ବ୍ରହ୍ମବରଦା,୨୮/୭(ଆପ୍ର): ଯାଜପୁର ଜିଲା ବାଲିଚନ୍ଦ୍ରପୁର ଥାନା ଅନ୍ତର୍ଗତ କଦମପାଳ ଗ୍ରାମରେ ଅଘଟଣ । ବାଇକକୁ ଧକ୍କା ଦେଲା କାର । ଫଳରେ ବାଇକ ଚାଳକ ରାସ୍ତା କଡରେ ଥିବା ଏକ ଅଳିଆ କୁଣ୍ଡରେ ପିଟି ହୋଇ ଗୁରୁତର ହୋଇ ପଡିଥିଲେ । ତାଙ୍କୁ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟକୁ ନେଇଥିଲେ । ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ସୂଚନା ମୁତାବକ, ମୃତ ବାଇକ ଚାଳକ ଜଣକ ହେଲେ ବାଲିଚନ୍ଦ୍ରପୁର ଥାନା ଅନ୍ତର୍ଗତ ନୋଷ୍ଠା ଗ୍ରାମର ସାଧୁ ଚରଣ ମହାନ୍ତିଙ୍କ ବଡ ପୁଅ ସଂଜୟ(୨୫) ବୋଲି ଜଣାପଡିଛି । ବାଲିଚନ୍ଦ୍ରପୁର ପୋଲିସ ମୃତ ଦେହ ଜବତ କରିବା ସହ ଦୁର୍ଘଟଣା ଘଟାଇଥିବା କାରକୁ ଜବତ କରିବା ପାଇଁ ତଦନ୍ତ ଜାରି ରଖିଛି । ଏକ ଅପମୃତ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ଧର୍ମଶାଳାକୁ ପଠାଇ ଦିଆଯାଇଛି ।
ସୂଚନା ମୁତାବକ, ରବିବାର ରାତି ପ୍ରାୟ ୯ଟା ୪୦ ମିନିଟ ସମୟରେ ନୋଷ୍ଠା ଗ୍ରାମର ସାଧୁ ଚରଣ ମହାନ୍ତିଙ୍କ ବଡପୁଅ ସଂଜୟ ଏକ ବାଇକ ଯୋଗେ ମାମୁଁ ଘର କଦମପାଳରୁ ଘରକୁ ଫେରୁଥିବା ସମୟରେ କଦମପାଳ ହାଟ ପଡିଆ ନିକଟରେ ତାଙ୍କ ପଛ ପଟକୁ ଏକ ମାରୁତି ସୁଇଫ୍ଟ କାର ଧକ୍କା ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲା । ସ୍ଥାନୀୟ ଲୋକେ ତାକୁ ଗୁରୁତର ଅବସ୍ଥାରେ ଉଦ୍ଧାର କରି ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଂଚଳରେ ଶୋକର ଛାୟା ଖେଳି ଯାଇଛି ।
