ନୂଆଦିଲ୍ଲୀ: ଚଣ୍ଡିଗଡରେ ଆନ୍ଦୋଳନ କରୁଥିବା କୃଷକଙ୍କ ସହ ଫେବୃଆରୀ ୧୪ରେ ବୈଠକରେ କରିବେ କେନ୍ଦ୍ର ସରକାର । ଏନେଇ କେନ୍ଦ୍ର କୃଷି ମନ୍ତ୍ରାଳୟର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ଆମରଣ ଅନଶନ କରୁଥିବା ଚାଷୀ ନେତା ଜଗଜୀତ ସିଂହ ଦଲେଓ୍ବାଲ ଏବଂ ମିଳିତ କୃଷକ ମୋର୍ଚ୍ଚାର ପ୍ରତିନିଧିଙ୍କୁ କେନ୍ଦ୍ର କୃଷି ସଚିବ ପ୍ରିୟ ରଞ୍ଜନ ସାକ୍ଷାତ କରିବା ପରେ ଏହି ନିଷ୍ପତ୍ତି ହୋଇଛି ।
ସେପଟେ ୫୪ ଦିନ ହେଲା ଆମରଣ ଅନଶନରେ ବସିଥିବା ଚାଷୀ ନେତା ଜଗଜୀତ ଦଲେଓ୍ବାଲ ମେଡିକାଲ୍ ସହାୟତା ନେବାକୁ ରାଜି ହୋଇଛନ୍ତି ଏବଂ ତାଙ୍କର ଚିକିତ୍ସା ଆରମ୍ଭ ହୋଇଛି । ପ୍ରିୟ ରଞ୍ଜନ କହିଛନ୍ତି, ‘ଆମେ ତାଙ୍କର ସ୍ବାସ୍ଥ୍ୟବସ୍ଥା ସଂପର୍କରେ ପଚାରି ବୁଝିଛୁ ଏବଂ କୃଷକ ସଂଗଠନର ପ୍ରତିନିଧିଙ୍କ ସହ ଆଲୋଚନା କରିଛୁ । ତାଙ୍କୁ ଅନଶନ ଭଙ୍ଗ କରିବାକୁ ଅନୁରୋଧ କରାଯାଇଛି ।’ ଖନୌରି ସୀମାରେ ନଭେମ୍ବର ୨୬ରୁ ଦଲେଓ୍ବାଲ ଆମରଣ ଅନଶନରେ ବସିଛନ୍ତି । ଦଲେଓ୍ବାଲଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିଥିବା ବେଳେ ତାଙ୍କ ଶରୀରର ଓଜନ ୨୦ କେଜି ହ୍ରାସ ପାଇଛି ।
ସେ ଏବେ ସୁଦ୍ଧା ମେଡିକାଲ ସହାୟତା ନେଇ ନାହାନ୍ତି । ଗତବର୍ଷ ଫେବୃଆରୀ ୮, ୧୨,୧୫ ଏବଂ ୧୮ରେ ସରକାର ଏବଂ କୃଷକଙ୍କ ମଧ୍ୟ ଆଲୋଚନା ହୋଇଥିଲା କିନ୍ତୁ ନିଷ୍କର୍ସ ବାହାରି ପାରିନଥିଲା । ଫସଲର ଏମଏସ୍ପି ପାଇଁ ଆଇନଗତ ଗ୍ୟାରେଣ୍ଟି ଦାବି କରିଆସିଛନ୍ତି କୃଷକ । ଜାନୁଆରୀ ୧୮ (ଶିନାବର) ପାଖରୁ ଖନୌରି ସୀମାରେ ଅନ୍ୟ ୧୦ କୃଷକ ଅନଶନ ଆରମ୍ଭ କରିଛନ୍ତି । ଏହା ସହ ଅନଶନରେ ବସିଥିବା କୃଷକଙ୍କ ସଂଖ୍ୟା ୧୨୧କୁ ବୃଦ୍ଧି ପାଇଛି । ସରକାରଙ୍କ ପାଖରୁ ମିଳିଥିବା ତାଜା ପ୍ରସ୍ତାବ ଉପରେ ଆଲୋଚନା କରାଯିବ ବୋଲି କୃଷକ ସଂଗଠନ ପକ୍ଷରୁ କୁହାଯାଇଛି ।
