କଟକ,୦୨/୧୧: ବିଦ୍ୟାର୍ଥୀଙ୍କ ଦକ୍ଷତା ବୃଦ୍ଧି କରାଇବାକୁ ହେଲେ ଘୋଷା ପଦ୍ଧତିରୁ ମୁକ୍ତ କରି ସେମାନଙ୍କର ବୋଧ ଶକ୍ତିର ବିକାଶ ହେବାର ଆବଶ୍ୟକ ବୋଲି ମାଧ୍ୟମିକ ପରିଷଦ(ବୋର୍ଡ) କର୍ତ୍ତୃପକ୍ଷ ହୃଦୟଙ୍ଗମ କରିଛନ୍ତି । ତେଣୁ ମାଧ୍ୟମିକ ଶିକ୍ଷା ବ୍ୟବସ୍ଥାରେ ଅଧ୍ୟୟନରତ ଓଡ଼ିଆ ମାଧ୍ୟମ ଛାତ୍ରଛାତ୍ରୀ କିପରି ସିବିଏସ୍ଇ ବିଦ୍ୟାର୍ଥୀଙ୍କ ପରି ଜାତୀୟ ସ୍ତରରେ ଦକ୍ଷତା ପ୍ରଦର୍ଶନ କରିବେ ସେଥିଲାଗି ବୋର୍ଡ କର୍ତ୍ତୃପକ୍ଷ ଏନ୍ସିଇଆର୍ଟିର ଗାଇଡ୍ଲାଇନ୍କୁ ଅନୁକରଣ କରିଛନ୍ତି ।
ସିବିଏସ୍ଇର ଦଶମ ବୋର୍ଡ ପରୀକ୍ଷାରେ ଆସୁଥିବା ପ୍ରଶ୍ନ ପରି ମାଟ୍ରିକ୍ ପରୀକ୍ଷା ମଧ୍ୟ ସମାନ ଢାଞ୍ଚାରେ ପ୍ରଶ୍ନପତ୍ର ଆସିବ । ଅନ୍ୟପକ୍ଷରେ ଦକ୍ଷତା ଭିତ୍ତିକ ପ୍ରଶ୍ନାବଳୀ ପ୍ରସ୍ତୁତ ହେଉଥିବାରୁ ଶିକ୍ଷକମାନେ ପିଲାମାନଙ୍କୁ ଶ୍ରେଣୀ ଗୃହ ପାଠପଢ଼ା ଉପରେ ଗୁରୁତ୍ୱ ଦେବାକୁ ବାଧ୍ୟ ହେବେ ବୋଲି ଜଣେ ଶିକ୍ଷାଧିକାରୀ କହିଛନ୍ତି । ଏହି ଅବସରରେ ବୋର୍ଡ କାର୍ଯ୍ୟାଳୟରେ କେନ୍ଦ୍ରୀୟ ବିଦ୍ୟାଳୟ ସଂଗଠନର ସଚ୍ଚିନ୍ଦ୍ରନ୍ କେ. ଏସ୍, ଦିଲ୍ଲୀ ସ୍ଥିତ ଏନ୍ସିଇଆରଟି-ପରଖର ବରିଷ୍ଠ ଅଧିକାରୀ ବିବେକ ଗୁପ୍ତାଙ୍କୁ ଏକ ୫ଦିନିଆ କର୍ମଶାଳା ଆୟୋଜିତ ହୋଇଛି । ଗତକାଲିଠାରୁ ଆରମ୍ଭ ହୋଇଥିବା ଉକ୍ତ କର୍ମଶାଳାକୁ ବୋର୍ଡ ସଭାପତି ଶ୍ରୀକାନ୍ତ ତରାଇ ଉଦ୍ଘାଟନ କରିଥିଲେ । ଏଥିରେ ରାଜ୍ୟର ୫୮ ଜଣ ଏକ୍ସପର୍ଟଙ୍କୁ ଆସନ୍ତା ୪ ତାରିଖ ପର୍ଯ୍ୟନ୍ତ କେନ୍ଦ୍ରୀୟ ବିଦ୍ୟାଳୟ ସଂଗଠନ ଓ ଏନ୍ସିଆରଟିର ଅଧିକାରୀ ଏକ୍ସପର୍ଟଙ୍କୁ ନୂତନ ଢାଞ୍ଚାରେ ହେବାକୁ ପ୍ରଶ୍ନପତ୍ର ପ୍ରସ୍ତୁତି କୌଶଳ ସମ୍ପର୍କରେ ପରାମର୍ଶ ଦେଇଥିଲେ । ପ୍ରାଥମିକ ପର୍ଯ୍ୟାୟରେ କେବଳ ଦଶମ ଶ୍ରେଣୀ ବିଦ୍ୟାର୍ଥୀଙ୍କ ପାଇଁ ବୋର୍ଡ ପକ୍ଷରୁ କୋଶ୍ଚିନ୍ ବ୍ୟାଙ୍କ୍ ପ୍ରସ୍ତୁତ କରାଯାଉଛି । ଏହା ପ୍ରସ୍ତୁତ ପରେ ଖୁବଶୀଘ୍ର ବୋର୍ଡ ୱେବ୍ସାଇଟ୍ରେ ଉପଲବ୍ଧ କରାଯିବ । ଫଳରେ ମାଟ୍ରିକ୍ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଦଶମ ଶ୍ରେଣୀ ବିଦ୍ୟାର୍ଥୀ, ଶିକ୍ଷକ ଓ ଅଭିଭାବକମାନେ ବୋର୍ଡ ୱେବ୍ସାଇଟରେ ଉପଲବ୍ଧ କୋଶ୍ଚିନ୍ ବ୍ୟାଙ୍କ୍ର ଏକାଧିକ ପ୍ରଶ୍ନ ଅନୁକରଣ କରିପାରିବେ ବୋଲି ସୂଚନା ମିଳିଛି । ଏହି କୋଶ୍ଚିନ୍ ବ୍ୟାଙ୍କ୍ ପ୍ରସ୍ତୁତିରେ ଅଭିଜ୍ଞ ଶିକ୍ଷକଙ୍କୁ ସାମିଲ୍ କରାଯାଇଥିବା ସୂଚନା ମିଳିଛି । ଏହି କାର୍ଯ୍ୟକ୍ରମରେ ବୋର୍ଡର ଉପସଭାପତି ଅମୂଲ୍ୟ ପ୍ରଧାନ, ସମ୍ପାଦକ ସରୋଜ ବେହେରା, ଏଷ୍ଟାବ୍ଲିସମେଣ୍ଟ ଅଫିସର ବୁଲ୍ବୁଲ୍ ବେହେରା, ପରୀକ୍ଷା ନିୟନ୍ତ୍ରକ ଚକ୍ରଧର ବେହେରା ଓ ଏକାଡେମିକ୍ ଅଧିକାରୀ ଡ. ସୁଶାନ୍ତ ମହାପାତ୍ର ପ୍ରମୁଖ ଏକ୍ସପର୍ଟମାନଙ୍କ ସହ ସମନ୍ୱୟ ରକ୍ଷା କରି କୋଶ୍ଚିନ୍ ବ୍ୟାଙ୍କ୍ ପ୍ରସ୍ତୁତି କାର୍ଯ୍ୟକ୍ରମକୁ ଅନୁଧ୍ୟାନ କରୁଛନ୍ତି ।
