୍ରେ ଛିଡ଼ା ହୋଇଥିବା କଟକ ଆର୍ଟିଓଙ୍କୁ ଖବର ମିଳିଥିଲା । କଟକ ଆର୍ଟିଓ ଏନେଇ ନୟାଗଡ଼ ଆର୍ଟିଓଙ୍କୁ ଖବର ଦେଇଥିଲେ । ନୟାଗଡ଼ ଆର୍ଟିଓ ଶନିବାର ଏହି ଗାଡ଼ିକୁ ଉକ୍ତ ପେଟ୍ରୋଲ୍ ପମ୍ପ୍ରେ ଚଢ଼ଉ କରି ଜବତ କରିବା ସହ କଟକ ଆର୍ଟିଓଙ୍କୁ ଅବଗତ କରିଥିଲେ । କିନ୍ତୁ ଏହି ଗାଡ଼ି ଧରାପଡ଼ିବା ପରେ ଫାଇନାନ୍ସ କମ୍ପାନି ଦ୍ୱାରା ଚାଲିଥିବା ବଡ଼ ଜାଲିଆତିର ପର୍ଦ୍ଦାଫାସ୍ ହୋଇଛି ।
କଟକ ଆର୍ଟିଓ ବିରଞ୍ଚି ନାରାୟଣ ଅଧିକାରୀଙ୍କ କହିବା ଅନୁଯାୟୀ, କୌଣସି ଗାଡ଼ି ଯେତେବେଳେ ଫାଇନାନ୍ସ କମ୍ପାନିଙ୍କ ଋଣ ଅର୍ଥ ଶୁଝି ନ ପାରେ ସେତେବେଳେ ଉକ୍ତ ଫାଇନାନ୍ସ ସଂସ୍ଥା ଆଇନ ଅନୁଯାୟୀ ଗାଡ଼ିକୁ ସମ୍ପୃକ୍ତ ଗାଡ଼ି ମାଲିକଙ୍କଠାରୁ ନେଇପାରିବେ । କିନ୍ତୁ ଏକ ନିର୍ଦ୍ଦିଷ୍ଟ ଫାଇନାନ୍ସ ସଂସ୍ଥା ଓଡ଼ିଶାରେ ପ୍ରାୟ ୫୦ଟି ଗାଡ଼ିକୁ ଜବରଦସ୍ତି ବାଟରେ ଅଟକାଇ ଡ୍ରାଇଭର୍ମାନଙ୍କଠାରୁ ଛଡ଼ାଇ ଆଣିଥିବା ଦେଖାଯାଇଛି । ଯେଉଁଗାଡ଼ିଟିକୁ ଜବତ କରାଯାଇଛି ଉକ୍ତ ଗାଡ଼ିରୁ ଏହି ଘଟଣା ସ୍ପଷ୍ଟ ହୋଇଛି । ଏହି ଗାଡ଼ି ଉପରେ ୧୩ ଲକ୍ଷ ଟଙ୍କା ଟିକସ ଗଡ଼ି ଆସୁଥିଲା। ଗାଡ଼ିଟି ପ୍ରଥମେ ଦୀପକ କୁମାର ସାମନ୍ତରାୟଙ୍କ ନାମରେ ଥିଲା । ଶ୍ରୀ ସାମନ୍ତରାୟଙ୍କଠାରୁ ଗାଡ଼ିଟି ସଚିନ୍ କୁମାର ସାହୁ କିଣିଥିଲେ । ସଚିନଙ୍କ ଠାରୁ ଫାଇନାନ୍ସ କମ୍ପାନି ଗାଡ଼ି ଛଡ଼ାଇ ଆଣି ଅନ୍ୟ ଜଣେ ବ୍ୟକ୍ତିଙ୍କୁ ବିକ୍ରି କରି ଦେଇଥିଲା । କିନ୍ତୁ ଗାଡ଼ିଟି ଟିକସ୍ ଫାଙ୍କି ଚଲାଉଥିବାରୁ ଏହାକୁ ଜବତ କରିବାକୁ ପଦକ୍ଷେପ ଆରମ୍ଭ ହୋଇଥିଲା । ଜବତ ପରେ ଗାଡ଼ିର ମାଲିକ ଯେଉଁ ଫାଇନାନ୍ସ କମ୍ପାନିଠାରୁ ଗାଡ଼ିଟି କିଣିଛନ୍ତି ଉକ୍ତ ଫାଇନାନ୍ସ କମ୍ପାନି ଏହି ଟିକସକୁ ନ ଦେଇ ଗାଡ଼ିଟିକୁ ଗାଡ଼ି ମାଲିକଙ୍କୁ ବିକ୍ରି କରି ଦେଇଥିବା ଜଣାପଡ଼ିଛି । ତଦନ୍ତ ପରେ ପ୍ରକୃତ ରହସ୍ୟ ଉନ୍ମୋଚନ ହେବ ବୋଲି ଶ୍ରୀ ଅଧିକାରୀ କହିଛନ୍ତି । ଏହା ପଛରେ ଏକ ର୍ୟାକେଟ୍ କାମ କରୁଥିବା ଶ୍ରୀ ଅଧିକାରୀ ଆଶଙ୍କା ବ୍ୟକ୍ତ କରିଛନ୍ତି ।
ସେ କହିଛନ୍ତି, କୌଣସି ଫାଇନାନ୍ସ କମ୍ପାନି ଯେତେବେଳେ ଗୋଟେ ଗାଡ଼ିକୁ ଜବତ କରେ ଏହାପରେ ଗାଡ଼ିର ଏଫ୍ଆର୍ସି(ଫାଷ୍ଟ୍ ରେଜିଷ୍ଟ୍ରେସନ୍ ସାର୍ଟିଫିକେଟ୍) କରିବା କଥା । ଏଥିପାଇଁ ଗାଡ଼ିର ମାଲିକଙ୍କଠାରୁ ଅନୁମତି ଆଣିବାକୁ ପଡ଼ିବ । କିନ୍ତୁ ଏହି ଗାଡ଼ିର ଏଫ୍ଆର୍ସି ନାହିଁ । ଅର୍ଥାତ ଗାଡ଼ିଟିକୁ ଛଡ଼ାଇ ଅଣାଯାଇଥିବାରୁ ଫାଇନାନ୍ସ କମ୍ପାନି ଏଫ୍ଆର୍ସି କରିବାକୁ ସକ୍ଷମ ହୋଇନାହିଁ । କେବଳ ଏହି ଗୋଟିଏ ଗାଡ଼ି ନୁହେଁ ଏଭଳି ୫୦ ଗାଡ଼ି କଟକ ଆର୍ଟିଓଙ୍କ ପକ୍ଷରୁ ଚିହ୍ନଟ କରାଯାଇଛି । ସବୁଯାକ ଗାଡ଼ି ଗୋଟିଏ ନିର୍ଦ୍ଦିଷ୍ଟ ଫାଇନାନ୍ସ ସଂସ୍ଥାର । ଏଭଳି ଉକ୍ତ ଫାଇନାନ୍ସ ସଂସ୍ଥା ସରକାରଙ୍କ କୋଟି କୋଟି ଟଙ୍କା ଟିକସ୍ ଫାଙ୍କି ଚାଲିଛି । ଖୁବ୍ଶୀଘ୍ର ତଦନ୍ତ ପରେ ଉକ୍ତ ଫାଇନାନ୍ସ ସଂସ୍ଥା ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ ହେବ ।
