ଭୁବନେଶ୍ୱର ୨୨/୧୨(ରଞ୍ଜନ ସାହୁ, ହେମନ୍ତ ପରିଡ଼ା, ମାନସୀ ଶୁକ୍ଳା, ଭାଗ୍ୟଶ୍ରୀ ସାହୁ): ୨୦୨୪ରେ ଭୂସ୍ଖଳନରେ ଥରିଥିଲା କେରଳର ୱାୟନାଡ୍ । ମୃତ୍ୟୁର ତାଣ୍ଡବ ରଚିଥିଲା ଏହି ବିରାଟ ବିପର୍ଯ୍ୟୟ । ନିଶ୍ଚିହ୍ନ ହୋଇଯାଇଥିଲା ୱାୟନାଡ୍ର ୪ ଗାଁ, ପ୍ରାଣ ହରାଇଥିଲେ ୨୫୦ରୁ ଉର୍ଦ୍ଧ୍ବ। କଲବଲ କରିଥିଲା ଅସହ୍ୟ ତାତି । ଦାଉ ସାଜିଥିଲା ଲଗାଣ ବର୍ଷା, ବନ୍ୟା । ଝାନ୍ସୀ ମେଡିକାଲ କଲେଜରେ ନିଆଁରେ ଲିଭିଯାଇଥିଲା ୧୮ ନବଜାତଙ୍କ ଜୀବନ । ହାଥରସ୍ରେ ସତ୍ସଙ୍ଗରେ ଦଳାଚକଟା, ତାମିଲନାଡୁ ମଦମୃତ୍ୟୁ, ରାଜକୋଟ ଗେମିଂ ଜୋନ୍ ନିଆଁ ବି ନେଇଥିଲା ଅନେକ ମୁଣ୍ଡ । ଜଳବାୟୁ ପରିବର୍ତ୍ତନ ଯୋଗୁ ସାହାରା ମରୁଭୂମିରେ ବନ୍ୟା ସଭିଁଙ୍କୁ ଚକିତ କରିବା ଭଳି ଅନେକ ଗୁରୁତ୍ୱପୂର୍ଣ୍ଣ ଘଟଣାର ମୂକସାକ୍ଷୀ ରହିଥିଲା ବିଦାୟୀ ବର୍ଷ ।
ୱାୟନାଡର ୪ ଗାଁ ଗିଳିଦେଲା ଭୂସ୍ଖଳନ୍
କେରଳର ୱାୟନାଡ୍ ଜିଲ୍ଲାରେ ବିଦାୟୀ ବର୍ଷର ଜୁଲାଇରେ ପ୍ରକୃତିର କୋପ ରଚିଥିଲା ମୃତ୍ୟୁ ତାଣ୍ଡବ । ବର୍ଷା ବିତ୍ପାତ ପରେ ଭୂସ୍ଖଳନ ଯୋଗୁ ଚାହୁଁ ଚାହୁଁ ଲିଭିଯାଇଥିଲା ୨୫୦ରୁ ଅଧିକ ଲୋକଙ୍କର ଜୀବନ ଦୀପ । ୪୭ ଜଣ ନିଖୋଜ ହୋଇଯାଇଥିଲେ । ଅଦ୍ୟାବଧି ସେମାନଙ୍କର କୌଣସି ପତ୍ତା ମିଳିନି । ସେହିପରି ୧୨୦୦ କୋଟିରୁ ଉଦ୍ଧ୍ୱର୍ ମୂଲ୍ୟର ସମ୍ପତ୍ତି ନଷ୍ଟ ହୋଇଥିଲା । ଶହ ଶହ ଲୋକ ବାସହୀନ ହୋଇଥିଲେ। ରାଜ୍ୟରେ ଘଟିଥିବା ଏହି ଛାତିଥରା ପ୍ରାକୃତିକ ଦୁର୍ବିପାକ ଯୋଗୁ ସ୍ତବ୍ଧ ହୋଇଯାଇଥିଲା ପୂରା ଦେଶ । ଜୁଲାଇ ୨୯ ରାତିରେ ଭୀଷଣ ବର୍ଷାରୁ ଆରମ୍ଭ ହୋଇଥିଲା ଦୁର୍ଦ୍ଦଶା । ବିଳମ୍ବିତ ରାତି ଥିବାରୁ ଲୋକେ ନିଦରେ ଶୋଇଯାଇଥିଲେ । ଏହି ସମୟରେ ମାତ୍ର୪ ଘଣ୍ଟାରେ ଘଟିଥିଲା ୪ଟି ଭୂସ୍ଖଳନ । ଏଥିରେ ୪ଟି ଗ୍ରାମ ସଂପୂର୍ଣ୍ଣ ନିଶ୍ଚିହ୍ନ ହୋଇଯାଇଥିଲା । ୱାୟନାଡ୍ ଅନ୍ତର୍ଗତ ମୁଣ୍ଡାକାଇ, ଚୁଲାରମାଲା, ଅଟ୍ଟାମାଲା ଓ ନୁଲପୂଝା ଗ୍ରାମ ଭୂସ୍ଖଳନରେ ଭାସିଯାଇଥିଲା । ଅନେକ ଲୋକ ସେହି ଧ୍ୱଂସାବଶେଷ ତଳେ ଦବି ଯାଇଥିବାବେଳେ ଅନେକ ଜଳସ୍ରୋତରେ ଭାସିଯାଇଥିଲେ । ଏନ୍ଡିଆରଏଫ୍, ଏସଡିଆରଏଫ୍, ଅଗ୍ନିଶମ ବାହିନୀ ଓ ସେନା ଘଟଣାସ୍ଥଳରେ ଉଦ୍ଧାର କାର୍ଯ୍ୟ ତ୍ୱରାନିତ କରିଥିଲେ । ଉଦ୍ଧାର ପାଇଁ ବାୟୁସେନାର ମିଗ୍-୧୭ ଏବଂ ଏଲଏଚ୍ ଧ୍ରୁବ ହେଲିକପ୍ଟରକୁ ମୁତୟନ କରାଯାଇଥିଲା ।
ପ୍ରଳୟଙ୍କରୀ ବନ୍ୟାରେ ବୁଡ଼ିଲା ଆସାମ
ବିଦାୟୀ ବର୍ଷର ମୌସୁମୀ ସମୟରେ ପ୍ରବଳ ବର୍ଷା ଯୋଗୁ ଦେଶର ବିଭିନ୍ନ ରାଜ୍ୟରେ ବନ୍ୟା ଓ ଭୂସ୍ଖଳନ ଘଟିଥିଲା । ଜୁନ୍ରେ ଆସାମରେ ପ୍ରଳୟଙ୍କରୀ ବନ୍ୟା ହେବାରୁ ୧୦୯ ଜଣ ପ୍ରାଣ ହରାଇଥିଲେ । ୨୮ ଜିଲ୍ଲାର ୨୩ ଲକ୍ଷ ଲୋକ ପ୍ରଭାବିତ ହୋଇଥିଲେ । ବ୍ରହ୍ମପୁତ୍ର ନଦୀର ପାଣି କାଜିରଙ୍ଗା ଜାତୀୟ ଉଦ୍ୟାନ ଓ ବ୍ୟାଘ୍ର ଅଭୟାରଣ୍ୟ ମଧ୍ୟରେ ପଶିବାରୁ ୨୦୦ରୁ ଅଧିକ ବନ୍ୟଜୀବଙ୍କର ମୃତ୍ୟୁ ଘଚିଥିଲା । ବନ୍ୟା ଯୋଗୁ ମଣିପୁରରେ ୧୩ ଜଣଙ୍କର ମୃତ୍ୟୁ ଘଟିଥିବାବେଳେ ୧ ଲକ୍ଷ ଲୋକ ପ୍ରଭାବିତ ହୋଇଥିଲେ । ସିକ୍କିମ ଓ ମେଘାଳୟରେ ପ୍ରବଳ ବନ୍ୟା ଯୋଗୁ ରାସ୍ତା ଓ ପୋଲ ଧୋଇ ଯାଇଥିଲା । ଉତ୍ତରପ୍ରଦେଶରେ ଜୁଲାଇ ୧୧-୧୨ ମଧ୍ୟରେ ବନ୍ୟା ଯୋଗୁ ୫୪ ଜଣ ପ୍ରାଣ ହରାଇଥିଲେ । ୯୨୩ଟି ଗ୍ରାମର ୧.୮ ନିୟୁତ ଲୋକ ପ୍ରଭାବିତ ହୋଇଥିଲେ । ହିମାଚଳରେ ବନ୍ୟା ଓ ଭୂସ୍ଖଳନ ଯୋଗୁ ୩୧ ଜଣ ପ୍ରାଣ ହରାଇଥିବାବେଳେ ଅନେକ ନିଖୋଜ ହୋଇଥିଲେ । ତ୍ରିପୁରାରେ ବନ୍ୟା ଯୋଗୁ ୩୧ ଜଣ ପ୍ରାଣ ହରାଇଥିଲେ । ଗୁଜରାଟରେ ୨୦ ହଜାର ଲୋକ ବିସ୍ଥାପିତ ହୋଇଥିଲେ । ସେହିପରି ଅଗଷ୍ଟ ୩୧ରୁ ସେପ୍ଟେମ୍ବର ୯ ତାରିଖ ଯାଏ ବିଜୟୱାଡାରେ ପ୍ରବଳ ବର୍ଷା ଯୋଗୁ ନଦୀଗୁଡିକରେ ଜଳସ୍ତର ବଢ଼ିଯାଇଥିଲା । ଏହାଯୋଗୁ ଆସିଥିବା ବନ୍ୟାରେ ୪୫ ଜଣଙ୍କ ଜୀବନ ଯାଇଥିବାବେଳେ ୨.୭ ଲକ୍ଷ ଲୋକ ପ୍ରଭାବିତ ହୋଇଥିଲେ ।
ସତ୍ସଙ୍ଗ ଦଳାଚକଟାରେ ଗଲା ୧୨୧ ଜୀବନ
ଚଳିତବର୍ଷ ଜୁଲାଇ ୨ରେ ଉତ୍ତରପ୍ରଦେଶ ହାଥରସ୍ ଜିଲ୍ଲାରେ ଘଟିଥିଲା ଏକ ବଡ଼ ଅଘଟଣ । ସ୍ଥାନୀୟ ଧର୍ମଗୁରୁ ଭୋଲେବାବା ଓରଫ ନାରାୟଣ ସାକାର ହରିଙ୍କ ସତ୍ସଙ୍ଗରେ ଦଳାଚକଟା ଘଟି ପ୍ରାଣ ହରାଇଥିଲେ ୧୨୧ ଶ୍ରଦ୍ଧାଳୁ । ଅଘଟଣଟି ଜିଲ୍ଲା ମୁଖ୍ୟାଳୟଠାରୁ ୪୭ କିମି ଦୂର ସିକନ୍ଦ୍ରାରାଓ ପୁଲିସ ଥାନା ଅଧୀନରେ ଥିବା ଫୁଲରଇ ଗାଁରେ ଘଟିଥିଲା । ସେଦିନ ସତ୍ସଙ୍ଗରେ ପ୍ରାୟ ୨୦ ହଜାରରୁ ଅଧିକ ଲୋକଙ୍କ ସମାଗମ ହୋଇଥିଲା । କାର୍ଯ୍ୟକ୍ରମ ସରିବା ପରେ ଏକସମୟରେ ବାହାରକୁ ବାହାରୁଥିଲେ ଲୋକେ । ସମସ୍ତେ ପ୍ରଥମେ ବାହାରିବାକୁ ଚେଷ୍ଟା କରିବାରୁ ଦଳାଚକଟା ହୋଇଥିଲା । ଶ୍ରଦ୍ଧାଳୁଙ୍କ ମଧ୍ୟରେ ଅଧିକାଂଶ ମହିଳା ଓ ପିଲା ଥିବାରୁ ସେମାନେ ଉଠିପାରିନଥିଲେ । ଶ୍ୱାସରୁଦ୍ଧ ହେବା ଯୋଗୁ ସେମାନଙ୍କର ମୃତ୍ୟୁ ଘଟିଥିଲା । କିଛି ପ୍ରତ୍ୟକ୍ଷଦର୍ଶୀ କହିଥିଲେ ଯେ, ସତ୍ସଙ୍ଗ ସରିବା ପରେ ଭୋଲେ ବାବାଙ୍କର କନଭୟ ଘଟଣାସ୍ଥଳରୁ ବାହାରିଥିଲା । ସେଥିଲାଗି ସୁରକ୍ଷାକର୍ମୀ ଜନତାକୁ ଅଟକାଇଥିଲେ । କିନ୍ତୁ ତାଙ୍କର କନଭୟ ଯିବା ପରେ ଅଚାନକ ଭିଡ଼କୁ ଛାଡ଼ି ଦେଇଥିଲେ । ସେଥିଯୋଗୁ ଦଳାଚକଟା ହୋଇଥିଲା ।
କଲବଲ କଲା ତାତି
ବିଦାୟୀ ବର୍ଷରେ ଲୋକଙ୍କୁ କଲବଲ କରିଥିଲା ଭୟଙ୍କର ଗ୍ରୀଷ୍ମ ଲହରୀ । ଅସହ୍ୟ ତାତିର ଜ୍ୱାଳାରେ ଛଟପଟ ହୋଇଥିଲେ ଲୋକେ । ମେ ୨୮ରେ ରାଜସ୍ଥାନର ଚୁରରେ ସର୍ବାଧିକ ୫୦.୫ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିଲା । ତାହା ବିଗତ ୮ ବର୍ଷ ମଧ୍ୟରେ ସର୍ବାଧିକ ଥିଲା । ସେହିପରି ରାଜ୍ୟର ସିରସା, ଫଲୋଦିରେ ତାପମାତ୍ରା ୫୦ ଡିଗ୍ରୀ ପାର୍ କରିଥିଲା । ଦିଲ୍ଲୀର ମୁଙ୍ଗେସପୁର, ନରେଲା ଓ ନଜଫଗଡ଼ରେ ମଧ୍ୟ ସେଦିନ ୫୦ ଡିଗ୍ରୀ ପାଖାପାଖି ତାପମାତ୍ରା ଅନୁଭୂତ ହୋଇଥିଲା । ଜୁନ୍ ୩ ତାରିଖ ସୁଦ୍ଧା ପ୍ରଚଣ୍ଡ ଗ୍ରୀଷ୍ମ ଲହରୀ ଯୋଗୁ ଦେଶରେ ମୋଟ ୨୧୯ ଜଣ ପ୍ରାଣ ହରାଇଥିଲେ । ୨୫ ହଜାର ଲୋକ ଅଂଶୁଘାତର ଶିକାର ହୋଇଥିଲେ । ମୃତକଙ୍କ ମଧ୍ୟରେ ସାଧାରଣ ନିର୍ବାଚନର ଅନ୍ତିମ ପର୍ଯ୍ୟାୟରେ ନିୟୋଜିତ ଥିବା ୩୩ ଜଣ କର୍ମଚାରୀ ସାମିଲ ଥିଲେ । ପଡ଼ୋଶୀ ପାକିସ୍ତାନରେ ମଧ୍ୟ ପ୍ରଚଣ୍ଡ ଗ୍ରୀଷ୍ମପ୍ରବାହ ହୋଇଥିଲା । ସିନ୍ଧ ପ୍ରଦେଶର ମହେଞ୍ଜଦାରୋରେ ମେ ୨୭ରେ ତାପମାତ୍ରା ୫୨ ଡିଗ୍ରୀ ସେଲସିୟସ୍ ରହିଥିଲା ।
ଜଳିଗଲା ରାଜକୋଟ ଗେମିଂ ଜୋନ୍
ଚଳିତବର୍ଷ ମେ ୨୫ରେ ଗୁଜରାଟ ରାଜକୋଟର ଟିଆରପି ଗେମିଂ ଜୋନ୍ରେ ନିଆଁ ଲାଗି ଲିଭିଯାଇଥିଲା ୩୩ଜଣଙ୍କ ଜୀବନଦୀପ । ମୃତକଙ୍କ ମଧ୍ୟରେ ସାମିଲ ଥିଲେ ୧୨ରୁ ଅଧିକ ପିଲା । ସେଦିନ ସେଠାରେ କିଛି ମରାମତି ଓ ନବୀକରଣ କାମ ଚାଲିଥିଲା । ସେଥିଯୋଗୁ ଅନେକ ପ୍ଲାଏ ଖଣ୍ଡ ଓ କାଠ ଏଣେତେଣେ ପଡି଼ଥିଲା । ସେଥିରେ ନିଆଁ ଲାଗିବା ପରେ ତାହା ଦ୍ରୁତ ଗତିରେ ବ୍ୟାପିଥିଲା । ଦେଖୁ ଦେଖୁ ଧ୍ୱଂସସ୍ତୁପ ପାଲଟି ଯାଇଥିଲା ପୂରା ଗେମିଂ ଜୋନ୍ । ଶ୍ୱାସରୁଦ୍ଧ ହୋଇ ଅନେକ ପ୍ରାଣ ହରାଇଥିଲେ ।
କାଞ୍ଚନଜଙ୍ଗା ଏକ୍ସପ୍ରେସ୍କୁ ପିଟିଲା ମାଲଗାଡି
ଏ ବର୍ଷ ଜୁନ୍ ୧୭ରେ ପଶ୍ଚିମବଙ୍ଗ ଦାର୍ଜିଲିଂ ଜିଲ୍ଲା ଅନ୍ତର୍ଗତ ନୂଆ ଜଳପାଇଗୁଡ଼ି ସ୍ଥିତ ରଙ୍ଗପାନି ଷ୍ଟେସନ୍ରେ ଘଟିଥିଲା ଏକ ମର୍ମନ୍ତୁଦ ରେଳ ଦୁର୍ଘଟଣା । କାଙ୍ଗନଜଙ୍ଗା ଏକ୍ସପ୍ରେସକୁ ଏକ ମାଲବାହୀ ଟ୍ରେନ୍ ପଛରୁ ଭୀଷଣ ଧକ୍କା ଦେଇଥିଲା । ଏହାଯୋଗୁ ମାଲଗାଡି଼ର ଲୋକୋ ପାଇଲଟ ଓ ଏକ୍ସପ୍ରେସ ଟ୍ରେନ୍ର ଗାର୍ଡଙ୍କ ସମେତ ମୋଟ ୧୧ଜଣ ପ୍ରାଣ ହରାଇଥିଲେ ।
ସାହାରା ମରୁଭୂମିରେ ବନ୍ୟା
୫୦ ବର୍ଷ ପରେ ପ୍ରଥମ ଥର ପାଇଁ ସାହାରା ମରୁଭୂମିରେ ପ୍ରବଳ ବର୍ଷା ହୋଇଥିଲା । ସେଥିଯୋଗୁ ଉତ୍ତର ଆଫ୍ରିକାରେ ଥିବା ବିଶ୍ୱର ସବୁଠୁ ବଡ଼ ଉତ୍ତପ୍ତ ମରୁଭୂମିରେ ବନ୍ୟା ଆସିଥିଲା । ଜଳବାୟୁ ପରିବର୍ତ୍ତନ ଓ ଅସ୍ୱାଭାବିକ ପାଣିପାଗ ଯୋଗୁ ଏପରି ସ୍ଥିତି ସୃଷ୍ଟି ହୋଇଥିବା ବିଶେଷଜ୍ଞମାନଙ୍କ ମତ । ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ସାଟେଲାଇଟ ଜରିଆରେ ସାହାରା ବାଲି, ଆଖପାଖରେ ଥିବା ପ୍ରାଚୀନ ମହଲ ଓ ମରୁଭୂମିରେ ଥିବା ଗଛରୁ ପାଣି ଝରୁଥିବାର ସୁନ୍ଦର ଚିତ୍ର କଏଦ କରିଥିଲା । ମରକ୍କୋର ଇରିକ୍କି ହ୍ରଦରେ ବି ୫୦ ବର୍ଷ ପରେ ପାଣି ଭର୍ତ୍ତି ହୋଇଯାଇଥିଲା । ୧୯୨୫ରୁ ଏହି ହ୍ରଦ ଶୁଖିଲା ପଡି଼ଥିଲା । ସାହାରା ମରୁଭୂମିରେ ବର୍ଷା ହୋଇଥାଏ । କିନ୍ତୁ ତାହା ଖୁବ୍ କମ୍ । ଖରାଦିନରେ କ୍ୱଚିତ୍ ବର୍ଷା ହୋଇଥାଏ । ଏଥର କିନ୍ତୁ ସାହାରାରେ ଗ୍ରୀଷ୍ମ ସମୟ ଚାଲିଥିବାବେଳେ ସେପ୍ଟେମ୍ବରରେ ବିଭିନ୍ନ ସ୍ଥାନରେ ଗ୍ରୀଷ୍ମମଣ୍ଡଳୀୟ ଝଡ଼ ଯୋଗୁ ଅସାଧାରଣ ଭାବେ ୨ ଦିନ ବର୍ଷା ହୋଇଥିଲା । ସେଥିଯୋଗୁ ଏହି ବନ୍ୟା ଆସିଥିଲା ।
ମୁମ୍ବାଇରେ ହୋର୍ଡିଂ ଭୁଶୁଡ଼ିଲା
ଏ ବର୍ଷ ମେ ୧୩ରେ ମୁମ୍ବାଇର ଘାଟକୋପର ଅଞ୍ଚଳରେ ପ୍ରବଳ ବର୍ଷା ଯୋଗୁ ଭୁଶୁଡି଼ ପଡ଼ିଥିଲା ଏକ ଏକ ହୋର୍ଡିଂ । ସେଥିଯୋଗୁ ଅକାଳରେ ଲିଭି ଯାଇଥିଲା ୧୭ଙ୍କ ଜୀବନ ଦୀପ । ୭୫ରୁ ଅଧିକ ଆହତ ହୋଇଥିଲେ । ହୋର୍ଡିଂଟିକୁ ବେଆଇନ ଭାବେ ନିର୍ଦ୍ଧାରିତ ଆକାରଠାରୁ ବହୁତ ବଡ଼ କରି କରାଯାଇଥିଲା । ପ୍ରବଳ ବର୍ଷାରେ ତାହା ଏକ ପେଟ୍ରୋଲ ପମ୍ପ ଉପରେ ଖସି ପଡିଥିଲା । ତେଣୁ ବର୍ଷା ଦାଉରୁ ରକ୍ଷା ପାଇବାକୁ ସେଠାରେ ଆଶ୍ରୟ ନେଇଥିବା ଗାଡି଼ ଓ ଲୋକମାନେ ତା’ତଳେ ଚାପି ହୋଇଯାଇଥିଲେ।
ମଦମୃତ୍ୟୁ ବିଭୀଷିକା
ତାମିଲନାଡୁର କଲ୍ଲାକୁରିଚି ଜିଲ୍ଲାରେ ବିଷାକ୍ତ ଦେଶୀ ମଦ ପିଇବାରୁ ଏବର୍ଷ ୬୫ଜଣଙ୍କର ଜୀବନ ଯାଇଥିଲା । ମୃତକମାନେ ଦିନ ମଜୁରିଆ ଶ୍ରେଣୀର ଥିଲେ । ଜୁନ୍ ୧୯ ତାରିଖରେ ନିଶିଦ୍ଧ ମଦ କିଣିବା ପରେ ସେମାନେ ତାକୁ ଏକାଠି ବସି ପିଇଥିଲେ । ତେବେ ଘରକୁ ଫେରିବା ପରେ ଅସୁସ୍ଥ ହୋଇପଡି଼ଥିଲେ । ମୁଣ୍ଡବିନ୍ଧା, ବାନ୍ତି, ପେଟ ଯନ୍ତ୍ରଣା ହୋଇଥିଲା । ଏହାପରେ ଆଖି ପୋଡ଼ିବା ବି ଆରମ୍ଭ ହୋଇଥିଲା । ପରିବାର ଲୋକେ ସେମାନଙ୍କୁ କଲ୍ଲାକୁରିଚି ସରକାରୀ ହସ୍ପିଟାଲରେ ଭର୍ତ୍ତି କରିଥିଲେ । ତେବେ ସେଠାରେ ୬୫ ଜଣଙ୍କର ଜୀବନ ଯାଇଥିଲା।
ମେଡିକାଲ ନିଆଁରେ ଚାଲିଗଲେ ୧୮ ନବଜାତ
ଚଳିତବର୍ଷ ନଭେମ୍ବର ୧୫ରେ ୟୁପିର ଝାନ୍ସୀରେ ଥିବା ମହାରାଣୀ ଲକ୍ଷ୍ମୀବାଇ ସରକାରୀ ମେଡିକାଲ କଲେଜର ଶିଶୁ ୱାର୍ଡରେ ଘଟିଥିଲା ଭୟାବହ ଅଗ୍ନିକାଣ୍ଡ । ସେଥିଯୋଗୁ ପ୍ରାଣ ହରାଇଥିଲେ ୧୮ ନବଜାତ ଶିଶୁ । ସମସ୍ତ ଶିଶୁ ଏସ୍ଏନ୍ସିୟୁରେ ଭର୍ତ୍ତିଥିଲେ । ସେଦିନ ରାତି ପ୍ରାୟ ୧୧ଟାରେ ଏହି ଅଘଟଣ ଘଟିଥିଲା । ନିଆଁ ଲାଗିବା ପରେ ପୂରା ଶିଶୁ ୱାର୍ଡ ଧୂଆଁମୟ ହୋଇଯାଇଥିଲା । ସୂଚନା ମିଳିବା ପରେ ୧୨ଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚି ବହୁ କଷ୍ଟରେ ନିଆଁକୁ ଆୟତ୍ତ କରିଥିଲେ । କିନ୍ତୁ ସେତେବେଳକୁ ଚାଲିଯାଇଥିଲା ୧୮ ନବଜାତ ଶିଶୁଙ୍କ ଜୀବନ।
‘ଜୀବିତପୁତ୍ରିକା’ ବେଳେ ବୁଡ଼ିଗଲେ ୪୬
ସେପ୍ଟେମ୍ବର ୨୬ରେ ବିହାରରେ ‘ଜୀବିତପୁତ୍ରିକା’ ଉତ୍ସବ ପାଳନବେଳେ ବିଭିନ୍ନ ଜିଲ୍ଲାରେ ସଲୀଳ ସମାଧି ନେଇଥିଲେ ୪୬ ଜଣ । ସେମାନଙ୍କୁ ମଧ୍ୟରୁ ଅଧିକାଂଶ ହେଉଛନ୍ତି ଶିଶୁ । ଉତ୍ସବ ପାଳନ ସମୟରେ ନଦୀ, ପୋଖରୀରେ ପବିତ୍ର ବୁଡ଼ ପକାଇବାବେଳେ ପାଣିରେ ବୁଡ଼ି ଯାଇଥିଲେ ସେମାନେ । ମୃତକମାନେ ପୂର୍ବ ଓ ପଶ୍ଚିମ ଚମ୍ପାରଣ, ନାଳନ୍ଦା, ଔରଙ୍ଗାବାଦ, ବୈଶାଳୀ, ମୁଜାଫରପୁର, ସମସ୍ତିପୁର ଓ ଅରୱାଲା ଜିଲ୍ଲାର । ‘ଜୀବିତପୁତ୍ରିକା’ ଉତ୍ସବ ସମୟରେ ମହିଳାମାନେ ଉପବାସ କରିବା ସହିତ ସେମାନଙ୍କ ପିଲାଙ୍କ ମଙ୍ଗଳ କାମନା କରି ପାଣିରେ ବୁଡ଼ ପକାଇଥାନ୍ତି ।
ରେମାଲ-ଫେଙ୍ଗଲ ତାଣ୍ଡବ
ଏ ବର୍ଷ ରେମାଲ-ଫେଙ୍ଗଲ ବାତ୍ୟାର ପ୍ରକୋପ ଦେଖିବାକୁ ମିଳିଥିଲା ଭାରତରେ । ବଙ୍ଗେପସାଗରରେ ଆସିଥିବା ଭୀଷଣ ସାମୁଦ୍ରିକ ବାତ୍ୟା ‘ରେମାଲ’ ପଶ୍ଚିମବଙ୍ଗ ଓ ବାଂଲାଦେଶର ସୁନ୍ଦରବନ ଡେଲ୍ଟା ଅଞ୍ଚଳରେ ମେ ୨୬ରେ ଛୁଇଁଥିଲା ସ୍ଥଳଭାଗ । ଏହି ବାତ୍ୟା ଯୋଗୁ ପ୍ରାଣ ହରାଇଥିଲେ ଅତି କମ୍ରେ ୬୫ ଜଣ । ପଶ୍ଚିମବଙ୍ଗ, ମିଜୋରାମ, ଆସାମ ଓ ମେଘାଳୟରେ ଏହା ତାଣ୍ଡବ ସୃଷ୍ଟି କରିଥିଲା । ମେଘାଳୟରେ ଏଥିଯୋଗୁ ଭୂସ୍ଖଳନ ଘଟିଥିଲା । ସେହିପରି ନଭେମ୍ବର ୩୦ରେ ତାମିଲନାଡୁ- ପୁଡୁଚେରୀ ନିକଟରେ ସ୍ଥଳଭାଗ ଛୁଇଁଥିଲା ବାତ୍ୟା ‘ଫେଞ୍ଜଲ’ । ସେଥିଯୋଗୁ ଅତି କମ୍ରେ ୧୯ ଜଣଙ୍କର ଜୀବନହାନି ହୋଇଥିଲା । ପୁଡୁଚେରୀରେ ୪୬ ସେମି ବର୍ଷା ହେବାରୁ ବନ୍ୟା ଆସିଥିଲା ।
ମାୟୋଟ୍ରେ ଝଡ଼
ଚଳିତ ଡିସେମ୍ବରରେ ଶତାବ୍ଦୀର ସବୁଠୁ ଭୟଙ୍କର ଝଡ଼ ଆସିଥିଲା ଭାରତ ମହାସାଗରୀୟ ଦ୍ୱୀପ ମାୟୋଟ୍ରେ । ସେଠାରେ ତାଣ୍ଡବ ରଚିଥିଲା ଝଡ଼ ‘ଚିଡ଼ୋ’ । ଘଣ୍ଟାପ୍ରତି ୨୨୫ କିମିରୁ ଅଧିକ ବେଗରେ ପବନ ବହିବା ଯୋଗୁ ବହୁସଂଖ୍ୟାରେ ବସ୍ତି ସମ୍ପୂର୍ଣ୍ଣ ଭାବେ ଭାଙ୍ଗିରୁଜି ଯାଇଥିଲା । ଏହାଯୋଗୁ ୧ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ଆଶଙ୍କା କରାଯାଇଥିଲା । ଫ୍ରାନ୍ସର ପାଣିପାଗ ବିଭାଗ ଅନୁସାରେ, ଚିଡ଼ୋ ଚତୁର୍ଥ ବର୍ଗର ଝଡ଼ ଥିଲା । ଡିସେମ୍ବର ୧୪-୧୫ରେ ଦକ୍ଷିଣ-ପଶ୍ଚିମ ଭାରତ ମହାସାଗର ଦେଇ ଏହି ଝଡ଼ ଗତି କରିଥିଲା । ପ୍ରଥମେ ଚିଡ଼ୋ ମାଡାଗାସ୍କରରେ ତାଣ୍ଡବ ରଚିଥିଲା । କିନ୍ତୁ ମାୟୋଟରେ ସର୍ବାଧିକ ପ୍ରଭାବ ପଡ଼ିଥିଲା । ଚିଡ଼ୋ ପ୍ରଭାବରେ ବହୁସଂଖ୍ୟାରେ ଘର କ୍ଷତିଗ୍ରସ୍ତ ହୋଇଥିଲା ।
