ନୂଆଦିଲ୍ଲୀ,୩୧/୦୧: ରାତି ପାହିଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୬-୨୭ ଆର୍ଥିକ ବର୍ଷ ପାଇଁ ଦେଶର ବଜେଟ୍ ଦସ୍ତାବିଜ୍କୁ ସଂସଦରେ ଉପସ୍ଥାପନ କରିବେ । ଏଥିରେ କେତେକ ପ୍ରମୁଖ ଘୋଷଣା ହେବା ନେଇ ଅନୁମାନ ରହିଛି । ସାଧାରଣ ଲୋକଙ୍କ ପାଇଁ କିଛି ବଡ଼ ପ୍ରସ୍ତାବ ଆସିପାରେ ବୋଲି ସୂତ୍ରରୁ ଜଣାପଡ଼ିଛି । ୨୦୨୬ ବଜେଟରେ ଆୟକରରେ ବଡ଼ ପରିବର୍ତ୍ତନ ଆଶା କରାଯାଉଛି । ବିଶେଷଜ୍ଞଙ୍କ ମତରେ, ସରକାର ନୂଆ ଟିକସ ବ୍ୟବସ୍ଥାକୁ ଅଧିକ ଆକର୍ଷଣୀୟ କରିପାରନ୍ତି, ଏବଂ ଧୀରେ ଧୀରେ ପୁରୁଣା ଟିକସ ବ୍ୟବସ୍ଥାକୁ ମଧ୍ୟ ଉଚ୍ଛେଦ କରିପାରନ୍ତି ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ଫେବୃଆରୀ ୧, ୨୦୨୬ ଅର୍ଥାତ ଆସନ୍ତାକାଲି (ରବିବାର) କେନ୍ଦ୍ରୀୟ ବଜେଟ୍ ଉପସ୍ଥାପନ କରିବେ । ପ୍ରତିବର୍ଷ ପରି, ସାଧାରଣ ନାଗରିକ ଏବଂ କରଦାତା, ବିଶେଷକରି ଚାକିରି କରୁଥିବା ଲୋକମାନଙ୍କର ଟ୍ୟାକ୍ସ ଉପରେ ନଜର ରହିଛି । ଦେୟ କରର ପରିମାଣ ମୁଖ୍ୟତଃ ଆପଣ ପୁରୁଣା କିମ୍ବା ନୂଆ ଟିକସ ବ୍ୟବସ୍ଥାନରେ ଆୟକର ରିଟର୍ଣ୍ଣ ଫାଇଲ୍ କରୁଛନ୍ତି କି ନାହିଁ ତାହା ଉପରେ ନିର୍ଭର କରେ । ନୂଆ ଟିକସ ବ୍ୟବସ୍ଥା ପ୍ରଚଳନ ହେବା ପରଠାରୁ, କରଦାତାଙ୍କ ମନରେ ଏକ ବଡ଼ ପ୍ରଶ୍ନ ଉଙ୍କି ମାରୁଛି । ଭବିଷ୍ୟତରେ ପୁରୁଣା ଟିକସ ବ୍ୟବସ୍ଥା ସମ୍ପୂର୍ଣ୍ଣ ଭାବରେ ଉଚ୍ଛେଦ ହେବ କି ? ବଜେଟ୍ ୨୦୨୬ ପୂର୍ବରୁ କରାଯାଇଥିବା ଏକ ସର୍ଭେରେ, ଅଧିକାଂଶ ଟିକସ ବିଶେଷଜ୍ଞ ମତରେ ସରକାର ଧୀରେ ଧୀରେ ପୁରୁଣା ଟିକସ ବ୍ୟବସ୍ଥାକୁ ଉଚ୍ଛେଦ କରିବାକୁ ଅଗ୍ରସର ହୋଇପାରନ୍ତି, କିନ୍ତୁ ଏହି ପ୍ରକ୍ରିୟା ପର୍ଯ୍ୟାୟକ୍ରମେ ହେବ ।
ନୂତନ ବନାମ ପୁରୁଣା ଟିକସ ବ୍ୟବସ୍ଥା: ନୂଆ ଏବଂ ପୁରୁଣା ଟିକସ ବ୍ୟବସ୍ଥା ମଧ୍ୟରେ ସବୁଠାରୁ ବଡ଼ ପାର୍ଥକ୍ୟ ହେଉଛି ଟିକସ ସ୍ଲାବ୍ ଏବଂ ଡିଡକ୍ସନ୍। ନୂତନ ଟିକସ ବ୍ୟବସ୍ଥାରେ ଅଧିକ ଆୟ ଉପରେ କମ ଟିକସ ହାର ଅଛି, କିନ୍ତୁ କମ୍ ଛାଡ଼ ଏବଂ ଡିଡକ୍ସନ୍ ଦିଆଯାଏ । ଅନ୍ୟପକ୍ଷରେ, ପୁରୁଣା ବ୍ୟବସ୍ଥାରେ ଅଧିକ ଟିକସ ସ୍ଲାବ୍ ଅଧିକ ଅଛି, କିନ୍ତୁ ବିଭିନ୍ନ ପ୍ରକାରର ଛାଡ଼ ଏବଂ ଡିଡକ୍ସନ୍ ଦେଇଥାଏ । ନୂଆ ଟିକସ ବ୍ୟବସ୍ଥାରେ ବେସିକ୍ ଛାଡ଼ ସୀମା ଅଛି। ଧାରା ୮୭ଏ ଅନୁଯାୟୀ ଛାଡ଼ ସହିତ, ବେତନଭୋଗୀ ବ୍ୟକ୍ତିମାନଙ୍କର ପ୍ରାୟ ୧୨.୭୫ ଲକ୍ଷ ପର୍ଯ୍ୟନ୍ତ ଆୟ କରମୁକ୍ତ ହୋଇଯାଏ । ସରଳ ଭାବରେ କହିବାକୁ ଗଲେ, ଯଦି ଜଣେ ବ୍ୟକ୍ତି ପ୍ରତି ମାସରେ ୧ ଲକ୍ଷ ରୋଜଗାର କରନ୍ତି, ତେବେ ସେମାନେ ଶୂନ୍ୟ ଟିକସ ଦିଅନ୍ତି । ଅନ୍ୟପକ୍ଷରେ, ପୁରୁଣା ଟିକସ ବ୍ୟବସ୍ଥାରେ ୮୦ସି (ପିଏଫ, ପିପିଏଫ, ଏଲଆଇସି ପରି ନିବେଶ ),୮୦ଡି (ସ୍ୱାସ୍ଥ୍ୟ ବୀମା), ଏପିଏସ,ଏଚଆରଏ, ଏଲଟିଏ, ବ୍ୟାଙ୍କ ସୁଧ ଉପରେ ୮୦ଟିଟିଏ ଏବଂ ଗୃହ ଋଣ ସୁଧ ସମେତ ଅନେକ ଛାଡ଼ ପ୍ରଦାନ କରାଯାଏ ।
କାହିଁକି ପ୍ରଚଳନ ହୋଇଥିଲା ନୂତନ ଟିକସ ବ୍ୟବସ୍ଥା ? ସରକାରଙ୍କ ଲକ୍ଷ୍ୟ ହେଉଛି ଟିକସ ବ୍ୟବସ୍ଥାକୁ ସରଳ କରିବା । ଅତ୍ୟଧିକ ଛାଡ଼ ଏବଂ କଟାଉଣ୍ଟ ଟିକସ ଦାଖଲକୁ ଜଟିଳ କରିଥାଏ ଏବଂ କାଗଜପତ୍ର ବୃଦ୍ଧି କରିଥାଏ । ୨୦୨୦ ବଜେଟରେ, ଅର୍ଥମନ୍ତ୍ରୀ କହିଥିଲେ ଯେ ଟିକସ ଆଇନକୁ ସରଳ କରିବା ଏବଂ ସାଧାରଣ କରଦାତାଙ୍କୁ ଆଶ୍ୱସ୍ତି ପ୍ରଦାନ କରିବାକୁ ନୂଆ ଟିକସ ବ୍ୟବସ୍ଥା ପ୍ରଚଳନ କରାଯାଇଥିଲା । ବିଶେଷଜ୍ଞଙ୍କ ଅନୁଯାୟୀ, ସରକାର ଆରମ୍ଭରୁ ସୂଚାଇ ଆସୁଛନ୍ତି ଯେ ପୁରୁଣା ବ୍ୟବସ୍ଥାରୁ ମୁକ୍ତି ଦୀର୍ଘକାଳୀନ ଭାବରେ ଦୂର କରାଯାଇପାରେ । ଏହି କାରଣରୁ ପ୍ରତ୍ୟେକ ବଜେଟରେ ନୂଆ ଟିକସ ବ୍ୟବସ୍ଥାକୁ ଅଧିକ ଆକର୍ଷଣୀୟ କରାଯାଉଛି ।
ଏହା ବି ପଢନ୍ତୁ...ଅର୍ଥନୈତିକ ସର୍ବେକ୍ଷଣ ରିପୋର୍ଟ-୨୦୨୬ : ଧିମା ଅଭିବୃଦ୍ଧି ଆଶଙ୍କା, ରୋଜଗାରରେ ଆସିବ ସୁଧାର
ନୂତନ ଟିକସ ବ୍ୟବସ୍ଥାର ଲୋକପ୍ରିୟତା ବଢିଛି । ଇୟୁ ଇଣ୍ଡିଆର ଟ୍ୟାକ୍ସ ପାର୍ଟନର ସୁରଭି ମାରୱାହଙ୍କ ଅନୁସାରେ, ପ୍ରାୟ ୭୨% କରଦାତା ମୂଲ୍ୟାଙ୍କନ ବର୍ଷ ୨୦୨୪-୨୫ ରେ ନୂତନ ଟିକସ ବ୍ୟବସ୍ଥାକୁ ବାଛିଥିଲେ । ଗତ ଦୁଇଟି ବଜେଟରେ, ସରକାର ନୂତନ ବ୍ୟବସ୍ଥା ଅଧୀନରେ ବର୍ଦ୍ଧିତ ଛାଡ, ଅଧିକ ଟିକସମୁକ୍ତ ସୀମା ଏବଂ ମାନକ ରିହାତି ଭଳି ସୁବିଧା ପ୍ରଦାନ କରିଛନ୍ତି । ବିଶେଷଜ୍ଞଙ୍କ ଅନୁସାରେ ୨୦୨୫-୨୬ରେ ନୂଆ ବ୍ୟବସ୍ଥାକୁ ବାଛିଥିବା ଲୋକଙ୍କ ସଂଖ୍ୟା ଆହୁରି ବଢିବ।
ପୁରୁଣା ଟିକସ ବ୍ୟବସ୍ଥା ଶେଷ ହେବ କି ? ବିଶେଷଜ୍ଞ ବିଶ୍ୱାସ କରନ୍ତି ଯେ ସଞ୍ଚୟ ଏବଂ ଗୃହ ଋଣକୁ ପ୍ରୋତ୍ସାହିତ କରିବା ପାଇଁ ପୁରୁଣା ବ୍ୟବସ୍ଥା ଏବେ ବି ଆବଶ୍ୟକ । ତେଣୁ, ଏହାକୁ ତୁରନ୍ତ ଉଚ୍ଛେଦ କରିବା କଷ୍ଟକର । ତଥାପି, ସରକାର ଧୀରେ ଧୀରେ ଏହାକୁ ଅପ୍ରାସଙ୍ଗିକ କରିପାରନ୍ତି । କିଛି ବିଶେଷଜ୍ଞ କୁହନ୍ତି ଯେ ଦୁଇଟି ଟିକସ ବ୍ୟବସ୍ଥା ରହିବା ଦ୍ୱନ୍ଦ୍ୱ ସୃଷ୍ଟି କରେ ।
