କଟକ,୧୫/୦୬: ପୂର୍ବଭାରତର ସବୁଠାରୁ ବଡ଼ କପଡ଼ା ଉତ୍ପାଦନର ପେଣ୍ଠ ହେବାକୁଥିବା ପ୍ରସ୍ତାବିତ ଚୌଦ୍ୱାର ଟେକ୍ସଟାଇଲ୍ସ ପାର୍କର କାମ ଆଗେଇ ପାରୁନି । ଯାହାକୁ ନେଇ ଚୌଦ୍ୱାରବାସୀ ଏବେ ଦ୍ୱନ୍ଦ୍ୱରେ ପଡିଛନ୍ତି । ପ୍ରଶାସନ ସୂତ୍ରରୁ ଖବର ମିଳୁଛି ଯେ, ପ୍ରକଳ୍ପ ଶିଳାନ୍ୟାସର ପ୍ରାୟ ଦେଢ ବର୍ଷ ପରେ ଏବେ କାମ ଆରମ୍ଭ ହେବ । ଇଡ୍କୋ ତରଫରୁ ଜମି ଅଧିଗ୍ରହଣ ପ୍ରାୟ ୮୦ ପ୍ରତିଶତ ଶେଷ ହୋଇଥିବା ବେଳେ ଜମି ହସ୍ତାନ୍ତର ପ୍ରକ୍ରିୟା ମଧ୍ୟ ଖୁବ୍ଶୀଘ୍ର କରାଯିବ । ସେପଟେ ଟେକ୍ସଟାଇଲ୍ସ ପାର୍କ ବା ସମନ୍ୱିତ ବୟନ ବିହାର ପ୍ରକଳ୍ପକୁ ନେଇ ରାଜନୈତିକ ଆରୋପ ପ୍ରତ୍ୟାରୋପ ଏବେ ସୁଦ୍ଧା ଜାରି ରହିଛି । ଯେହେତୁ ଶିଳ୍ପ ନଗରୀ ଚୌଦ୍ୱାରର ଗୌରବ ଏହି ପ୍ରକଳ୍ପ ସହିତ ଜଡ଼ିତ ରହିଛି, ତେଣୁ ରାଜନୈତିକ ଉଦ୍ଦେଶ୍ୟ ସାଧନ କ୍ଷେତ୍ରରେ ମଧ୍ୟ ଏ ପ୍ରକଳ୍ପ ମୋହରା ସାଜିଛି ।
ଓଡ଼ିଶା ଟେକ୍ସଟାଇଲ୍ସ ମିଲ୍ (ଓଟିଏମ୍) ଦୀର୍ଘ ବର୍ଷ ଧରି ତାଲା ପଡିବା ପରେ ଚୌଦ୍ୱାରବାସୀ ବାରମ୍ବାର ଶିଳ୍ପ ନଗରୀର ପୂର୍ବ ଗୌରବ ଫେରାଇ ଆଣିବାକୁ ଦାବି କରୁଥିଲେ । ଶିଳ୍ପ ସମୃଦ୍ଧ ଚୌଦ୍ୱାରର ହଜିଯାଇଥିବା ଗୌରବକୁ ଖୋଜି ଆଣିବାକୁ ଓଟିଏମ୍ର ନବକଳେବର କରିବାକୁ ଆଗଭର ହୋଇଥିଲେ ପୂର୍ବ ବିଜେଡି ସରକାର । ନିର୍ବାଚନ ବର୍ଷ ଥିବାରୁ ସ୍ଥାନୀୟ ଅଞ୍ଚଳ ପାଇଁ ଓଟିଏମ୍ ଥିଲା ମୁଖ୍ୟ ପ୍ରସଙ୍ଗ । ଲୋକଙ୍କ ଦାବିକୁ ବିଚାରକୁ ନେଇ ଏଠାରେ ଏକ ବିଶାଳ ଟେକ୍ସଟାଇଲ୍ସ ପାର୍କ ବା ସମନ୍ୱିତ ବୟନ ବିହାର ପ୍ରତିଷ୍ଠା କରିବାକୁ କ୍ୟାବିନେଟ୍ ମଞ୍ଜୁରୀ ମିଳିଥିଲା । ଅନ୍ତଃରାଷ୍ଟ୍ରୀୟ ଉଦ୍ୟୋଗ ୱେଲ୍ସ୍ପୁନ୍ ସହିତ ଚୁକ୍ତି ପରେ ୩ ହଜାର କୋଟିର ଟେକ୍ସଟାଇଲ୍ସ ପାର୍କ ପାଇଁ ଫେବ୍ରୁଆରୀ ୧୭ ତାରିଖରେ ଶୁଭ ଦିଆଯାଇଥିଲା । ଏଠାରେ ପ୍ରାୟ ୧୦ ହଜାର ଲୋକଙ୍କ ଲାଗି ନିଯୁକ୍ତି ସୁଯୋଗ ସୃଷ୍ଟି କରିବା ଉଦ୍ଦେଶ୍ୟରେ ଏ ପ୍ରକଳ୍ପକୁ ଭେଟି ଦିଆଗଲା ବୋଲି ଦମ୍ଭର ସହ ଯୁକ୍ତି ବାଢିଥିଲା ବିଜେଡି ସରକାର ।
ଶୁଭ ପଡିବାର କିଛି ମାସ ଧରି ଏଠାରେ ଯେଉଁସବୁ କାମକୁ ନିଆଯାଇଥିଲା, ଲାଗୁଥିଲା ସତେଯେମିତି ଖୁବ୍କମ୍ ସମୟ ଅବଧିରେ ନୂଆ ଚେହେରା ଦେଖାଇବ ଓଟିଏମ୍ । କିନ୍ତୁ କ୍ରମଶଃ ପ୍ରକଳ୍ପ କାମ ଅଟକିଗଲା । ଆଜିର ଦିନରେ କେବଳ ସାଇନ୍ ବୋର୍ଡରେ ସୀମିତ ରହିଛି ଟେକ୍ସଟାଇଲ୍ସ ପାର୍କର ସ୍ୱପ୍ନ । ପୁରୁଣା ଓଟିଏମ୍ ଯେଉଁ ସ୍ଥାନରେ ଥିଲା, ସେଠାରେ ଥିବା ୫୪ ଏକର ଜମିକୁ ସଫାସୁତରା କରି ରଖାଯାଇଛି । ସେହିପରି ଏଏସ୍ଆଇ ଅଧୀନରେ ଥିବା ବୋଧି ପୀଠରେ ଇଡ୍କୋ ପାଚେରି ଘେରାଇଥିବାରୁ ବିବାଦ ଉପୁଜିଛି । ଯାହାଫଳରେ ୩ ହଜାର କୋଟି ଟଙ୍କାର ପ୍ରକଳ୍ପ ସମ୍ପୂର୍ଣ୍ଣ ଭାବେ ଠପ୍ ହୋଇରହିଛି ।
ଟେକ୍ସଟାଇଲ୍ସ ପାର୍କ ପାଇଁ ୪ଶହ ଏକର ଜମି ଆବଶ୍ୟକ ଥିବାବେଳେ ଏବେ ସୁଦ୍ଧା ପ୍ରାୟ ୭୦ ପ୍ରତିଶତ ଜମି ଅଧିଗ୍ରହଣ କରାଯାଇଥିବା ଜଣାପଡିଛି । ଜମି ଅଧିଗ୍ରହଣ ପାଇଁ ୨୦୨୩ ଡିସେମ୍ବର ମାସରେ ୩ ଶହ ଏକର ବାବଦରେ ୨ କୋଟି ୮୦ ଲକ୍ଷ ଟଙ୍କା ଇଡ୍କୋକୁ ଦିଆଯାଇଥିଲା । କିନ୍ତୁ ପରେ ପ୍ରତ୍ନତତ୍ତ୍ୱ ବିଭାଗ ଏ ଦିଗରେ ବାଟ ଓଗାଳିଥିଲା । ଏବେ ଏ ବିବାଦ ଅନ୍ତତଃପକ୍ଷେ ତୁଟିସାରିଛି । କିନ୍ତୁ କାମ ଯେଭଳି ଦ୍ରୁତ ଗତିରେ ଆଗେଇବା କଥା ହେଉନି । ମୂଳ କଥା ହେଲା, ଜମି ଅଧିଗ୍ରହଣ ହେବା ପୂର୍ବରୁ ଏଠାରେ ଶିଳ୍ପ ପାଇଁ ଶିଳାନ୍ୟାସ କେମିତି ହେଲା ତାକୁ ନେଇ ପ୍ରଶ୍ନ ଉଠିଛି ।
ଏ ସମ୍ପର୍କରେ ବିଜେପି ନେତା ଜ୍ଞାନେନ୍ଦ୍ର ସ୍ୱାଇଁ କହିଛନ୍ତି, ଜମି ଅଧିଗ୍ରହଣ ନକରି ପୂର୍ବ ବିଜେଡି ସରକାର ଭୋଟ୍ ରାଜନୀତିରେ ଚକ୍ମା ଦେବାକୁ ଚେଷ୍ଟା କରିଥିଲେ । କିନ୍ତୁ ବାସ୍ତବରେ ପ୍ରକଳ୍ପ କେବଳ ଫଳକରେ ସୀମିତ ରହିଥିଲା । ସରକାର ବଦଳିବା ପରେ ଏକ ଦସ୍ତଖତ ଅଭିଯାନ କରି ଚୌଦ୍ୱାର ସଚେତନ ମଞ୍ଚ ତରଫରୁ ଶିଳ୍ପ ମନ୍ତ୍ରୀଙ୍କୁ ଭେଟିଥିଲୁ । ସେଠାରେ ତାଙ୍କୁ କହିବାରେ ବୁଝା ପଡିଥିଲା ଯେ, ପୂର୍ବ ସରକାର କିଛି ପଦକ୍ଷେପ ନେଇନଥିଲେ । କିନ୍ତୁ ଶିଳ୍ପ ମନ୍ତ୍ରୀ ଆଶ୍ୱାସନା ଦେଇଥିଲେ ଯେ କାମ କିଛି ଦିନ ଭିତରେ ଆରମ୍ଭ ହେବ ।
ଅନ୍ୟପକ୍ଷରେ ବିଧାୟକ ସୌଭିକ ବିଶ୍ୱାଳ କହିଛନ୍ତି, ୱେଲ୍ସ୍ପୁନ୍ ବିଜେଡି ସରକାରର ଅବଦାନ । ପୂର୍ବତନ ମୁଖ୍ୟମନ୍ତ୍ରୀ ଏ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ । ମୁଁ ନିକଟରେ ଜିଲ୍ଲାପାଳଙ୍କ ସହ ଏ ବାବଦରେ କଥା ହୋଇଛି । ସେ କହିଛନ୍ତି ଜମି ଅଧିଗ୍ରହଣ କାମ ସହିତ ଜମି ହସ୍ତାନ୍ତର ପ୍ରକ୍ରିୟା କରାଯିବ । ପ୍ରକଳ୍ପ କାମ ଖୁବ୍ ଶୀଘ୍ର ଆଗେଇବ ।
