ଭୁବନେଶ୍ଵର, ୨୮/୦୨ : ପେଟ ସମସ୍ୟା ପାଇଁ ସମସ୍ତେ ପସନ୍ଦ କରନ୍ତି ବିନା ତେଲ ମସଲାରେ ପ୍ରସ୍ତୁତ ଖାଦ୍ୟ। ସେଥିପାଇଁ ସକାଳୁ ସକାଳୁ ଗରମ ଗରମ ଚକୁଳି ହେଉ ଇଟିଲି ପ୍ରାୟ ସମସ୍ତଙ୍କର ପସନ୍ଦ। ହେଲେ ଆପଣ ଜାଣିଛନ୍ତି କି ? ଇଟିଲିକୁ ନେଇ ଏବେ ଆସିଛି ଚାଞ୍ଚଲ୍ୟକର ଖବର। ଇଟିଲି ଖାଇଲେ ହୋଇପାରେ ମାରାତ୍ମକ ରୋଗ କ୍ୟାନ୍ସର। କେବଳ ସେତିକି ନୁହେଁ ଶରୀରରେ ଟକ୍ସିନ୍ସର ମାତ୍ରା ବୃଦ୍ଧି ଯୋଗୁଁ ହୋଇପାରେ ହରମୋନ୍ ସମସ୍ୟା। ଯଦି ଆପଣ ଇଟିଲି ପ୍ରିୟ ହୋଇଥାନ୍ତି ତାହେଲେ ପଢନ୍ତୁ ଏହି ଖବର...
ସୂଚନାନୁଯାୟୀ, ବେଙ୍ଗାଲୁରୁର ବହୁ ସ୍ଥାନରେ ଇଟିଲି ତିଆରି ବେଳେ ପାରମ୍ପରିକ ସୂତା କପଡ଼ା ପରିବର୍ତ୍ତେ ପ୍ଲାଷ୍ଟିକ୍ ସିଟ୍ର ବ୍ୟବହାର ହେଉଛି। ଏହି ପ୍ଲାଷ୍ଟିକ୍ ଗରମ ହେବା ଯୋଗୁଁ ଏଥିରୁ ବିଷାକ୍ତ କେମିକାଲ୍ ନିର୍ଗତ ହେଉଛି। ଯାହା ମଣିଷ ଶରୀରରେ ମିଶି ମାରାତ୍ମକ ରୋଗ ସୃଷ୍ଟି କରୁଛି। ଏହି ପ୍ଲାଷ୍ଟିକରୁ 'ବିସଫେନଲ ଏ' ଭଳି କେମିକାଲ ନିର୍ଗତ ହେଉଛି। ଏହାଦ୍ଵାରା କ୍ୟାନ୍ସରର ରିସ୍କ ଆହୁରି ବଢି ଯାଉଛି। କେବଳ ସେତିକି ନୁହେଁ ଇଟିଲିକୁ ଧଳା ଏବଂ ଆକର୍ଷକ ଦେଖାଯିବା ପାଇଁ ଏଥିରେ ବ୍ଲିଚିଂ ପାଉଡର, ସିନ୍ଥେଟିକ ରଙ୍ଗ ଏବଂ କେମିକାଲ୍ସ ମିଶାଉଛନ୍ତି। ସେହିପରି ଆଉ କିଛି ଲାଭଖୋର୍ ବ୍ୟବସାୟୀ ଏବଂ ହୋଟେଲ୍ ଖରାପ କ୍ଵାଲିଟିର ଚାଉଳ ଏବଂ ବିରି ବ୍ୟବହାର କରୁଛନ୍ତି। ଯାହାକୁ ଖାଇବା ପରେ ବିଭିନ୍ନ ରୋଗ ସୃଷ୍ଟି ହେଉଛି।
ସୂଚନା ଥାଉକି, କର୍ଣ୍ଣାଟକର ବିଭିନ୍ନ ସ୍ଥାନରୁ ୨୫୧ ଇଟିଲିର ନମୁନା ସଂଗ୍ରହ କରାଯାଇଥିଲା । ତାକୁ ପରୀକ୍ଷା ନିମନ୍ତେ ପଠାଯାଇଥିଲା । ସେଥିରୁ ଅଧିକାଂଶ ଇଟିଲି ପ୍ରସ୍ତୁତକାରୀ ପ୍ଲାଷ୍ଟିକ ସାମଗ୍ରୀ ବ୍ୟବହାର କରୁଥିବା ଜଣାପଡିଛି । ଇଟିଲି ପ୍ରସ୍ତୁତି ସହ ଏହାକୁ ଘୋଡାଇବା ଓ ପରସିବା ଆଦି କାର୍ଯ୍ୟରେ ପଲିଥିନ ବ୍ୟବହାର କରାଯାଉଛି । ପ୍ଲାଷ୍ଟିକରେ କାର୍ସିନୋଜେନିକ ସାମଗ୍ରୀ ମହଜୁଦ ରହୁଥିବାରୁ ଇଟିଲିରେ ତାହା ମିଶିବାର ସମ୍ଭାବନା ରହିଛି। ଖାଦ୍ୟ ନିରାପତ୍ତା ବିଭାଗର ଏଭଳି ରିପୋର୍ଟ ପରେ କର୍ଣ୍ଣାଟକ ସରକାର ରାଜ୍ୟର ସମସ୍ତ ହୋଟେଲରେ ଇଡ୍ଲି ପ୍ରସ୍ତୁତି ବେଳେ ପ୍ଲାଷ୍ଟିକ ସାମଗ୍ରୀ ବ୍ୟବହାର ନ କରିବାକୁ ନିର୍ଦ୍ଦେଶ ଦେଇଛନ୍ତି। ପ୍ଲାଷ୍ଟିକ ବଦଳରେ କପଡା ବ୍ୟବହାର କରିବାକୁ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ଦିନେଶ ଗୁଣ୍ଡୁ ରାଓ କହିଛନ୍ତି। ଏହାକୁ ଅମାନ୍ୟ କରିବେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ୱାସ୍ଥ୍ୟମନ୍ତ୍ରୀ ସୂଚନା ଦେଇଛନ୍ତି।
ଏହି ଖବରଟିକୁ ପଢନ୍ତୁ-ଦିନକୁ ପରିବାରକୁ ୧୪୦ମିନିଟ୍ ଦେଉଛନ୍ତି ମହିଳା, ଜାଣନ୍ତୁ ପୁରୁଷଙ୍କ ତୁଳନାରେ କେତେ ଅଧିକ ?
