ଭୁବନେଶ୍ୱର,୨୪/୦୩: ବିଏମ୍ସି ଏଥର ରାଜସ୍ୱ ଆଦାୟରେ ରେକର୍ଡ କରିବ । ମାର୍ଚ୍ଚ ମାସ ତୃତୀୟ ସପ୍ତାହ ସୁଦ୍ଧା ୧୮୦ କୋଟି ଟଙ୍କାର ରାଜସ୍ୱ ଆଦାୟ ସରିଲାଣି । ଆଜିଠାରୁ ଜୋରଦାର ଚଢଉ କରାଯିବ । ଯେଉଁ ବ୍ୟାବସାୟୀକ ଅନୁଷ୍ଠାନ ହୋଲ୍ଡିଂ ଟ୍ୟାକ୍ସ ଫାଙ୍କୁଛନ୍ତି, ସେମାନଙ୍କ ଦୋକାନ ସିଲ୍ କରିବାକୁ ବିଏମ୍ସି ଚେତାବନୀ ଦେଇଛି ।
ମିଳିଥିବା ସୂଚନା ମୁତାବକ ବର୍ତ୍ତମାନ ସୁଦ୍ଧା ବିଏମ୍ସି ୧୭୮ କୋଟି ଟଙ୍କାର ରାଜସ୍ୱ ଆଦାୟ କରିଛି । ସେଥିମଧ୍ୟରେ ୭୫ କୋଟି ଟଙ୍କାର ହୋଲ୍ଡିଂ ଟିକସ, ଟ୍ରେଡ ଲାଇସେନ୍ସ ବାବଦକୁ ୫.୧୬ କୋଟି, ବିଜ୍ଞାପନରେ ୧୦ କୋଟି, ଅର୍ବାନ ରେଣ୍ଟ୍ରୁ ୫.୨ କୋଟି, ପାର୍କିଂରୁ ୯୦ ଲକ୍ଷ, ଏବଂ ଅନ୍ୟାନ ବାବଦକୁ ୪୦ କୋଟିର ରାଜସ୍ୱ ଆଦାୟ ହୋଇଛି । ଉତ୍ତର ଜୋନ୍ରେ ୪୯ କୋଟି ଟଙ୍କା ଟାର୍ଗେଟ ରହିଥିଲା । ଆଦାୟ ହୋଇଛି ମାତ୍ର ୨୬.୦୧ କୋଟି । ଟାର୍ଗେଟର ମାତ୍ର ୫୨.୮୯ ପ୍ରତିଶତ ଟଙ୍କା ଆଦାୟ ହୋଇପାରିଛି ।
ସେହିପରି ଦକ୍ଷିଣ-ପୂର୍ବ ଜୋନରେ ୩୭ କୋଟି ଟଙ୍କା ଟାର୍ଗେଟ ଥିବାବେଳେ ୨୩ କୋଟି ଏବଂ ଦକ୍ଷିଣ- ପଶ୍ଚିମ ଜୋନ୍ରେ ୪୫ କୋଟିରୁ ମାତ୍ର ୨୩.୭୦ କୋଟି ଆଦାୟ ହୋଇଛି । ବିଏମ୍ସି ପକ୍ଷରୁ ମାର୍ଚ୍ଚ ମାସ ପୂର୍ବରୁ ରାଜସ୍ୱ ଆଦାୟ ଜୋରଦାର କରାଯାଇଛି । ଏନେଇ ଘନ ଘନ ବୈଠକ ସହ ସବୁ ୱାର୍ଡରୁ କିପରି ରାଜସ୍ୱ ଆଦାୟ ହେବ ସେ ନେଇ ତନାଘନା ଚାଲିଛି ।
ଆଜି ଠାରୁ ଏହାକୁ ଆହୁରି ଜୋରଦାର କରାଯିବ । ଏପରିକି ମଲ୍ ଅନ୍ୟ ଅନୁଷ୍ଠାନ ଉପରେ ଚଢ଼ଉ କରାଯିବ । ହୋଲ୍ଡିଂ ଟିକସ ଦେବାରେ ଖିଲାପ କଲେ, ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ । ଆବଶ୍ୟକ ପଡ଼ିଲେ ଅନୁଷ୍ଠାନକୁ ସିଲ୍ କରାଯିବ ବୋଲି ବିଏମ୍ସି ଚେତାବନୀ ଦେଇଛି । ସେହିପରି କିପରି ଅଧିକ ଟଙ୍କା ଆଦାୟ ହେବ ସେ ନେଇ ମୋଟ୍ ୩୯ଟି ଟିମ୍ ଗଠନ କରାଯାଇଛି । ଏହି ଟିମ୍ ଘରକୁ ଘର ବୁଲି ରାଜସ୍ୱ ଆଦାୟ କରିବ । ତେବେ ଆଉ ମାସେ ଭିତରେ ହୋଲ୍ଡିଂ, ବାଣିଜ୍ୟିକରୁ ଆହୁରି ୫୮ କୋଟି ଟଙ୍କାର ରାଜସ୍ୱ ଆଦାୟ କରିବାକୁ ଲକ୍ଷ୍ୟ ରଖାଯାଇଛି । ଏଥର ୩ ଶହ କୋଟି ଟଙ୍କାର ରାଜସ୍ୱ ଆଦାୟ କରିବାକୁ ବିଏମ୍ସି ଲକ୍ଷ୍ୟ ରଖିଛି ।
