ନୂଆଦିଲ୍ଲୀ ୧୬/୧୨: ଧନକୁବେରମାନଙ୍କ ଉପରେ ପୃଥକ ଭାବେ ଟିକସ ଅର୍ଥାତ୍ ‘ବିଲିୟନେୟାର୍ ଟ୍ୟାକ୍ସ’ ଦେଶକୁ ବର୍ବାଦ କରିପାରେ ବୋଲି ଏକ ନୂଆ ଚେତାବନି ଆସିଛି । ମୁଖ୍ୟ ଅର୍ଥନୈତିକ ଉପଦେଷ୍ଟା(ସିଇଏ) ଅନନ୍ତ ନାଗେଶ୍ୱରନ ‘ବିଲିୟନେୟାର ଟ୍ୟାକ୍ସ’ ବିରୋଧରେ ମତ ଦେଇଛନ୍ତି ଏବଂ କହିଛନ୍ତି ଯେ, ଏହା ଦ୍ୱାରା ଦେଶକୁ ବିଭିନ୍ନ ପ୍ରକାର କ୍ଷତି ହୋଇପାରେ । ଏହି ଟିକସ ଲଗାଯିବା ଦ୍ୱାରା ଦେଶରୁ ପୁଞ୍ଜି ବାହାରକୁ ଯାଇପାରେ ଏବଂ ନିବେଶ ବି ପ୍ରଭାବିତ ହୋଇପାରେ ।
ଏକ କାର୍ଯ୍ୟକ୍ରମରେ ଯୋଗ ଦେଇ ସିଇଏ କହିଛନ୍ତି ଯେ, ସାର୍ବଜନୀନ ନୀତିର ପ୍ରଭାବ ଅନେକ ସମୟରେ ବିପରୀତ ହୋଇଥାଏ । ପୁଞ୍ଜି ଉପରେ ଅଧିକ ଟିକସ ଲଗାଯିବା ଦ୍ୱାରା ପୁଞ୍ଜି ବାହାରକୁ ଚାଲିଯିବ । ପୁଞ୍ଜି ବାହାରକୁ ଚାଲିଯିବା ସହଜ କିନ୍ତୁ ତାହାକୁ ଫେରାଇ ଆଣିବା କଷ୍ଟକର ।
ପ୍ରଧାନମନ୍ତ୍ରୀଙ୍କ ଅର୍ଥନୈତିକ ଉପଦେଷ୍ଟା ପରିଷଦ ସଦସ୍ୟ ଶାମିକା ରବି କହିଛନ୍ତି ଯେ, ଆୟକର ବିଭାଗର ଆକଳନ ଅନୁସାରେ, କମ୍ ଟିକସ ଅନୁପାଳନରେ ସୁଧାର ଆଣିଛି । ଭାରତରେ ଅଧିକ ଟିକସ ଦ୍ୱାରା ଅଧିକ ଟିକସ ଚୋରି ହୋଇପାରେ ।
