ପାରଳାଖେମୁଣ୍ଡି/ଗୋଷାଣି ୧୯/୫: ଗଜପତି ଜିଲ୍ଲାରେ ଦୀର୍ଘ ଦିନ ଧରି ଚୋର ପୋଲିସର ଲୁଚକାଳି ଖେଳ ପରେ ଏବେ ପାରଳା ପୁଲିସକୁ ମିଳିଛି ବଡ ସଫଳତା। ଏକ ଚେନ୍ ଲୁଟେରାକୁ କାବୁ କରିଛି ପୋଲିସ । ପୃଥକ ପୃଥକ ୫ଟି ମାମଲାରେ ସଂପୃକ୍ତ ଥିବା ଏହି ଅଭିଯୁକ୍ତକୁ ଗିରଫ କରିଛି ପୋଲିସ। ପୋଲିସ ପଡୋଶୀ ଆନ୍ଧ୍ରପ୍ରଦେଶର ମଞ୍ଜୁଷା ଥାନା ଅନ୍ତର୍ଗତ ସୁଣ୍ଡିପୁଡି ଗ୍ରାମର ୨୮ ବର୍ଷିୟ ଉପଲୁରୀ ନବିନ କୁମାରକୁ ଗିରଫ କରି କୋର୍ଟ ଚାଲାଣ କରିଥିବା ଆଜି ସମ୍ବାଦିକ ସମ୍ମିଳନୀରେ ସୂଚନା ଦେଇଛି । ଅଭିଯୁକ୍ତଙ୍କ ଠାରୁ ସମସ୍ତ ମାମଲାରେ ଚୋରି ହୋଇଥିବା ଚେନ୍ ଓ ସୁନା ଅଳଙ୍କାର ଉଦ୍ଧାର କରାଯାଇଛି।
ନବୀନ ନିଛାଟିଆ ରାସ୍ତାରେ ବୟସ୍କ ଦମ୍ପତି ଓ ମହିଳାମାନଙ୍କୁ ଜଗି ସମୟ ସୁଯୋଗ ଦେଖି ଅଳଙ୍କାର ଝାମ୍ପି କ୍ଷିପ୍ର ଗତିରେ ଘଟଣାସ୍ଥଳରୁ ଚାଲିଯାଉଥିବା ସ୍ବୀକାର କରିଛି । ଏଥିସହ ନିଜ ଭଉଣୀ ଘରେ ସମସ୍ତ ଚୋରି ଜିନିଷ ରଖିଥିବା ସେ ପ୍ରକାଶ କରିଥିବା ପୁଲିସ କହିଛି । ସବୁ ଅଳଙ୍କାର ଜବତ କରାଯାଇଛି ଏବଂ ଭଉଣୀ ଏଥିରେ ସାମିଲ ନଥିବା ସାମ୍ବାଦିକ ସମ୍ମିଳନୀରେ ଆରକ୍ଷୀ ଅଧିକ୍ଷକ ଜତିନ୍ଦ୍ର ପଣ୍ଡା କହିଛନ୍ତି । ପାରଳାଖେମୁଣ୍ଡି ଆଦର୍ଶ ଥାନା ଅଧିକାରୀ ପ୍ରଶାନ୍ତ ଭୂପତି, ଗୁରାଣ୍ଡି ଥାନା ଅଧିକାରୀ ଓଁ ନାରାୟଣ ପାତ୍ର, ଉପଖଣ୍ଡ ଆରକ୍ଷୀ ଅଧିକ୍ଷକ ମାଧବାନନ୍ଦ ନାୟକ ପ୍ରମୁଖ ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିଲେ।
