ଭୁବନେଶ୍ୱର ୦୮/୦୭: ବିଜେପି ନେତା ଜଗନ୍ନାଥ ପ୍ରଧାନଙ୍କ ମାମଲାରେ ସେସନ୍ସ କୋର୍ଟରେ ଖାରବେଳନଗର ଥାନା ପୁଲିସ କେସ୍ ଡାଏରୀ (ସିଡି) ଦାଖଲ କରିଛି । ମାମଲାର ପ୍ରାଥମିକ ତଦନ୍ତ ସମ୍ପର୍କିତ ସମସ୍ତ ତଥ୍ୟ ସହିତ ଏହି ସିଡିରେ ୧୦ରୁ ଅଧିକଙ୍କୁ ସାକ୍ଷୀ ରଖାଯାଇଛି । ଆସନ୍ତା ୯ ତାରିଖରେ ଜାମିନ୍ ଆବେଦନ ଶୁଣାଣି ହେବ । ଅଭିଯୁକ୍ତ ଜଗା ବର୍ତ୍ତମାନ ବିଚରାଧୀନ କଏଦୀ ଭାବେ ଝାରପଡ଼ା ସ୍ୱତନ୍ତ୍ର କାରାଗାରର ୱାର୍ଡ ନଂ ୨୯ରେ ରହୁଛନ୍ତି । ସ୍ଥାନୀୟ ଏସ୍ଡିଜେଏମ୍ ତାଙ୍କ ଜାମିନ୍ ଆବେଦନକୁ ନାମଞ୍ଜୁର କରିବା ପରେ ଜାମିନ୍ ପାଇଁ ସେ ଜିଲ୍ଲା ଦୌରାଜଜ୍ ଅଦାଲତଙ୍କ ଦ୍ୱାରସ୍ଥ ହୋଇଛନ୍ତି ।
ତାଙ୍କ ମାମଲା ଲଢ଼ୁଥିବା ଓକିଲ ତଥା ବରିଷ୍ଠ ଆଇନ୍ଜୀବୀ ଚିତ୍ତରଞ୍ଜନ ଦାଶଙ୍କ କହିବା ମୁତାବକ, ଗତ ଶୁକ୍ରବାର ସେସନ୍ସ କୋର୍ଟରେ ମୁଦଲାଙ୍କ ଜାମିନ୍ ଆବେଦନ କରାଯାଇଥିଲା । ମଙ୍ଗଳବାର ସୁଦ୍ଧା ସିଡି ଦାଖଲ କରିବାକୁ ଖାରବେଳନଗର ଥାନା ଅଧିକାରୀଙ୍କୁ ବିଚାରପତି ନିର୍ଦ୍ଦେଶ ଦେଇଥିଲେ । ଅଦାଲତରେ ନଥି ଉପସ୍ଥାପନ ପରେ ୯ରେ ଜାମିନ୍ ଶୁଣାଣି ହେବ । ସମାନ ମାମଲାରେ ପୁଲିସ ପୂର୍ବରୁ ୨୯ ନଂ ୱାର୍ଡ କର୍ପୋରେଟର ଅପରୂପ ନାରାୟଣ ରାଉତ, ରଶ୍ମି ରଞ୍ଜନ ମହାପାତ୍ର, ଦେବାଶିଷ ପ୍ରଧାନ, ସଚିକାନ୍ତ ସ୍ୱାଇଁ ଓ ସଞ୍ଜୀବ ମିଶ୍ରଙ୍କୁ ଗିରଫ କରିଥିଲା । ଆସନ୍ତା ୧୫ ତାରିଖରେ ଜିଲ୍ଲା ଦୌରାଜଜ୍ ଅଦାଲତରେ ସେମାନଙ୍କ ଜାମିନ୍ ଶୁଣାଣି ହେବ।
