ନ୍ୟୁୟର୍କ, ୧୫/୦୬: ବ୍ରାଜିଲ ଓ ମରକ୍କୋ ମ୍ୟାଚ ଚଳିତ ଫିଫା ବିଶ୍ୱକପ୍ର ଗ୍ରୁପ୍ ପର୍ଯ୍ୟାୟରେ ଏକ ବଡ଼ ଲଢ଼େଇ ଥିଲା । କିନ୍ତୁ ଶେଷରେ ଏହି ମ୍ୟାଚ ୧-୧ ଗୋଲରେ ଅମୀମାଂସିତ ରହିଥିଲା । ଦୁଇ ଦଳ ପଏଣ୍ଟ ଭାଗ କରିଥିଲେ । ମାତ୍ର ୫ ଥର ବିଶ୍ୱ ଚାମ୍ପିଅନ ବ୍ରାଜିଲର ଅସ୍ଥିର ଆରମ୍ଭ ସମସ୍ତଙ୍କୁ ଚକିତ କରିଥିଲା । ଭିନିସିୟସ ଜୁନିୟର ଗୋଲ୍ ଦେଇ ଦଳର ପଏଣ୍ଟ ଖାତା ଖୋଲିଥିଲେ ।
ଗ୍ରୁପ୍ ସି’ରେ ବ୍ରାଜିଲ (୬) ଓ ମରକ୍କୋ (୭) ବିଶ୍ୱ ମାନ୍ୟତାରେ ଅତି ନିକଟତର । କିନ୍ତୁ ବ୍ରାଜିଲ ୫ ଥର ବିଶ୍ୱ ଚାମ୍ପିଅନ ଦଳ । ଷଷ୍ଠ ଟାଇଟଲ ଲକ୍ଷ୍ୟରେ ଦଳ ରହିଛି । ମାତ୍ର ଏଥର ବିଶ୍ୱକପ୍ରେ ଦଳର ମନ୍ଥର ଶୁଭାରମ୍ଭ ପ୍ରଶଂସକଙ୍କ ହୃଦସ୍ପନଦ ବଢ଼ାଇ ଦେଇଥିଲା । ମରକ୍କୋ ଯେମିତି ଆରମ୍ଭ କରିଥିଲା ତାହା ବେଶ ଅଦ୍ଭୁତ ଥିଲା । ଇସମାଏଲ ସାଇବାରି ୨୧ ମିନିଟରେ ଗୋଲ୍ ଦେଇ ଦଳକୁ ୧-୦ ଗୋଲରେ ଅଗ୍ରଣୀ କରାଇଥିଲେ । ବ୍ରାହିମ ଡାଏଜ ତାଙ୍କୁ ସହାୟତା କରିଥିଲେ । ଏତେ ସହଳ ବ୍ରାଜିଲ ପ୍ରଥମେ ଗୋଲ ବରଣ କରିବା ପରେ ପ୍ରଶଂସକ ଏକ ପ୍ରକାର ଭାଙ୍ଗି ପଡ଼ିଥିଲେ । ପୂରା ଷ୍ଟାଡିୟମ ନିରବି ଯାଇଥିଲା । ଟିଭି ପରଦା ମାମ୍ନାରେ ପ୍ରଶଂସକ ମୁହଁ ଶୁଖାଇ ବସିଥିଲେ ।
୨୫ ବର୍ଷୀୟ ଇସମାଏଲଙ୍କ ଏହା ପ୍ରଥମ ବିଶ୍ୱକପ୍ ଏବଂ ବିଶ୍ୱକପ୍ରେ ପ୍ରଥମ ଗୋଲ୍ ଦେବାରେ ସଫଳ ହୋଇଥିଲେ । ୨୦୨୨ ବିଶ୍ୱକପ୍ରେ ବେଲଜିୟମ ପକ୍ଷରୁ ଖେଳିବାର ପ୍ରସ୍ତାବ ମିଳିଥିଲା, ମାତ୍ର ତାହାକୁ ସେ ଅଗ୍ରାହ୍ୟ କରି ଦେଇଥିଲେ । ପରବର୍ତ୍ତୀ ସମୟରେ ବ୍ରାଜିଲ ଚାପଗ୍ରସ୍ତ ହୋଇଥିଲା । ବରାବର ସ୍ଥିତିକୁ ଆସିବା ନେଇ ଜୋରଦାର ପ୍ରୟାସ କରିଥିଲା । ଉଭୟ ଦଳ ୪-୨ ୩-୧ ରଣନୀତିରେ ଖେଳୁଥିଲେ । ୩୨ ମିନିଟରେ ବ୍ରୁନୋ ଗିମାରେଜଙ୍କ ଠାରୁ ସହାୟତା ପାଇ ଭିନିସିୟସ ଗୋଲ ଦେବାରେ ସଫଳ ହୋଇଥିଲେ । ମ୍ୟାଚ ବରାବର ହୋଇଥିଲା । ପ୍ରଶଂସକ ଆଶ୍ୱସ୍ତ ହୋଇଥିଲେ ।
ଅଧିକ ପଢ଼ନ୍ତୁ :- IND VS PAK: ପାକିସ୍ତାନ ଆଁ କରି ଚାହିଁକି ରହିଗଲା...ଏହି ବଡ଼ ଟର୍ଣ୍ଣିଂ ପଏଣ୍ଟ ଭାରତକୁ ୬୪ ରନ୍ରେ ଜିତାଇଲେ
ପରବର୍ତ୍ତୀ ସମୟ ଖେଳ ତୀବ୍ର ସଂଘର୍ଷପୂର୍ଣ୍ଣ ହୋଇଥିଲା । ପ୍ରଥମାର୍ଦ୍ଧର ଅବଶିଷ୍ଟ ସମୟ ଓ ଦ୍ୱିତୀୟାର୍ଦ୍ଧରେ ଖେଳ ଗୋଲଶୂନ୍ୟ ରହିଥିଲା । ହୁଏତ ବ୍ରାଜିଲ ୩୨ ମିନିଟରେ ସ୍ଥିତି ବରାବର କରିନଥିଲେ କିଛି ବି ଅଘଟଣ ଘଟିଯାଇଥାନ୍ତା । ଏହି ମ୍ୟାଚରେ ବ୍ରାଜିଲର ଷ୍ଟାର ଖେଳାଳି ନେୟମାର ଏକାଦଶରେ ସ୍ଥାନ ପାଇନଥିଲେ । ସେ କେବଳ ବସି ମ୍ୟାଚ ଦେଖିଥିଲେ । ଗ୍ରୁପ୍ ସି’ରେ ବ୍ରାଜିଲ ପଏଣ୍ଟ ଟେବୁଲରେ ତୃତୀୟ ସ୍ଥାନରେ ରହିଛି । ସମାନ ୧ ପଏଣ୍ଟ ମରକ୍କୋ ଦ୍ୱିତୀୟ ଏବଂ ସ୍କଟଲାଣ୍ଡ ୩ ପଏଣ୍ଟ ସହ ପ୍ରଥମ ସ୍ଥାନରେ ଅଛି। ଏହି ମ୍ୟାଚ ପୂର୍ବରୁ ଖେଳାଯାଇଥିବା କତାର-ସ୍ୱିଜରଲାଣ୍ଡ ମ୍ୟାଚ ୧-୧ ଗୋଲରେ ଡ୍ର’ ରହିଥିଲା ।
