ଲସ୍ ଆଞ୍ଜେଲସ୍: ଲସ୍ ଆଞ୍ଜେଲସ୍ର ଇଷ୍ଟ ହଲିଉଡ଼ସ୍ଥିତ ସାଣ୍ଟା ମୋନିକା ବୁଲେଭାର୍ଡରେ ଶନିବାର ସଖାଳ ସମୟରେ ଏକ ଗାଡ଼ି ଭିଡ଼ ଭିତରକୁ ଧଶେଇ ପଶିବା କାରଣରୁ ୨୦ରୁ ଅଧିକ ଲୋକ ଆହତ ହୋଇଛନ୍ତି। ଲସ୍ ଆଞ୍ଜେଲସ୍ ଅଗ୍ନିଶମ ବିଭାଗ (LAFD) ଅନୁସାରେ, ଏହି ଦୁର୍ଘଟଣାରେ ପାଞ୍ଚ ଜଣଙ୍କ ଅବସ୍ଥା ଗୁରୁତର ଥିବା ବେଳେ ୮ରୁ ୧୦ ଜଣ ଗମ୍ଭୀର ଭାବେ ଆହତ ହୋଇଛନ୍ତି ଏବଂ ୧୦ରୁ ୧୫ ଜଣଙ୍କ ଅବସ୍ଥା ସ୍ଥିର ରହିଛି। ଏହି ଘଟଣା ସ୍ଥାନୀୟ ସମୟ ପ୍ରାୟ ରାତି ୨ଟା ସମୟରେ ଘଟିଥିଲା।
ଅଗ୍ନିଶମ ବିଭାଗ ଜଣାଇଛି ଯେ, ଏକ ଅଜଣା ଗାଡ଼ି ରାସ୍ତାରେ ଥିବା ଭିଡ଼ ଭିତରକୁ ଧଶେଇ ପଶିଥିଲା। ଘଟଣାସ୍ଥଳରେ ଦମକଳ, ଆମ୍ବୁଲାନ୍ସ ଏବଂ ବିଶେଷ ଉଦ୍ଧାରକାରୀ ଦଳ ପହଞ୍ଚି ଆହତମାନଙ୍କୁ ନିକଟସ୍ଥ ହସ୍ପିଟାଲକୁ ନେଇଥିଲେ। ସୋସିଆଲ ମିଡିଆରେ ପ୍ରକାଶିତ ଫୁଟେଜରେ ଦେଖାଯାଇଛି ଯେ, ଏକ ଧୂସର ରଙ୍ଗର ଗାଡ଼ି ସାଇଡ଼ୱାକରେ ଥିବା ଭଗ୍ନାବଶେଷ ମଧ୍ୟରେ ଦେଖାଯାଉଛି। ଏହା ସହିତ ଅନେକ ଲୋକ ଗୁରୁତର ଅବସ୍ଥାରେ ରାସ୍ତାରେ ଏଣେତେଣେ ପଡ଼ିଥିବା ଦୃଶ୍ୟ ମଧ୍ୟ ଦେଖାଦେଇଛି।
ଏକ ସମ୍ଭାବ୍ୟ ତଦନ୍ତରୁ ଜଣାପଡ଼ିଛି ଯେ, ଚାଳକ ଜଣକ କାର ଉପରୁ ନିୟନ୍ତ୍ରଣ ହରାଇ ଥାଇପାରନ୍ତି। ଯାହା ଏହି ଦୁର୍ଘଟଣାର କାରଣ ହୋଇପାରେ। ତେବେ ଘଟଣାର ପ୍ରକୃତ କାରଣ ଏବଂ ଚାଳକଙ୍କ ବିଷୟରେ ସ୍ପଷ୍ଟ ତଥ୍ୟ ଏପର୍ଯ୍ୟନ୍ତ ମିଳିପାରିନାହିଁ। ତେବେ କେତେକ ସୋସିଆଲ ମିଡିଆ ୟୁଜର୍ସ ଦୁର୍ଘଟଣା ପୂର୍ବରୁ ସେଠାରେ ଗୁଳିଚାଳନା ହୋଇଥିବା ନେଇ ଦାବି କରିଛନ୍ତି।
ପୁଲିସ ଏବଂ ଅଗ୍ନିଶମ ବିଭାଗ ଘଟଣାର ତଦନ୍ତ ଜାରି ରଖିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି କରିଛି ଏବଂ ତେବେ ବହୁ ଜଲଦି ଏନେଇ ଅଧିକ ତଥ୍ୟ ମିଳିବ ବୋଲି ଆଶା କରାଯାଉଇଛି।
