ଭଞ୍ଜନଗର,୨୩/୧୧ : କଟକ ବାଲିଯାତ୍ରା ବୁଲି ଯାଇଥିବାବେଳେ ଭଞ୍ଜନଗର ବ୍ଲକ ତାରା ସିଂ ଥାନା ଅଞ୍ଚଳର ଗାଲେରୀ ଗ୍ରାମର ପ୍ରମୋଦ ସାହୁ (୧୮) ନାମକ ଜଣେ ଯୁବକର ଆକସ୍ମିକ ମୃତ୍ୟୁ ଘଟିଛି । ସୂଚନା ଅନୁସାରେ ଗାଲେରୀ ଗ୍ରାମର ବିଜୟ କେତନ ସାହୁ ତାଙ୍କର ୨ ପୁଅଙ୍କ ସହ ଶୁକ୍ରବାର କଟକ ବାଲିଯାତ୍ରା ବୁଲି ଦେଖିବାକୁ ଯାଇଥିଲେ । ଆଉ ବାଲିଯାତ୍ରାର ଏକ ପଏଣ୍ଟରେ ସେଲ୍ଫି ଉଠାଉଥିବାବେଳେ ବିଜୟ କେତନଙ୍କ ସାନପୁଅ ପ୍ରମୋଦ ହଠାତ୍ ବେହୋସ୍ ହୋଇ ତଳେ ପଡି ଯାଇଥିଲେ। ତାଙ୍କୁ ତୁରନ୍ତ ବାଲିଯାତ୍ରା ପଡ଼ିଆରେ ଥିବା ମେଡିକାଲ କ୍ୟାମ୍ପକୁ ନିଆଯାଇଥିଲା। ହେଲେ ଡାକ୍ତର ସେଠାରେ ପ୍ରମୋଦଙ୍କୁ ମୃତ ଘୋଷଣା କରିଥିଲେ।
ପ୍ରମୋଦ ବିଟେକ୍ ପ୍ରଥମ ବର୍ଷର ଛାତ୍ର ହୋଇଥିବାବେଳେ ତାଙ୍କର ଏଭଳି ଆକସ୍ମିକ ମୃତ୍ୟୁ ଖବର ଗାଲେରୀରେ ପ୍ରଚାରିତ ହେବା ମାତ୍ରେ ପୁରା ଅଞ୍ଚଳରେ ଶୋକର ଛାୟା ଖେଳିଯାଇଛି। ଶନିବାର ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବାବେଳେ ପୁରୀ ସ୍ଵର୍ଗଦ୍ଵାରରେ ପ୍ରମୋଦଙ୍କ ଅନ୍ତିମ ସତ୍କାର କରାଯାଇଛି। କାହିଁକି ଓ କେଉଁ ପରିସ୍ଥିତିରେ ପ୍ରମୋଦଙ୍କ ମୃତ୍ୟୁ ଘଟିଲା ତାକୁ ନେଇ ପୁଲିସ ଛାନଭିନ ଆରମ୍ଭ କରିଛି।
