ବରଗଡ,୦୭/୦୬: ବରଗଡ଼ ପଞ୍ଚାୟତ କଲେଜ ପଛପଟୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ପାରିପାର୍ଶ୍ଵିକ ସ୍ଥିତିରୁ ଯୁବକଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି । ମୃତ ଯୁବକ ଜଣକ ହେଲେ କଲେଜ ପାଖ ପାଣ୍ଡ୍ରିପଥର ଅଞ୍ଚଳର ୪୫ ବର୍ଷୀୟ ଦେବରାଜ ପାଣିଗ୍ରାହୀ ।
ସୂଚନା ମୁତାବକ, ବରଗଡ଼ ପଞ୍ଚାୟତ କଲେଜ ପଛପଟୁ ଜଣେ ୪୫ ବର୍ଷୀୟ ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଛି । ମୃତଦେହ ନିକଟରେ ଇଟା ଓ ପଥର ପଡିଥିବାରୁ କେହି ପଥରରେ ଛେଚି ଛେଚି ହତ୍ୟା କରିଥିବା ପୁଲିସ୍ ସନ୍ଦେହ କରୁଛି । ମୃତଦେହକୁ ମାଟିରେ ଅଧା ଢାଙ୍କି ଦିଆଯାଇଥିବା ବେଳେ ଉପରକୁ ଅଧା ଦେଖାଯାଉଥିବାରୁ ହତ୍ୟା ସନ୍ଦେହ ଆହୁରି ବଢିଯାଇଛି । ଯୁବକଙ୍କ ମୃତ୍ୟୁ ପଛର କାରଣ ଅସ୍ପଷ୍ଟ ରହିଥିବାରୁ ଘଟଣାସ୍ଥଳରେ ସନ୍ଧାନୀ କୁକୁର ସହ ତଦନ୍ତ ଜାରି ରଖିଛି ଗ୍ରାମାଞ୍ଚଳ ଥାନା ପୁଲିସ । ସମ୍ବଲପୁରରୁ ସାଇଣ୍ଟିଫିକ ଟିମ୍ ଆସିଲା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ଗ୍ରାମାଞ୍ଚଳ ଥାନାଧିକାରୀ ସୂଚନା ଦେଇଛନ୍ତି ।
