ଭୁବନେଶ୍ୱର ୨୨/୧୧: ଦୁର୍ଗାପୂଜା କେଉଁ କାଳରୁ ସରିଲାଣି । କାଳୀ ଓ କାର୍ତ୍ତିକ ବି ବିସର୍ଜନ ହେଲେଣି । ହେଲେ ବମିଖାଲ ପୂଜା ମଣ୍ଡପରୁ ଦୁର୍ଗାପୂଜାରେ ପେଣ୍ଡାଲ ବନ୍ଧା ଯାଇଥିବା ବାଉଁଶ ଏ ଯାଏଁ ରାସ୍ତାରୁ ହଟିନି । ରାସ୍ତାରେ ବିପଦସଙ୍କୁଳ ଅବସ୍ଥାରେ ରହିଛି । ଏନେଇ ବିଏମ୍ସି ତାଗିଦ କରିବା ସହ ବମିଖାଲ ପୂଜା ମଣ୍ଡପ ଉପରେ ୫୦ ହଜାର ଟଙ୍କା ଜରିମାନା କଷିଛି । ଧାର୍ଯ୍ୟ ସମୟରେ ଟଙ୍କା ଦାଖଲ ନ କଲେ ବାଉଁଶ ଖୋଲି ନିଲାମ କରିବାକୁ ବିଏମ୍ସି ତାଗିଦ୍ କରିଛି ।
ଦୁର୍ଗା ପୂଜାରେ ବମିଖାଲ ରାସ୍ତାରେ ତୋରଣ ବନ୍ଧା ହୋଇଥିଲା । ହେଲେ ପୂଜା ପରେ ମଣ୍ଡପ ପକ୍ଷରୁ ତୋରଣ କଢା ହୋଇନଥିଲା । ମାସେରୁ ଅଧିକ ସମୟ ବିତିଥିଲେ ମଧ୍ୟ ମଣ୍ଡପ ସଜାଇଥିବା ସଂସ୍ଥା ବାଉଁଶ ଖୋଲିନଥିଲା । ମୁଖ୍ୟ ରାସ୍ତା ହୋଇଥିବାରୁ ଏହି ରାସ୍ତା ଦେଇ ପ୍ରତିଦିନ ଶହ ଶହ ଗାଡ଼ିମୋଟର ଯିବା ଆସିବା କରୁଛି । ଫଳରେ ଏହି ବାଉଁଶ ବିପଦ ସୃଷ୍ଟି କରୁଛି । ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି ।
ଗତକିଛି ଦିନ ତଳେ କଟକ ଖାନନଗର ଠାରେ ତୋରଣ ତଳେ କାର, ବାଇକ୍ ଚାପି ହୋଇଯାଇଥିଲା । ବିଏମ୍ସିର ଜଣେ ବରିଷ୍ଠ ଅଧିକାରୀ କ୍ଷେତ୍ର ପରିଦର୍ଶନ କରିବା ସମୟରେ ଏହି ବାଉଁଶ ବାଡ଼ ତାଙ୍କ ନଜରକୁ ଆସିଥିଲା । ଏହା ପରେ ସେ ପୂଜା ସଂସ୍ଥାକୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ । ଚିଠିରେ ଉଲ୍ଲେଖ ରହିଛି ଯେ ଏହା ଦ୍ୱାରା ସହରର ସୌନ୍ଦର୍ଯ୍ୟ ନଷ୍ଟ ହେଉଛି । ଲୋକେ ଅସୁବିଧାର ପଡୁଛନ୍ତି । ତେଣୁ ଦକ୍ଷିଣ-ପଶ୍ଚିମ ଜୋନାଲ କମିଶନରଙ୍କ ପାଖରେ ଜରିମାନା ଆକାରରେ ୫୦ ହଜାର ଟଙ୍କା ଦାଖଲ କରିବେ । ଏହା ସହ ବାଉଁଶ ନ ହଟାଇଲେ, ବିଏମ୍ସି ଉକ୍ତ ବାଉଁଶ ଖୋଲି ନିଲାମ କରିବ । ତେବେ ଏହି ପ୍ରସଙ୍ଗରେ ପୂଜା ମଣ୍ଡପ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରି ନାହଁ ।
