ସିଡିନୀ ୦୧/୦୧: ଚଳିତ ବର୍ଡର ଗାଭାସ୍କର ଟ୍ରଫିର ପଞ୍ଚମ ତଥା ଅନ୍ତିମ ଟେଷ୍ଟ ଖେଳିବା ପାଇଁ ଭାରତୀୟ ଦଳ ମଙ୍ଗଳବାର ସିଡନୀରେ ପହଞ୍ଚିଛି । ୩ ତାରିଖରୁ ନୂଆ ବର୍ଷ ଟେଷ୍ଟ ଆରମ୍ଭ ହେବ । ଆଜିଠୁ ଅଭ୍ୟାସ କରିବ ଭାରତୀୟ ଟିମ୍ । ଅବଶ୍ୟ ୩ଦିନ ମଧ୍ୟରେ ଅଭ୍ୟାସ କରିବା ଅପେକ୍ଷା ବିଶ୍ରାମ ନେବା ଶ୍ରେୟସ୍କର ହେବ । ଦଳର କିଛି ଖେଳାଳି ସିଡନୀରେ ପହଞ୍ଚି ନୂଆ ବର୍ଷ କଟାଇବା ପାଇଁ ପରିବାର ସହ ବୁଲା ବୁଲି କରୁଥିବା ଦେଖିବାକୁ ମିଳୁଛି ।
ମେଲବର୍ଣ୍ଣରେ ଅନୁଷ୍ଠିତ ବକ୍ସିଂ ଡେ' ଟେଷ୍ଟରେ ଭାରତୀୟ ଦଳର ପ୍ରମୁଖ ବୋଲର ଯଶପ୍ରୀତ ବୁମରା କଠିନ ପରିଶ୍ରମ କରିଥିଲେ । ଉଭୟ ଇନିଂସରେ ସେ ମୋଟ୍ ୫୩.୨ ଓଭର ବୋଲିଂ କରିଥିଲେ । ସେହିପରି ମହମ୍ମଦ ସିରାଜ ୪୬ ଓଭର ଓ ଆକାଶ ଦୀପ ୪୩ ଓଭର ବୋଲିଂ କରିଥିଲେ । ସିଡନୀରେ ମଧ୍ୟ ପୂର୍ଣ୍ଣ ୫ଦିନ ଧରି ଘମାଘୋଟ ଲଢେଇ ହେବା ନିଶ୍ଚିତ । ତେଣୁ ପେସ୍ ବାହିନୀଙ୍କୁ ଉପଯୁକ୍ତ ବିଶ୍ରାମ ନେବା ଜରୁରି । ଆସନ୍ତା କାଲି ଟିମ ମ୍ୟାନେଜମେଣ୍ଟର ବୈଠକ ବସିପାରେ । ପଞ୍ଚମ ଟେଷ୍ଟ ପାଇଁ ଏକାଦଶ ଚୟନ ଓ ରଣଜୀ ପ୍ରସ୍ତୁତ କରିବା ବୈଠକର ମୁଖ୍ୟ ବିଷୟ ରହିବ ।
କୋହଲିଙ୍କ ଫୁଟ ୱାର୍କରେ ରହିଛି ତ୍ରୁଟି:
ଗାଭାସ୍କର ଭାରତୀୟ କ୍ରିକେଟ୍ ଦଳ ମେଲ୍ବର୍ଣ୍ଣରେ ଅନୁଷ୍ଠିତ ଚତୁର୍ଥ ଟେଷ୍ଟରେ ୧୮୪ ରନ୍ରେ ପରାଜିତ ହୋଇଥିଲା । ଅଷ୍ଟ୍ରେଲିଆ ୨-୧ରେ ସିରିଜ ଆଗୁଆ ରହିଛି । ୩ତାରିଖରୁ ପଞ୍ଚମ ଟେଷ୍ଟ ଆରମ୍ଭ ହେବ । ଭାରତ ଉକ୍ତ ମ୍ୟାଚ୍ ଜିତିଲେ ବର୍ଡର-ଗାଭାସ୍କର ଟ୍ରଫି ବଜାୟ ରଖିବ । ମାତ୍ର ଏହା ପୂର୍ବରୁ ସିନିୟର ବ୍ୟାଟରଙ୍କୁ ତ୍ରୁଟି ସୁଧାରିବାକୁ ହେବ । ପର୍ଥ ପରେ କ୍ରମାଗତ ୩ଟି ଟେଷ୍ଟରେ ବିଫଳ ହୋଇଥିବା ବିରାଟ କୋହଲିଙ୍କ ଫୁଟୱାର୍କରେ ତ୍ରୁଟି ଖୋଜି ପାଇଛନ୍ତି ପୂର୍ବତନ କ୍ରିକେଟ୍ ଖେଳାଳି ସୁନିଲ ଗାଭାସ୍କର । ସେ କହିଛନ୍ତି, ସଟ୍ ଖେଳିବାପୂର୍ବରୁ କୋହଲିଙ୍କ ଫ୍ରଣ୍ଟ ଫୁଟ୍ ବଲ୍ ଆଡ଼କୁ ନଯାଇ ସିଧା ଆଗକୁ ଯାଉଛି । ଫଳରେ ବଲର ଲାଇନ୍ ପରଖିବାରେ ସେ ବିଫଳ ହେଉଛନ୍ତି । ସେ ନଚାହିଁଲେ ମଧ୍ୟ ଅଫ ଷ୍ଟମ୍ପ ବାହାର ବଲରେ ବ୍ୟାଟ୍ ଲଗାଇ ଦେଉଛନ୍ତି । ବଲ୍ ଲାଇନ୍ ଆଡ଼କୁ ଗୋଡ଼ ବଢିଲେ ସଟ୍ ଚୟନ ସହଜ ହେବ ।
ବୁମରା ବିଶ୍ୱର ଶ୍ରେଷ୍ଠ ବୋଲର: ଲେହମାନ ଭାରତୀୟ କ୍ରିକେଟ୍ ଦଳର ଷ୍ଟାର ପେସ୍ ବୋଲର ଯଶପ୍ରୀତ ବୁମରାଙ୍କୁ ପୂର୍ବତନ ଅଷ୍ଟ୍ରେଲିଆ ଖେଳାଳି ଡାରେନ ଲେହମାନ ପ୍ରଶଂସା କରିଛନ୍ତି । ସେ କହିଛନ୍ତି, ମୋ କ୍ରିକେଟ୍ କ୍ୟାରିୟର୍ରୁ ଆରମ୍ଭ କରି ଆଜି ପର୍ଯ୍ୟନ୍ତ ମୁଁ ଯେତେ ବୋଲରଙ୍କୁ ଦେଖିଛି, ସେମାନଙ୍କ ମଧ୍ୟରେ ବୁମରା ଶ୍ରେଷ୍ଠ । ମୁଁ ୱାସିମ ଆକ୍ରମ, ଗ୍ଲେନ ମ୍ୟାକ୍ଗ୍ରା, କର୍ଟନୀ ୱାଲ୍ସଙ୍କ ଭଳି ପେସ୍ ବୋଲରଙ୍କୁ ସାମ୍ନା କରିଛି । ଜେମ୍ସ ଆଣ୍ଡରସନଙ୍କ ଭଳି ପ୍ରସିଦ୍ଧ ବୋଲରଙ୍କୁ ଖେଳିଛି । ତଥାପି ମୋ ନଜରରେ ବୁମରା ଶ୍ରେଷ୍ଠ । ସେ ମୋତେ ବେଶ୍ ପ୍ରଭାବିତ କରିଛନ୍ତି । ଏଭଳି ଅନ୍ୟ କୌଣସି ବୋଲର ମୋତେ ପ୍ରଭାବିତ କରିନଥିଲେ । ୨୦୧୩/୧୪ ଆସେସରେ ମିଚେଲ ଜନସନଙ୍କ ବୋଲିଂ ପ୍ରଭାବଶାଳୀ ରହିଥିଲା । ମାତ୍ର ବୁମରା ଏକୁଟିଏ ଏହି ସିରିଜରେ ଆତଙ୍କ ଖେଳାଇ ରଖିଛନ୍ତି ।
ରୋହିତଙ୍କ ମାନସିକତା ବୁଝି ହେଉନି: ଗାଙ୍ଗୁଲି
ବକ୍ସିଂ ଡେ’ ଟେଷ୍ଟରେ ଭାରତର ପରାଜୟ ପରେ ଅଧିନାୟକ ରୋହିତ ଶର୍ମା ତୀବ୍ର ସମାଲୋଚିତ ହୋଇଛନ୍ତି । ତାଙ୍କୁ ଅଦରକାରୀ ବସ୍ତୁ ଭାବେ ବର୍ଣ୍ଣନା କରାଯାଉଛି । କିଛି ମାସ ତଳେ ରୋହିତଙ୍କ ଦମ୍ଦାର ବ୍ୟାଟିଂ ବଳରେ ଭାରତ ଟି-ଟ୍ୱେଣ୍ଟି ବିଶ୍ୱକପ୍ ଜିତିଥିଲା । ଏହା ପୂର୍ବରୁ ଦଳ ଦିନିକିଆ ବିଶ୍ୱକପ ଫାଇନାଲ୍ରେ ପ୍ରବେଶ କରିଥିଲା । ରୋହିତଙ୍କ ବ୍ୟାଟିଂ ଯୋଗୁଁ ଏହା ସମ୍ଭବ ହୋଇଥିଲା । ମାତ୍ର ଏଥର ସେ ଫର୍ମରେ ନାହାନ୍ତି । ଦଳରେ ଅନ୍ୟ କିଛି ବ୍ୟାଟରମାନେ ମଧ୍ୟ ଫର୍ମ ହରାଇଛନ୍ତି । କିନ୍ତୁ ରୋହିତଙ୍କୁ ସବୁ ସମାଲୋଚନା କରୁଛନ୍ତି । ସୌରଭ ଗାଙ୍ଗୁଲି କହିଛନ୍ତି, ମୁଁ ବର୍ତ୍ତମାନ ରୋହିତଙ୍କ ମାନସିକତାକୁ ବୁଝିବାରେ ବିଫଳ ହୋଇଛି । ସେହିପରି ଜଷ୍ଟିନ ଲାଙ୍ଗର କହିଛନ୍ତି, ମୋ ମତରେ ରୋହିତ କ୍ଲାନ୍ତ ହୋଇପଡ଼ିଛନ୍ତି । ମୁଁ ତାଙ୍କୁ ଏଭଳି କେବେ ଦେଖି ନଥିଲି । ସେ ଗ୍ରାଉଣ୍ଡରେ ଭାବ ବିହ୍ୱଳ ହୋଇପଡ଼ୁଛନ୍ତି । ସେ ସର୍ବଦା ଶାନ୍ତ ମନରେ ବିନା ଚାପରେ ଖେଳି ଆସିଛନ୍ତି । କିନ୍ତୁ ଏଥର ଛୋଟ ମୋଟ ତ୍ରୁଟିରେ ମଧ୍ୟ ବିରକ୍ତ ହେଉଛନ୍ତି । ମାନସିକ ସ୍ତରରେ ସେ କ୍ଳାନ୍ତ ଥିବା ମୁଁ ଅନୁଭବ କରୁଛି ।
