ନୂଆଦିଲ୍ଲୀ,୨୯/୦୮:ସାଧାରଣତଃ ଧାରଣ ରହିଛି ଯେ ଚିତାବାଘ ପାଣିରୁ ଦୂରେଇ ରୁହେ। ହେଲେ ଆଫ୍ରିକାରୁ ଭାରତକୁ ଅଣାଯାଇଥିବା ଚିତା ବର୍ଷ ବର୍ଷ ଧରି ରହିଆସିଥିବା ଚିନ୍ତାଧାରାକୁ ବଦଳାଇଦେଇଛି। କୁନୋ ଜାତୀୟ ଉଦ୍ୟାନରେ ଚିତା ଛୁଆମାନଙ୍କୁ ପହଁରୁଥିବାର ଦେଖିବାକୁ ମିଳିଛି। ଯାହାକୁ ନେଇ ଆଶ୍ଚର୍ଯ୍ୟ ହୋଇଛନ୍ତି ବିଶେଷଜ୍ଞ।
ସୂଚନା ମୁତାବକ, ଚିତା ପ୍ରୋଜେକ୍ଟ ବିଶେଷଜ୍ଞମାନେ ତିନି ବର୍ଷ ପୂର୍ବେ କହିଥିଲେ ଯେ, ଚିତାବାଘ ସାଧାରଣତଃ "ପାଣିରୁ ଦୂରରେ ରହେ" । କିନ୍ତୁ ନିକଟରେ ବର୍ଷା ସମୟରେ କିଛି ଚିତା ଛୁଆଙ୍କ ଏବଂ ସେମାନଙ୍କର ନାମିବିଆନ୍ ମା' କୁନୋ ନଦୀ ପାର ହୋଇ ପହଁରି ଯାଉଥିବାର ଦେଖାଯାଇଥିଲା। ଯାହା ଦୀର୍ଘଦିନର ବିଶ୍ୱାସକୁ ଖଣ୍ଡନ କରିଛି।
ଆଫ୍ରିକାରେ ପାଣିଠୁ ଦୂରରେ ରହିଥାନ୍ତି ଚିତା
ଆଫ୍ରିକାରେ ଚିତା ପାଣିଠାରୁ ଦୂରରେ ରହିବା ପାଇଁ ଜଣାଶୁଣା, କିନ୍ତୁ ଭାରତରେ ଜନ୍ମିତ ଚିତା ଛୁଆମାନେ ଏହି ଧାରଣାକୁ ଭୁଲ ପ୍ରମାଣିତ କରିଛନ୍ତି। ସେମାନେ କେବଳ ନଦୀ ନିକଟରେ ରୁହନ୍ତିନି, ବରଂ ପହଁରିକି କୁନୋ ଏବଂ ଚମ୍ବଲ ନଦୀ ପାର ହୋଇଛନ୍ତି। ଏନେଇ କୁନୋ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଉତ୍ତମ ଶର୍ମା କହିଛନ୍ତି, 'ଆମେ ଶାବକଗୁଡ଼ିକୁ ସହଜରେ ପହଁରୁଥିବାର ଦେଖିଛୁ।' ବିଶ୍ୱାସ କରାଯାଏ ଯେ 'ଜ୍ୱାଲା' ମଧ୍ୟ ତାଙ୍କ ଛୁଆମାନଙ୍କ ସହିତ ପହଁରି କୁନୋ ନଦୀ ପାର ହୋଇଥିଲା।
