ନୂଆଦିଲ୍ଲୀ: ଆମେରିକା ଏବଂ ଚୀନ୍ ମଧ୍ୟରେ ଆରମ୍ଭ ହୋଇଥିବା ଟାରିଫ୍ ଯୁଦ୍ଧର କବଳରେ ଏବେ ଆଭିଏସନ ସେକ୍ଟର ବା ବିମାନ ଚଳାଚଳ କ୍ଷେତ୍ର ମଧ୍ୟ ପଡ଼ିଯାଇଛି। ଆମେରିକୀୟ କମ୍ପାନୀ ବୋଇଂଠାରୁ ଜେଟ୍ ଡେଲିଭରି ନ ନେବାକୁ ଚୀନ୍ ଏହାର ବିମାନ କମ୍ପାନୀ ଗୁଡ଼ିକୁ ନିର୍ଦ୍ଦେଶ ଦେଇଛି। ଚୀନ୍ ସରକାର ଏହାର ବିମାନ କମ୍ପାନୀ ଗୁଡ଼ିକୁ ଆମେରିକାରୁ ବିମାନ ଉପକରଣ ଏବଂ ଯନ୍ତ୍ରାଂଶ କିଣିବା ବନ୍ଦ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
ଆମେରିକା ଏବେ ଚୀନରୁ ଆମଦାନୀ ଉପରେ ୧୪୫ ପ୍ରତିଶତ ପର୍ଯ୍ୟନ୍ତ ଟାରିଫ୍ ଲାଗୁ କରୁଛି। ସେହି ସମୟରେ, ଚୀନ୍ ଆମେରିକୀୟ ଆମଦାନୀ ଉପରେ ୧୨୫ ପ୍ରତିଶତ ପ୍ରତିଶୋଧ ମୂଳକ ଶୁଳ୍କ ଲାଗୁ କରିଛି। ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ,ଚୀନ୍ ସରକାର ସେହି ଆଭିଏସନ କମ୍ପାନୀ ଗୁଡିକୁ ସାହାଯ୍ଯ କରିବାକୁ ବିଚାରକୁ ନେଉଛନ୍ତି, ଯେଉଁମାନେ ବୋଇଂ ଜେଟ୍ ବିମାନକୁ ଲିଜ୍ ଆଧାରରେ ନେଇଥାନ୍ତି, ଆଉ ଏଥିପାଇଁ ଅଧିକ ମୂଲ୍ୟ ଦେଇଥାନ୍ତି । ବର୍ତ୍ତମାନ, ବୋଇଂ ଏବଂ ସମ୍ପୃକ୍ତ ଚୀନ୍ ଏୟାରଲାଇନ୍ସ ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଆସିନାହିଁ।
ଆଭିଏସନ୍ ଫ୍ଲାଇଟ୍ସ ଗ୍ରୁପର ତଥ୍ୟ ଅନୁଯାୟୀ, ପ୍ରାୟ ୧୦ ଟି ବୋଇଂ ୭୩୭ ମ୍ୟାକ୍ସ ବିମାନ ଚୀନ୍ ବିମାନ ବାହିନୀରେ ସାମିଲ ହେବାକୁ ଯାଉଛି, ଯେଉଁଥିରେ ଚାଇନା ସଦର୍ଣ୍ଣ ଏୟାରଲାଇନ୍ସ କମ୍ପାନୀ, ଏୟାର ଚାଇନା ଲିମିଟେଡ୍ ଏବଂ ଜିଆମେନ୍ ଏୟାରଲାଇନ୍ସ କମ୍ପାନୀର ଦୁଇଟି ଲେଖାଏଁ ବିମାନ ସାମିଲ ଅଛି। ପ୍ରଡକ୍ସନ ଟ୍ରାକିଂ ଫାର୍ମର ୱେବସାଇଟ୍ ଅନୁଯାୟୀ, କିଛି ଜେଟ୍ ସିଆଟେଲରେ ବୋଇଂର ଫ୍ୟାକ୍ଟ୍ରି ବେସ୍ ନିକଟରେ ପାର୍କିଂ କରାଯାଇଛି, ଯେତେବେଳେ ଅନ୍ୟଗୁଡ଼ିକ ପୂର୍ବ ଚୀନର ଝୌସାନରେ ଏକ ଫିନିସିଂ ସେଣ୍ଟରରେ ଅଛି। ଯେଉଁ ବିମାନ ଗୁଡ଼ିକର କାଗଜପତ୍ର ଏବଂ ଦେୟ ପୂର୍ବରୁ ହୋଇସାରିଛି, ସେମାନଙ୍କୁ ପ୍ରତ୍ୟେକ କ୍ଷେତ୍ର ଆଧାରରେ ଅନୁମୋଦନ ମିଳିପାରିବ।
ସୂଚନାଥାଉକି, ଚୀନ୍ ବିଶ୍ୱର ଦ୍ୱିତୀୟ ବୃହତ୍ତମ ବିମାନ ବଜାର। ଆଗାମୀ ୨୦ ବର୍ଷ ମଧ୍ୟରେ ବିଶ୍ୱ ବିମାନ ଚାହିଦାରେ ଚୀନର ୨୦ ପ୍ରତିଶତ ଅଂଶ ରହିବ ବୋଲି ଆଶା କରାଯାଉଛି।
