କରାଚୀ,୦୮/୧୧: ଆସନ୍ତା ବର୍ଷ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଆୟୋଜନ କରିବ ଚାମ୍ପିଅନ୍ସ ଟ୍ରଫି । କେବଳ ଭାରତ ପାଇଁ ଏ ପର୍ଯ୍ୟନ୍ତ ଟୁର୍ଣ୍ଣାମେଣ୍ଟର କ୍ରୀଡ଼ାସୂଚୀ ଘୋଷଣା ହୋଇପାରି ନାହିଁ ।
ଅନ୍ତର୍ଜାତୀୟ ଗଣମାଧ୍ୟମର ସୂଚନା ଅନୁସାରେ, ଏସିଆ କପ୍ ଭଳି ଚାମ୍ପିଅନ୍ସ ଟ୍ରଫିରେ ମଧ୍ୟ ବିସିସିଆଇର ଦାବିକୁ ପିସିବି ଗ୍ରହଣ କରିଛି ।ହାଇବ୍ରିଡ୍ ମଡେଲରେ ଟୁର୍ଣ୍ଣାମେଣ୍ଟ ଆୟୋଜନ ହେବ । ଭାରତ ସମସ୍ତ ମ୍ୟାଚ୍ ୟୁଏଇରେ ଖେଳିବ । ଭାରତୀୟ ଦଳକୁ ସୁରକ୍ଷା ଦୃଷ୍ଟିରୁ ଭାରତ ସରକାର ପାକିସ୍ତାନ ଗସ୍ତ କରିବାକୁ ଅନୁମତି ଦେବେ ନାହିଁ । ତେଣୁ ବିସିସିଆଇ ହାଇବ୍ରିଡ୍ ମଡେଲ ଆପଣାଇବାକୁ ପିସିବିକୁ ପ୍ରସ୍ତାବ ଦେଇଥିଲା । ଏଥିରେ ପିସିବି ସହମତି ପ୍ରକାଶ କରିଥିବା ଜଣା ପଡ଼ିଛି । ୨୦୨୩ ଏସିଆ କପ୍ରେ ପାକିସ୍ତାନ ଆୟୋଜକ ରହିଥିଲା । ଭାରତ ତା’ର ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳିଥିଲା । ଚାମ୍ପିଅନ୍ସ ଟ୍ରଫିରେ ଭାରତ ୟୁଏଇରେ (ସାରାଜା କିମ୍ବା ଦୁବାଇ) ସମସ୍ତ ମ୍ୟାଚ୍ ଖେଳିବ । ଆଇସିସି ସହ ଆଲୋଚନା ପରେ ଆସନ୍ତା ସପ୍ତାହରେ କ୍ରୀଡ଼ାସୂଚୀ ଘୋଷଣା କରାଯିବ ବୋଲି ପିସିସିର ଜଣେ ଅଧିକାରୀ କହିଛନ୍ତି।
