ଦୁବାଇ, ୦୮/୦୩: ଆସନ୍ତା ରବିବାର ଦିନ ଚଳିତ ଚାମ୍ପିଅନ୍ସ ଟ୍ରଫିର ଫାଇନାଲ୍ ମ୍ୟାଚ୍ ଖେଳାଯିବ। ଉଭୟ ଭାରତ ଓ ନ୍ୟୁଜିଲାଣ୍ଡ ଇତି ମଧ୍ୟରେ ଟାଇଟଲ ଲଢ଼େଇ ପାଇଁ ପ୍ରସ୍ତୁତି ଚଳାଇଛନ୍ତି । ଫାଇନାଲ୍ ପୂର୍ବରୁ ଉଭୟ ଦଳ ଲିଗ୍ ରାଉଣ୍ଡ୍ରେ ପରସ୍ପରକୁ ଭେଟି ସାରିଛନ୍ତି । ତେଣୁ ପରସ୍ପର ଶକ୍ତି ଓ ଦୁର୍ବଳତା ସହ ଉଭୟ ଦଳ ପରିଚିତ । ଫାଇନାଲ୍ ମୁକାବିଲା ପୂର୍ବରୁ ଉଭୟ ଦଳ ସମସ୍ତ ତ୍ରୁଟି ସୁଧାରିବା ଉପରେ ଗୁରୁତ୍ୱ ଦେଉଛନ୍ତି ।
ଲିଗ୍ ମ୍ୟାଚ୍ରେ ଭାରତ ଉକ୍ତ ମ୍ୟାଚ୍ ଜିତିଥିଲେ ହେଁ ଫାଇନାଲ୍ରେ ନ୍ୟୁଜିଲାଣ୍ଡକୁ ହରାଇବା ଏତେ ସହଜ ହେବ ନାହିଁ । ଲିଗ୍ ମ୍ୟାଚ୍ ଜରିଆରେ କିୱି ଦଳ ଦୁବାଇର ପିଚ୍ ପରଖି ସାରିଛି । ଲିଗ୍ ଓ ସେମି ଫାଇନାଲ୍ ରାଉଣ୍ଡର ପ୍ରଦର୍ଶନକୁ ଦେଖିଲେ ନ୍ୟୁଜିଲାଣ୍ଡ ସବୁଠୁ ଶକ୍ତିଶାଳୀ ମନେ ହେଉଛି । କାରଣ ପାକିସ୍ତାନରୁ ଦୁବାଇ ଓ ଦୁବାଇରୁ ପାକିସ୍ତାନ ଯାତ୍ରା ସତ୍ତେ୍ୱ ନ୍ୟୁଜିଲାଣ୍ଡ ସବୁ କ୍ଲାନ୍ତିକୁ ପଛରେ ପକାଇ ଶ୍ରେଷ୍ଠ ପ୍ରଦର୍ଶନ କରିଛି । ଭାରତ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ କେବଳ ଗୋଟିଏ ହୋଟେଲରେ ଅବସ୍ଥାନ କରିବା ସହ ଯାତ୍ରା କ୍ଲାନ୍ତିରୁ ଦୂରେଇ ରହି ଗୋଟିଏ ଗ୍ରାଉଣ୍ଡ୍ରେ ସମସ୍ତ ମ୍ୟାଚ୍ ଖେଳିଛି ।
ଲିଗ୍ ରାଉଣ୍ଡ୍ରେ ମଧ୍ୟ ଭାରତକୁ କଡ଼ା ଟକ୍କର ଦେଇଥିଲା ନ୍ୟୁଜିଲାଣ୍ଡ । ଭାରତକୁ ମାତ୍ର ୨୪୯ ରନ୍ ମଧ୍ୟରେ ସୀମିତ ରଖିବା ବଡ଼ ସଫଳତା କହିଲେ ଭୁଲ ହେବ ନାହିଁ । ଜବାବରେ କେନ ୱିଲିୟମସନ ଦମଦାର ବ୍ୟାଟିଂ କରି ବିଜୟ ଆଶା ଉଜ୍ଜୀବିତ ରଖିଥିଲେ । କେବଳ ବରୁଣ ଚକ୍ରବର୍ତ୍ତୀଙ୍କ ଯାଦୁକରୀ ସ୍ପିନ୍ ବୋଲିଂର ମୁକାବିଲା କରି ନପାରି ନ୍ୟୁଜିଲାଣ୍ଡ ଲୟ ହରାଇ ପରାଜିତ ହୋଇଥିଲା । ୱିଲିୟମସନ କ୍ରିଜରେ ଥିବା ପର୍ଯ୍ୟନ୍ତ ନ୍ୟୁଜିଲାଣ୍ଡ ନିୟନ୍ତ୍ରଣରେ ମ୍ୟାଚ୍ ରହିଥିଲା ।
ବିଜୟ ସତ୍ତେ୍ୱ ଲିଗ୍ ମ୍ୟାଚ୍ରୁ ଭାରତକୁ ବଡ଼ ଶିକ୍ଷା ମିଳିଛି । ନ୍ୟୁଜିଲାଣ୍ଡକୁ ହାଲକା ଭାବେ ନେବା ଭାରି ପଡ଼ିବ । ପୂର୍ବ ରେକର୍ଡ ମଧ୍ୟ ନ୍ୟୁଜିଲାଣ୍ଡ ପକ୍ଷରେ ରହିଛି । ୨୦୦୦ ମସିହାରେ ଅନୁଷ୍ଠିତ ଚାମ୍ପିଅନ୍ସ ଟ୍ରଫି ଫାଇନାଲ୍ରେ ଭାରତକୁ ହରାଇ ନ୍ୟୁଜିଲାଣ୍ଡ ଚାମ୍ପିଅନ୍ ହୋଇଥିଲା । ସେତେବେଳେ ଏହି ଟୁର୍ଣ୍ଣାମେଣ୍ଟର ନାମ ଥିଲା ଆଇସିସି ନକ୍ ଆଉଟ୍ । ଏହାପରେ ଭାରତ ୨୦୦୨ ଓ ୨୦୧୩ରେ ୨ଥର ଚାମ୍ପିଅନ୍ ହୋଇଛି । ମାତ୍ର ନ୍ୟୁଜିଲାଣ୍ଡ ବିପକ୍ଷ ପରାଜୟକୁ ଭୁଲି ନାହିଁ । ୨୫ ବର୍ଷ ପରେ ପ୍ରତିଶୋଧ ନେବାର ସମୟ ଆସିଛି ।
କ୍ରିକେଟ୍ ବିଶେଷଜ୍ଞଙ୍କ ମତ ଅନୁଯାୟୀ ଫାଇନାଲ୍ରେ ନ୍ୟୁଜିଲାଣ୍ଡକୁ ହରାଇବାକୁ ହେଲେ ରୋହିତ ବାହିନୀକୁ ୩ଜଣ ଖେଳାଳିଙ୍କ ପ୍ରତି ସତର୍କ ରହିବାକୁ ହେବ । ଏହି ୩ ଖେଳାଳି ହେଲେ ମିଚେଲ ସାଣ୍ଟନର, ରଚିନ ରବିନ୍ଦ୍ର ଓ କେନ ୱିଲିୟମସନ ।
ଅଧିନାୟକ ତଥା ବାମ ହାତି ସ୍ପିନର ସାଣ୍ଟନର ଭାରତ ବିପକ୍ଷରେ ସର୍ବଦା ଚମତ୍କାର ପ୍ରଦର୍ଶନ କରୁଛନ୍ତି । ଚାମ୍ପିଅନ୍ସ ଟ୍ରଫିରେ ମଧ୍ୟ ପ୍ରଦର୍ଶନ ଭଲ ରହିଛି । ଦୁବାଇ ବ୍ୟତୀତ ପାକିସ୍ତାନର ୩ଟି ଯାକ ଗ୍ରାଉଣ୍ଡ୍ରେ ମଧ୍ୟ ସାଣ୍ଟନର ଶୃଙ୍ଖଳିତ ବୋଲିଂ କରିଥିଲେ । ମଧ୍ୟ ଓଭର ଗୁଡ଼ିକରେ ପ୍ରତିପକ୍ଷ ବ୍ୟାଟରଙ୍କୁ ବାନ୍ଧି ରଖିବାର କ୍ଷମତା ତାଙ୍କ ନିକଟରେ ରହିଛି । ସେମି ଫାଇନାଲ୍ ମୁକାବିଲାରେ ଗଦ୍ଦାଫି ଷ୍ଟାଡ଼ିୟମ୍ର ବ୍ୟାଟିଂ ସ୍ୱର୍ଗ ପିଚ୍ରେ ମଧ୍ୟ ସେ ୩ଟି ୱିକେଟ୍ ନେଇ ଦକ୍ଷିଣ ଆଫ୍ରିକାର ମଧ୍ୟ ଭାଗ ଧ୍ୱଂସ କରିଥିଲେ । ଭାରତୀୟ ଦଳରେ କେବଳ ୨ଜଣ ବାମ ହାତି ବ୍ୟାଟର ରବିନ୍ଦ୍ର ଜାଡ଼େଜା ଓ ଅକ୍ଷର ପଟେଲ ରହିଛନ୍ତି । ବାକି ସବୁ ଡାହାଣ ହାତି ବ୍ୟାଟର । ତେଣୁ ସାଣ୍ଟନରଙ୍କ ବାମ ହାତି ସ୍ପିନ୍ ବୋଲିଂ ଘାତକ ସାବ୍ୟସ୍ତ ହୋଇପାରେ ।
ୱିଲିୟମସନଙ୍କ ଦକ୍ଷତା ସହ ଭାରତ ଭଲ ଭାବେ ପରିଚିତ । ଲିଗ୍ ମ୍ୟାଚ୍ରେ ୱିଲିୟମସନ ୮୧ ରନ୍ର ଇନିଂସ ଖେଳି ମ୍ୟାଚ୍କୁ ନିୟନ୍ତ୍ରଣରେ ରଖିଥିଲେ । ସେ ଆଉଟ୍ ହେବା ପରେ ଭାରତର ବିଜୟ ସମ୍ଭବ ହୋଇଥିଲା । ଭାରତୀୟ ବୋଲିଂ ବାହିନୀ ବିପକ୍ଷରେ ଏକୁଟିଆ ଲଢ଼ିବାର କ୍ଷମତା ୱିଲିୟମସନଙ୍କ ନିକଟରେ ରହିଛି । ତେଣୁ ତାଙ୍କୁ ସହଳ ଆଉଟ୍ କରିବା ବୁଦ୍ଧିମାନର କାର୍ଯ୍ୟ ହେବ । ନଚେତ ସେ ଯେକୌଣସି ମୁହୂର୍ତ୍ତରେ ବିଜୟ ଛଡ଼ାଇ ନେବେ ।
ରଚିନ ରବିନ୍ଦ୍ର ସମ୍ପ୍ରତି ଶ୍ରେଷ୍ଠ ଫର୍ମରେ ରହିଛନ୍ତି । ସେ ଇତି ମଧ୍ୟରେ ୨ଟି ଶତକ ଅର୍ଜନ କରିସାରିଛନ୍ତି । ନୂଆ ବଲ୍ରେ ଆକ୍ରମଣାତ୍ମକ ବ୍ୟାଟିଂ କରିବାର ଯଥେଷ୍ଟ କ୍ଷମତା ତାଙ୍କ ନିକଟରେ ରହିଛି । ଭାରତ ବିପକ୍ଷ ଲିଗ୍ ମ୍ୟାଚ୍ରେ ସେ ୬ ରନ୍ କରି ଆଉଟ୍ ହୋଇଥିଲେ । କିନ୍ତୁ ଏଥର ସେ ପୁରୁଣା ଭୁଲ ଦୋହରାଇବେ ନାହିଁ । ତାଙ୍କ ପାଇଁ ଭାରତକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ପଡ଼ିବ ।
ଏମାନଙ୍କ ବ୍ୟତୀତ ଡେଭନ କନୱେ ମଧ୍ୟ ଚିନ୍ତା ସାଜି ପାରନ୍ତି ବୋଲି ପୂର୍ବତନ ଭାରତୀୟ ବ୍ୟାଟର ଅମ୍ବାତି ରାୟୁଡ଼ୁ ପ୍ରକାଶ କରିଛନ୍ତି । ଫାଇନାଲ୍ ମ୍ୟାଚ୍ରେ କନୱେଙ୍କୁ ଏକାଦଶରେ ସାମିଲ କରିବାର ଯଥେଷ୍ଟ ସମ୍ଭାବନା ରହିଛି । ସେ ଜଣେ ବିସ୍ଫୋରକ ବ୍ୟାଟର । ପ୍ରାରମ୍ଭରୁ ସେ ବିସ୍ଫୋରକ ବ୍ୟାଟିଂ କରି ଭାରତୀୟ ବୋଲରଙ୍କ ଲୟ ବିଗାଡ଼ି ପାରନ୍ତି ବୋଲି ରାୟୁଡ଼ୁ କହିଛନ୍ତି ।
ମୋଟ ଉପରେ ଦେଖିବାକୁ ଗଲେ ନ୍ୟୁଜିଲାଣ୍ଡ ବେଶ୍ ଶୃଙ୍ଖଳିତ ଦଳ । ସର୍ବଦା ଚତୁର ରଣନୀତି ସହ ଦଳଗତ ପ୍ରଦର୍ଶନ କରିବାରେ ନ୍ୟୁଜିଲାଣ୍ଡ ସିଦ୍ଧହସ୍ତ । ଶେଷ ବଲ୍ ପର୍ଯ୍ୟନ୍ତ ଲଢ଼େଇ କରିବାକୁ ନ୍ୟୁଜିଲାଣ୍ଡ ପସନ୍ଦ କରେ । ଭାରତ ପାଇଁ ନ୍ୟୁଜିଲାଣ୍ଡ ଏଥର କିଛି ଭିନ୍ନ ରଣ କୌଶଳ ପ୍ରସ୍ତୁତ କରିବା ନିଶ୍ଚିତ ।
