ପାଟନା: ବିହାର ବିଧାନସଭା ନିର୍ବାଚନ ପୂର୍ବରୁ କଥିତ ‘ଭୋଟ ଚୋରି' ବିରୋଧରେ କଂଗ୍ରେସ ନେତା ରାହୁଲ ଗାନ୍ଧୀ 'ଭୋଟର ଅଧିକାର ଯାତ୍ରା' କରୁଛନ୍ତି । ଏହି ଯାତ୍ରା ସେପ୍ଟେମ୍ବର ୧ରେ ପାଟନାର ଗାନ୍ଧୀ ମୈଦାନରେ ଶେଷ ହେବ । କଂଗ୍ରେସ ନେତୃତ୍ୱାଧୀନ ଇଣ୍ଡି ମେଣ୍ଟରେ ଅନ୍ତର୍ଭୁକ୍ତ ରାଜନୈତିକ ଦଳର ନେତାମାନେ ଯାତ୍ରାରେ ଯୋଗ ଦେଉଛନ୍ତି । ସେହିଭଳି କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ଶୁକ୍ରବାର ସିୱାନ ଗସ୍ତରେ ଅଛନ୍ତି । ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କ ଏକ ଭିଡିଓ ସେୟାର କରିଛନ୍ତି ।
ସେ ଲେଖିଛନ୍ତି, ‘କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ନିଜେ ସ୍ୱୀକାର କରିଛନ୍ତି ସେ ୧୯୯୧ କୋପ୍ପାଲ ଲୋକସଭା ନିର୍ବାଚନରେ କଂଗ୍ରେସ ଦଳର ଠକେଇର ଶିକାର ହୋଇଥିଲେ। ନିର୍ବାଚନ ଜାଲିଆତି ଯୋଗୁଁ ସେ ନିର୍ବାଚନ ହାରିଥିଲେ, ଏହି ଭିଡିଓ ଏହାର ପ୍ରମାଣ। କଂଗ୍ରେସର 'ଭୋଟ୍ ଚୋରି' ବିରୋଧରେ ଲଢ଼ିଥିବା ସେହି ବ୍ୟକ୍ତି ଆଜି ସେମାନଙ୍କର ମୁଖ୍ୟମନ୍ତ୍ରୀ ଏବଂ ତଥାକଥିତ 'ଭୋଟର ଅଧିକାର ରାଲି'ର ନେତୃତ୍ୱ ନେଉଛନ୍ତି । ଏହା ପ୍ରକୃତରେ ଏକ ବଡ଼ ବିଡ଼ମ୍ବନା ।’
ଅମିତ ମାଲବ୍ୟ କହିଛନ୍ତି ଯେ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ଭୋଟର ଅଧିକାର ରାଲି ପାଇଁ ବିହାରରେ ଅଛନ୍ତି। ସେ ୧୯୯୧ କୋପ୍ପାଲ ଲୋକସଭା ନିର୍ବାଚନରେ ବସବରାଜ ପାଟିଲ ଅନୱାରୀ(କଂଗ୍ରେସ ନେତା)ଙ୍କ ବିରୁଦ୍ଧରେ ନିର୍ବାଚନ ଜାଲିଆତିର ଅଭିଯୋଗ ଆଣିଥିଲେ। ସେତେବେଳେ ସେ 'ଭୋଟ୍ ଚୋରି' ବୋଲି ଚିତ୍କାର କରିଥିଲେ । କାରଣ ସେ ବାଲଟ୍ ପେପରରେ ହାରିଯାଇଥିଲେ । ବିଜେପି ଆଇଟି ସେଲ୍ ମୁଖ୍ୟ ଆହୁରି କହିଛନ୍ତି ଯେ, ଆଜି ରାହୁଲ ଗାନ୍ଧୀ 'ନିର୍ବାଚନ ଜାଲିଆତି' ବିଷୟରେ କହୁଛନ୍ତି । ଏହାର କାରଣ ହେଉଛି, ଭାରତର ଲୋକମାନେ ଗଣତାନ୍ତ୍ରିକ ପ୍ରକ୍ରିୟା ଏବଂ ହ୍ୟାକ ହୋଇପାରୁନଥିବା ଇଭିଏମ୍ ମାଧ୍ୟମରେ କଂଗ୍ରେସକୁ ନିର୍ଣ୍ଣାୟକ ଭାବରେ କ୍ଷମତାରୁ ବାହାର କରିଛନ୍ତି ।
