ଅମରାବତୀ,୨୧/୧୦: ଦୁଇରୁ ଅଧିକ ସନ୍ତାନ ଜନ୍ମ କରିବାକୁ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍ ଚନ୍ଦ୍ରବାବୁ ନାଇଡୁ ରାଜ୍ୟବାସୀଙ୍କୁ ପରାମର୍ଶ ଦେଇଛନ୍ତି । କହିଛନ୍ତି ରାଜ୍ୟରେ ବୟସ୍କ ଲୋକଙ୍କ ସଂଖ୍ୟା ବଢ଼ିଚାଲିଛି । ଅଧିକ ସନ୍ତାନ ଜନ୍ମ ନକଲେ ଆଗାମୀ ଦିନରେ କେବଳ ରାଜ୍ୟର ନୁହେଁ,ଦେଶର ଜନସଂଖ୍ୟା ଉପରେ ତାର ପ୍ରଭାବ ପଡିବ ।
ସେ ଆହୁରି ମଧ୍ୟ କହିଛନ୍ତି ଯେ, ତାଙ୍କ ସରକାର ଆଗାମୀ ଦିନରେ ଏକ ନୂଆ ଆଇନ୍ ଆଣିବାକୁ ବିଚାର କରୁଛନ୍ତି । ଯାହାଫଳରେ ୨ରୁ ଅଧିକ ସନ୍ତାନ ଥିବା ଲୋକମାନେ ପୌର ଓ ପଞ୍ଚାୟତ ନିର୍ବାଚନ ଲଢ଼ିପାରିବେ । ଅମରାବତୀ ଠାରେ ପୂର୍ବ ସରକାର ବେଳେ ବନ୍ଦ ରହିଥିବା ନିର୍ମାଣ କାର୍ଯ୍ୟର ପୁନଃଆରମ୍ଭ କରି ଚନ୍ଦ୍ରବାବୁ କହିଛନ୍ତି ଦକ୍ଷିଣ ଭାରତ ବିଶେଷକରି ଆନ୍ଧ୍ରରେ ବୟସ୍କ ଲୋକଙ୍କ ସଂଖ୍ୟା ବଢ଼ିବାରେ ଲାଗିଛି । ତା ତୁଳନାରେ ପିଲାଙ୍କ ସଂଖ୍ୟା କମ୍ ରହିଛି । ଜାତୀୟ ସ୍ତରରେ ଜନ୍ମହାର ୨.୧ ରହିଥିଲା ବେଳେ ଦକ୍ଷିଣ ଭାରତରେ ଏହା ୧.୬ ରହିଛି । ଏଭଳି ସ୍ଥିତି ଲାଗି ରହିଲେ ଆଗାମୀ ୨୦୪୭ ବେଳକୁ ଦକ୍ଷିଣ ଭାରତରେ ବୟସ୍କଙ୍କ ସଂଖ୍ୟା ବହୁ ଅଧିକ ହୋଇଯାଇଥିବ । ଯାହାକି ଦେଶର ଜନସଂଖ୍ୟା ଉପରେ ଘୋର ପ୍ରଭାବ ପକାଇବ । ବୟସ୍କଙ୍କ ସଂଖ୍ୟା ବଢ଼ିବା କାରଣରୁ ଜାପାନ, ଚୀନ୍ ଓ ଅନ୍ୟାନ୍ୟ ୟୁରୋପୀୟ ଦେଶଗୁଡିକ ପ୍ରଭାବିତ ହୋଇଛନ୍ତି । ଗାଁର ଯୁବପିଢ଼ି କାମଧନ୍ଦା ଅନ୍ୱେଷଣରେ ସହରକୁ କିମ୍ବା ବିଦେଶକୁ ପଳାଇ ଯାଉଥିବାରୁ ଗ୍ରାମାଞ୍ଚଳରେ ଏବେ କେବଳ ବୟସ୍କ ଲୋକମାନଙ୍କୁ ଦେଖିବାକୁ ମିଳୁଛି ।
