ନୂଆଦିଲ୍ଲୀ: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ପରୀକ୍ଷାକୁ ନେଇ ଏକ ବଡ଼ ଘୋଷଣା କରିଛି । ମାର୍ଚ୍ଚ ୧୫ରେ ହେବାକୁ ଥିବା ପରୀକ୍ଷା ସମ୍ପର୍କରେ ଏକ ବଡ଼ ଅପଡେଟ୍ ଦେଇଛି । ଛାତ୍ରଛାତ୍ରୀମାନେ ଏହି ଅପଡେଟ୍କୁ ସିବିଏସଇ ପକ୍ଷରୁ ହୋଲି ଉପହାର ବୋଲି ବିବେଚନା କରୁଛନ୍ତି । ପ୍ରକୃତରେ ହୋଲି ପରେ ମାର୍ଚ୍ଚ ୧୫ ରେ ହେବାକୁ ଥିବା ପରୀକ୍ଷାକୁ ନେଇ ଚିନ୍ତିତ ଥିବା ଛାତ୍ରଛାତ୍ରୀମାନଙ୍କୁ CBSE ଏକ ବଡ଼ ଆଶ୍ୱସ୍ତି ଦେଇଛି । ବୋର୍ଡ ଏବେ ଏକ ସ୍ୱତନ୍ତ୍ର ପରୀକ୍ଷା କରିବାକୁ ଘୋଷଣା କରିଛି । ଏହାର ତାରିଖ ପରେ ଘୋଷଣା କରାଯିବ ।
ସିବିଏସଇ ମାର୍ଚ୍ଚ ୧୫ ତାରିଖରେ ଦ୍ୱାଦଶ ଶ୍ରେଣୀ ହିନ୍ଦୀ ବୋର୍ଡ ପରୀକ୍ଷା କରିବାର ଥିଲା । ଯେହେତୁ ହୋଲି ମାର୍ଚ୍ଚ ୧୪ରେ ପଡୁଛି, କିଛି ଛାତ୍ର ଏବଂ ଅଭିଭାବକ ଏହାକୁ ନେଇ ଚିନ୍ତିତ ଥିଲେ । ଦେଶର ଅନେକ ସ୍ଥାନରେ ମାର୍ଚ୍ଚ ୧୫ ରେ ମଧ୍ୟ ହୋଲି ପାଳନ କରାଯିବ । ଏହାକୁ ଦୃଷ୍ଟିରେ ରଖି CBSE ଏକ ବିଜ୍ଞପ୍ତି ଜାରି କରି ସ୍ପଷ୍ଟ କରିଛି ଯେ, ପରୀକ୍ଷା ମାର୍ଚ୍ଚ ୧୫ରେ ହିଁ ହେବ । କିନ୍ତୁ ଯେଉଁ ଛାତ୍ରଛାତ୍ରୀମାନେ କଠିନ ପରିସ୍ଥିତି ଯୋଗୁଁ ପରୀକ୍ଷା ଦେଇପାରିବେ ନାହିଁ ସେମାନଙ୍କୁ ପୁଣି ଥରେ ପରୀକ୍ଷା ଦେବାର ସୁଯୋଗ ଦିଆଯିବ ।
ସିବିଏସଇ ବୋର୍ଡ ସ୍ପଷ୍ଟ କରିଛି ଯେ, ଛାତ୍ରଛାତ୍ରୀମାନେ ମାର୍ଚ୍ଚ ୧୫ରେ ପରୀକ୍ଷା ବିଷୟରେ ଚିନ୍ତା କରିବା ଆବଶ୍ୟକ ନାହିଁ । ସେମାନଙ୍କର ପରୀକ୍ଷା ସ୍ୱତନ୍ତ୍ର ଭାବରେ କରାଯିବ । ବୋର୍ଡର ନୀତି ଅନୁଯାୟୀ, ପ୍ରତିବର୍ଷ ଜାତୀୟ ଏବଂ ଅନ୍ତର୍ଜାତୀୟ ପ୍ରତିଯୋଗିତାରେ ଅଂଶଗ୍ରହଣ କରୁଥିବା ଖେଳାଳିମାନଙ୍କ ପାଇଁ ଏକ ସ୍ୱତନ୍ତ୍ର ପରୀକ୍ଷା କରାଯାଏ । ସେହିଭଳି ଚଳିତ ବର୍ଷ ହୋଲି ପାଇଁ ଏହି ସ୍ବତନ୍ତ୍ର ପରୀକ୍ଷା ମଡେଲ୍ ଲାଗୁ କରିବ ସିବିଏସଇ ।
ବୋର୍ଡର ଏହି ନିଷ୍ପତ୍ତି କେବଳ ଛାତ୍ରଛାତ୍ରୀମାନଙ୍କୁ ଆଶ୍ୱସ୍ତି ଦେଇନାହିଁ ବରଂ ସେମାନଙ୍କ ଅଭିଭାବକଙ୍କୁ ଚିନ୍ତା ମୁକ୍ତ କରିଛି । ଏହା ବ୍ୟତୀତ ହୋଲିରେ ପରୀକ୍ଷା ପାଇଁ କିପରି ପ୍ରସ୍ତୁତି କରିବେ ସେ ବିଷୟରେ ମଧ୍ୟ ଚାପ ଥିଲା । ପର୍ବ ସମୟରେ ପରୀକ୍ଷା ପାଇଁ ପ୍ରସ୍ତୁତି କରିବା ମଧ୍ୟ ଏକ ବଡ଼ ଚ୍ୟାଲେଞ୍ଜ ଥିଲା। ଏବେ ପିତାମାତାଙ୍କ ପାଖରେ ଏବଂ ପିଲାମାନଙ୍କ ପାଖରେ ବିକଳ୍ପ ରହିଛି । ତେବେ ବୋର୍ଡର ୱେବସାଇଟରେ ସ୍ୱତନ୍ତ୍ର ପରୀକ୍ଷା ତାରିଖ ସମ୍ପର୍କରେ ସୂଚନା ଦିଆଯିବ ।
