ବୌଦ୍ଧ,୩୦/୧୦: ବାଉଁଶୁଣି ମହାରାଜା ଢ଼ାବା ନିକଟରେ ଥିବା ଘରୋଇ ମାହେଶ୍ୱରୀ ବସ୍ ଭିତରୁ ଡ୍ରାଇଭରଙ୍କ ମୃତଦେହ ଉଦ୍ଧାର ହୋଇଛି । ମୃତ ଡ୍ରାଇଭର ସୋନପୁର ଜିଲ୍ଲା ବିନିକା ଥାନା ମନଗାଁ ଗ୍ରାମର ଜଗନ୍ନାଥ ସେଠୀ ବୋଲି ଜଣାପଡ଼ିଛି । ଡ୍ରାଇଭରଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ବୌଦ୍ଧ ବାଉଁଶୁଣି ଥାନା ବାଉଁଶୁଣି ମହାରାଜା ଢ଼ାବା ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବୌଦ୍ଧ ଜିଲ୍ଲା ବାଉଁଶୁଣୀ ଠାରୁ ସମ୍ବଲପୁର ଅଭିମୁଖେ ଯାଉଥିବା ଏକ ଘରୋଇ ଯାତ୍ରୀବାହୀ ବସ୍ ମାହେଶ୍ୱରୀ ପ୍ରତ୍ୟେକ ଦିନ ରାତିରେ ବାଉଁଶୁଣୀ ମହାରାଜା ଢାବା ନିକଟରେ ରହିଥାଏ । ପ୍ରତିଦିନ ସକାଳ ସମୟରେ ସମ୍ବଲପୁର ଅଭିମୁଖେ ଏହି ବସ୍ ବାହାରିଥାଏ । ତେବେ ପ୍ରତ୍ୟେକ ଦିନ ଭଳି ବସ୍ ଭିତରେ ଶୋଇଥିବା କଣ୍ଡକ୍ଟର ଓ ହେଲ୍ପର ସକାଳେ ଉଠି ଗାଡ଼ିକୁ ବସଷ୍ଟାଣ୍ଡକୁ ନେବା ପାଇଁ ଡ୍ରାଇଭରଙ୍କୁ ଉଠାଇଥିଲେ । ତାଙ୍କୁ ଉଠାଇବା ବେଳେ ସେ ନିଶ୍ଚଳ ହୋଇ ଶୋଇଥିବା ଦେଖିଥିଲେ । ଏହା ଦେଖି ସଙ୍ଗେ ସଙ୍ଗେ ୧୦୮ ଆମ୍ବୁଲାନ୍ସକୁ କଲ୍ କରି ଡାକିଥିଲେ । ଆସ୍ମୁଲାନ୍ସ ଯୋଗେ ତାଙ୍କୁ ବାଉଁଶୁଣୀ ଡାକ୍ତରଖାନାକୁ ଆଣିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଏହି ଘଟଣା ସମ୍ପର୍କରେ ବାଉଁଶୁଣୀ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବାଉଁଶୁଣୀ ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ବୌଦ୍ଧ ପଠାଇଥିବା ବେଳେ ମୃତ୍ୟୁର କାରଣ ଅସ୍ପଷ୍ଟ ରହିଛି । ପୋଲିସ ତଦନ୍ତ ଜାରି ରଖିଥିବା ବେଳେ ତଦନ୍ତ ପରେ ଏବଂ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି ।
