କୋଲକାତା: ଆରଜି କର ମେଡିକାଲ କଲେଜରେ ଜଣେ ଟ୍ରେନି ଡାକ୍ତରଙ୍କୁ ଗଣଦୁଷ୍କର୍ମ ଏବଂ ହତ୍ୟା ମାମଲା ସମସ୍ତଙ୍କୁ ଦୋହଲାଇ ଦେଇଥିଲା। ଏବେ କୋଲକାତାରେ ପୁଣି ଥରେ ଜଣେ ଛାତ୍ରୀଙ୍କ ସହିତ ଗଣଦୁଷ୍କର୍ମ ମାମଲା ସାମ୍ନାକୁ ଆସିଛି । ଦକ୍ଷିଣ କୋଲକାତାର କସବା ଆଇନ କଲେଜର ଜଣେ ଛାତ୍ରୀଙ୍କୁ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଛି । କସବା ପୋଲିସ ଏହି ମାମଲାରେ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଛି। ତେବେ ଏହି ମାମଲା ସାମ୍ନାକୁ ଆସିବା ପରେ ବିଜେପି, ରାଜ୍ୟର ଶାସକ ଦଳ ଟିଏମସିକୁ ଟାର୍ଗେଟ କରୁଛି । ଗଣଦୁଷ୍କର୍ମ ମାମଲାର ତଦନ୍ତ ଦାବି କରି ବିଜେପି କୋଲକାତାରେ ପ୍ରତିବାଦ କରିଛି । ଏହି ସମୟରେ ପୁଲିସ ପ୍ରତିବାଦ କରୁଥିବା ବିଜେପି ରାଜ୍ୟ ସଭାପତି ସୁକାନ୍ତ ମଜୁମଦାରଙ୍କୁ ଅଟକ ରଖିଛି ।
ଜୁନ୍ ୨୫ ସନ୍ଧ୍ୟାରେ ଦକ୍ଷିଣ କୋଲକାତା ଆଇନ କଲେଜରେ ଜଣେ ଛାତ୍ରୀଙ୍କୁ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଥିଲା । ଗଣଦୁଷ୍କର୍ମ ମାମଲାରେ ତଦନ୍ତ ଦାବି କରି ଶନିବାର କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାର ଅନ୍ୟ ବିଜେପି କର୍ମୀଙ୍କ ସହିତ ପ୍ରତିବାଦ କରିଥିଲେ। ଗଣଦୁଷ୍କର୍ମ ମାମଲାରେ ପ୍ରତିବାଦ କରୁଥିବା କେନ୍ଦ୍ରମନ୍ତ୍ରୀ ଏବଂ ପଶ୍ଚିମବଙ୍ଗ ବିଜେପି ସଭାପତି ସୁକାନ୍ତ ମଜୁମଦାରଙ୍କୁ ପୁଲିସ ଅଟକ ରଖିଛି ।
ମଜୁମଦାରଙ୍କୁ ପୁଲିସ ଅଟକ ରଖିବା ପରେ ସେ କହିଛନ୍ତି, ‘ଏହା ହିଁ ପଶ୍ଚିମବଙ୍ଗରେ ଗଣତନ୍ତ୍ରର ଚେହେରା। ମମତା ବାନାର୍ଜୀ ରାଜ୍ୟରେ ଗଣତନ୍ତ୍ରକୁ ନଷ୍ଟ କରିଦେଇଛନ୍ତି । ପୁଲିସ ମୋତେ ଏବଂ ଅନ୍ୟ କର୍ମୀମାନଙ୍କୁ (ବିଜେପିର) ଗିରଫ କରିଛି।’ ସେପଟେ ଏହି ମାମଲାରେ ପୁଲିସ ଏପର୍ଯ୍ୟନ୍ତ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଛି । ପ୍ରଥମେ ପୁଲି ୨ ଜଣ କଲେଜ ଛାତ୍ର ଏବଂ ଜଣେ କଲେଜର ପୂର୍ବତନ ଛାତ୍ରଙ୍କୁ ଗିରଫ କରିଥିଲା ।
ଶନିବାର କଲେଜର ଜଣେ ସୁରକ୍ଷା କର୍ମୀଙ୍କୁ ମଧ୍ୟ ଗିରଫ କରାଯାଇଛି । ଜଣେ ପୁଲିସ ଅଧିକାରୀ କହିଛନ୍ତି, ‘ଆଜି ସକାଳେ ସୁରକ୍ଷା କର୍ମୀଙ୍କ ଉତ୍ତର ଅସ୍ପଷ୍ଟ ଥିବାରୁ ଆମେ ତାଙ୍କୁ ଗିରଫ କରିଛୁ । କଲେଜରେ ତାଙ୍କର ଉପସ୍ଥିତି ସିସିଟିଭି ଫୁଟେଜରୁ ଜଣାପଡ଼ିଥିଲା। ସୁରକ୍ଷା କର୍ମୀ ତାଙ୍କ କର୍ତ୍ତବ୍ୟ ପାଳନ କରିବାରେ ବିଫଳ ହୋଇଥିଲେ । ଘଟଣା ଦିନ ସୁରକ୍ଷା କର୍ମୀ ଡ୍ୟୁଟିରେ ଥିଲେ କି ନାହିଁ ତାହା ସ୍ପଷ୍ଟ ହୋଇପାରି ନାହିଁ ।
