କୋରାପୁଟ,୨/୫ : ଦରମା ଓ ବ୍ୟକ୍ତିଗତ ଫାଇଲ ଖୋଲିବାକୁ ନବ ନିଯୁକ୍ତ ଅଙ୍ଗନବାଡ଼ି ସହାୟିକାଙ୍କଠାରୁ ଲାଞ୍ଚ ଟଙ୍କା ନେବାବେଳେ ଦଶମନ୍ତପୁର ବ୍ଲକ ମହିଳା ଓ ଶିଶୁ ବିକାଶ ପ୍ରକଳ୍ପ ଅଧିକାରୀ ଶକୁନ୍ତଳା ଦାସ ଓ ମଧ୍ୟସ୍ଥି ଆଡ଼ମୁଣ୍ଡା ଗ୍ରାମର ଅଙ୍ଗନବାଡ଼ି କର୍ମୀ ମିନତି ଖୋସଲା ଭିଜିଲାନ୍ସ ଦ୍ଵାରା ଗିରଫ ହୋଇଛନ୍ତି । ଶୁକ୍ରବାର ଅପରାହ୍ନରେ ଦଶମନ୍ତପୁର ଅଫିସରେ ଲାଞ୍ଚ ଟଙ୍କା ନେବାବେଳେ ଭିଜିଲାନ୍ସ ଉଭୟଙ୍କୁ ଗିରଫ କରିଛି ।
ସୂଚନା ଅନୁସାରେ ଅଭିଯୋଗ କାରିଣୀ ଜଣଙ୍କ ଦେଢ ମାସ ପୁର୍ବରୁ ଦଶମନ୍ତପୁର ବ୍ଲକର ଏକ ଅଙ୍ଗନବାଡ଼ି କେନ୍ଦ୍ରରେ ସହାୟିକା ଭାବେ ନିଯୁକ୍ତି ପାଇଥିଲେ । କିଛି ଦିନ ପୁର୍ବରୁ ସେ ସିଡିପିଓଙ୍କୁ ଭେଟି ତାଙ୍କର ବ୍ୟକ୍ତିଗତ ଫାଇଲ ଖୋଲିବା ଓ ଦରମା ଦେବାକୁ ଅନୁରୋଧ କରିଥିଲେ । ତେବେ ଉକ୍ତ କାମ ନିମନ୍ତେ ୧୦ହଜାର ଟଙ୍କା ଦାବି କରି ଆଡ଼ମୁଣ୍ଡା ଗ୍ରାମର ଅଙ୍ଗନବାଡ଼ି କର୍ମୀ ମିନତି ଖୋସଲାଙ୍କ ଜରିଆରେ ଦେବାକୁ କହିଥିଲେ । ଏହାପରେ ଅଭିଯୋଗକାରିଣୀ ଭିଜିଲାନ୍ସର ଦ୍ବାରସ୍ଥ ହୋଇଥିଲେ ଶୁକ୍ରବାର ଅପରାହ୍ନରେ ଅଙ୍ଗନବାଡ଼ି କର୍ମୀ ମିନତି ଖୋସଲାଙ୍କ ମାଧ୍ୟମରେ ସିଡିପିଓ ଶ୍ରୀମତି ଦାସ ଲାଞ୍ଚ ଟଙ୍କା ନେବାବେଳେ ଭିଜିଲାନ୍ସ ମାଡ଼ି ବସିଥିଲା। ଉଭୟଙ୍କ ବିରୁଦ୍ଧରେ ଭିଜିଲାନ୍ସ ବିଭାଗ ମାମଲା ରୁଜୁ କରି ସେମାନଙ୍କୁ ଗିରଫ କରିଥିବାବେଳେ ଶ୍ରୀମତି ଦାସଙ୍କ ତିନୋଟି ଓ ଶ୍ରୀମତି ଖୋସଲାଙ୍କ ଗୋଟିଏ ସ୍ଥାନରେ ତଲାସୀ ଜାରି ରଖିଛି ।
