ନୂଆଦିଲ୍ଲୀ,୦୮/୧୧:ଭାରତ ହେଭି ଇଲେକ୍ଟ୍ରିକାଲ୍ସ ଲିମିଟେଡର ପୂର୍ବତନ ଅଧିକାରୀଙ୍କ ବିରୋଧରେ ଦୁର୍ନୀତି ମାମଲା ରୁଜୁ । ଛଅଟି ସ୍ଥାନରେ ଚଢାଉ କଲା ସିବିଆଇ। ତେଲେଙ୍ଗାନାର କୋଠାଗୁଡେମରେ BHELର ପୂର୍ବତନ ବରିଷ୍ଠ ଆକାଉଣ୍ଟସ୍ ଅଧିକାରୀ ଜି. ଶିବ ନାଗେଶ୍ୱର ରାଓ ଏବଂ ତିନି ଜଣ ବ୍ୟକ୍ତିଗତ ବ୍ୟକ୍ତିଙ୍କ ବିରୋଧରେ ଏହି ମାମଲା ରୁଜୁ ହୋଇଛି। ତେବେ କୋଠାଗୁଡେମ ତାପଜ ବିଦ୍ୟୁତ ପ୍ରକଳ୍ପରେ ଦେୟରେ ଅନିୟମିତତା ଅଭିଯୋଗ କରି ଏହି ଅଭିଯୋଗ ଦାଖଲ କରାଯାଇଥିବା ଜଣାପଡିଛି।
ତଦନ୍ତରୁ ଜଣାପଡିଛି ଯେ, ଅଭିଯୁକ୍ତ ଅଧିକାରୀ ଜାଲିଆତି କରି ତିନୋଟି ଘରୋଇ କମ୍ପାନୀରୁ ଅନ୍ୟ କଣ୍ଟ୍ରାକ୍ଟରଙ୍କୁ ଜିଏସଟି ଇନପୁଟ୍ କ୍ରେଡିଟ୍ ହସ୍ତାନ୍ତର କରିଥିଲେ ଏବଂ ପାଣ୍ଠିର ଅପବ୍ୟବହାର କରିଥିଲେ। ତେଲେଙ୍ଗାନା ଏବଂ ଆନ୍ଧ୍ର ପ୍ରଦେଶର ଛଅଟି ସ୍ଥାନରେ ସିବିଆଇ ତଦନ୍ତ କରିଥିଲା। ତଦନ୍ତ ସମୟରେ ଅନେକ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ ଏବଂ ପ୍ରମାଣ ପତ୍ର ଜବତ କରାଯାଇଛି। ଏହି ଠକେଇରେ ଆଉ କିଏ ରହିଛନ୍ତି ଏନେଇ ମଧ୍ୟ ତଦନ୍ତ ଜାରି ରହିଛି। ଗତ ମାସର ପ୍ରାରମ୍ଭରେ, ସିବିଆଇ ଭାରତ ହେଭି ଇଲେକ୍ଟ୍ରିକାଲ୍ସ ଲିମିଟେଡ୍ , ନ୍ୟାସନାଲ ଥର୍ମାଲ୍ ପାୱାର କର୍ପୋରେସନ , ଏବଂ ଆଉ ଦୁଇଟି ଘରୋଇ କମ୍ପାନୀ - ବ୍ରିଜ୍ ଆଣ୍ଡ୍ ରୁଫ୍ କମ୍ପାନୀ ଲିମିଟେଡ୍ ଏବଂ ପାୱାର ଇନଫ୍ରେମେକ୍ ପ୍ରାଇଭେଟ୍ ଲିମିଟେଡ୍ - ର ଅଧିକାରୀଙ୍କ ବିରୁଦ୍ଧରେ ଜାଲିଆତି ଏବଂ ନକଲି ବିଲ୍ ଦାଖଲ କରିବା ଅଭିଯୋଗରେ ଏକ ମାମଲା ରୁଜୁ କରିଥିଲା। ଯାହା ଫଳରେ BHEL କୁ ୩୫ କୋଟିର କ୍ଷତି ହୋଇଥିଲା। ଏହି ମାମଲା ଅକ୍ଟୋବର ୧୪ ତାରିଖରେ ଦାୟର କରାଯାଇଥିଲା।
