ପୁରୀ,୧୬/୦୬: ମୁଖ୍ୟ ଶାସନ ସଚିବ ମନୋଜ କୁମାର ଆହୁଜା ରବିବାର ଅପରାହ୍ଣରେ ପୁରୀ ଗସ୍ତରେ ଆସି ଶ୍ରୀମନ୍ଦିର କାର୍ଯ୍ୟାଳୟଠାରେ ପହଞ୍ଚିଥିଲେ । ତାଙ୍କୁ ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ, ଓଏସ୍ଡି ଶୁଭ୍ରାଂଶୁ ଶେଖର ପାଢୀ ଓ ଲୋକ ସମ୍ପର୍କ ଅଧିକାରୀ ଜିତେନ୍ଦ୍ର କୁମାର ମହାନ୍ତି ପ୍ରମୁଖ ସ୍ୱାଗତ କରିଥିଲେ । ଏହି ଅବସରରେ ଶ୍ରୀ ଆହୁଜା ପ୍ରଥମେ ସିଂହଦ୍ୱାରକୁ ଯାଇ ଚିତ୍ର କାରୁକାର୍ଯ୍ୟକୁ ବୁଲି ଦେଖିଥିଲେ । ଠାକୁରଙ୍କ ଅଣସର ନୀତି ସମ୍ପର୍କରେ ବିସ୍ତୃତ ଭାବେ ଆଲୋଚନା କରିଥିଲେ । ଧାର୍ଯ୍ୟ ସମୟରେ ଠାକୁରଙ୍କ ନୀତିକାନ୍ତି ସମ୍ପନ୍ନ କରିବା ଉପରେ ଗୁରୁତ୍ୱାରୋପ କରିଥିଲେ । ମାତ୍ର ଠାକୁର ଅଣସର ଘରେ ଥିବାରୁ ଶ୍ରୀ ଆହୁଜା ଶ୍ରୀମନ୍ଦିର ପରିସରକୁ ଯାଇନଥିଲେ । ଗସ୍ତ ସମୟରେ ତାଙ୍କ ଧର୍ମପତ୍ନୀ ଆରତୀ ଆହୁଜା ଏବଂ ଅନ୍ୟମାନେ ଉପସ୍ଥିତ ଥିଲେ ।
ପରେ ମୁଖ୍ୟ ଶାସନ ସଚିବ ଶ୍ରୀ ଆହୁଜା ରଥଖଳାକୁ ଯାଇଥିଲେ । ତିନି ରଥର ନିର୍ମାଣ କାର୍ଯ୍ୟ ୭୦ ପ୍ରତିଶତ ପହଞ୍ଚିଲାଣି । ଶ୍ରୀ ଆହୁଜା ରଥଖଳାରେ ରଥ ନିର୍ମାଣ ସମ୍ପର୍କରେ ତିନି ରଥ ମୁଖ୍ୟ ବିଶ୍ୱକର୍ମା ଓ ଭୋଇ ସର୍ଦ୍ଦାରଙ୍କ ସହ ସହିତ ଆଲୋଚନା କରିଥିଲେ । ଧାର୍ଯ୍ୟ ସମୟ ପୂର୍ବରୁ ରଥନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେବ ବୋଲି ବିଶ୍ୱକର୍ମାମାନେ ମତ ଦେଇଥିଲେ । ବର୍ଷା ହେଉଥିବା ସତ୍ତେ୍ୱ ବିଶ୍ୱକର୍ମାମାନେ ରଥ ନିର୍ମାଣ କାର୍ଯ୍ୟରେ ବ୍ୟସ୍ତ ଥିବା ଦେଖି ବର୍ଷାରେ ଓଦା ନ ହେବାକୁ ପରାମର୍ଶ ଦେଇଥିଲେ । ବର୍ଷା ଛାଡ଼ିଲା ପରେ ରଥ ନିର୍ମାଣ କାର୍ଯ୍ୟ କରିବାକୁ ପରାମର୍ଶ ଦେଇଥିଲେ । ଏହି ସମୟରେ ଶ୍ରୀମନ୍ଦିର ପ୍ରଶାସନିକ ଅଧିକାରୀ, ସୁରକ୍ଷା ଅଧିକାରୀ ଓ ରଥ ତତ୍ତ୍ୱାବଧାରକ ଉପସ୍ଥିତ ଥିଲେ ।
