ନୂଆଦିଲ୍ଲୀ: ପାକିସ୍ତାନରେ ଆତଙ୍କବାଦୀଙ୍କୁ ଆକ୍ରମଣରୁ କେହି ବର୍ତ୍ତି ପାରୁନାହାନ୍ତି । ପାକିସ୍ତାନର ନିଜ ନାଗରିକ ହୁଅନ୍ତୁ କିମ୍ବା ପାକିସ୍ତାନର ପ୍ରକଳ୍ପରେ କାମ କରୁଥିବା ଏହାର ସବୁଠାରୁ ଭଲ ବନ୍ଧୁ ଚୀନର ନାଗରିକ ହୁଅନ୍ତୁ, ସମସ୍ତେ ଭୟଭୀତ । ପାକିସ୍ତାନର ଶାହବାଜ ସରକାର ଚୀନକୁ ତାର ନାଗରିକଙ୍କ ସୁରକ୍ଷାର ଗ୍ୟାରେଣ୍ଟି ଦେଇପାରୁନାହାନ୍ତି । ଏହାକୁ ନେଇ ଏସସିଓ ସମ୍ମିଳନୀ ଏବଂ ପରେଡରେ ଯୋଗ ଦେବାକୁ ଯାଇଥିବା ଶାହବାଜ ସରିଫଙ୍କୁ ସି ଜିନପିଙ୍ଗ ତାଙ୍କୁ କୋଣଠେସା କରିଛନ୍ତି ।
ଚୀନ୍ ରାଷ୍ଟ୍ରପତି ସି ଜିନପିଙ୍ଗ ମଙ୍ଗଳବାର ପାକିସ୍ତାନରେ କୋଟି କୋଟି ଡଲାର ମୂଲ୍ୟର ପ୍ରକଳ୍ପରେ କାମ କରୁଥିବା ଚୀନ୍ ନାଗରିକଙ୍କ ସୁରକ୍ଷା କଡ଼ାକଡ଼ି କରିବାକୁ ଚାପ ପକାଇଛନ୍ତି । ଗତ ବର୍ଷଗୁଡ଼ିକରେ ଚୀନ୍ ନାଗରିକମାନେ ଅନେକ ଥର ଆତଙ୍କବାଦୀ ଆକ୍ରମଣର ଶିକାର ହୋଇଛନ୍ତି । ପାକିସ୍ତାନ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ବିଶ୍ୱସ୍ତରୀୟ ବେଲ୍ଟ ଆଣ୍ଡ୍ ରୋଡ୍ ଇନିସିଏଟିଭ୍ (BRI) ପ୍ରକଳ୍ପର ଏକ କେନ୍ଦ୍ରବିନ୍ଦୁ। କିନ୍ତୁ ଦେଶରେ ଚୀନ୍ ଶ୍ରମିକଙ୍କ ସୁରକ୍ଷା ପ୍ରତି ବିପଦ ଦୁଇ ଘନିଷ୍ଠ ସହଯୋଗୀଙ୍କ ମଧ୍ୟରେ ଉତ୍ତେଜନାର କାରଣ ପାଲଟିଛି ।
ଚୀନର ସରକାରୀ ଖବର ସରବରାହ ସଂସ୍ଥା ଜିନହୁଆ ଅନୁଯାୟୀ, ‘ଚୀନ ଆତଙ୍କବାଦ ବିରୋଧରେ ପାକିସ୍ତାନର ଲଢ଼େଇକୁ ସମର୍ଥନ କରେ ଏବଂ ଆଶା କରେ ଯେ, ପାକିସ୍ତାନରେ ଚୀନ୍ କର୍ମଚାରୀ, ପ୍ରକଳ୍ପ ଏବଂ ପ୍ରତିଷ୍ଠାନଗୁଡ଼ିକର ସୁରକ୍ଷା ସୁନିଶ୍ଚିତ କରିବା ପାଇଁ ପ୍ରଭାବଶାଳୀ ପଦକ୍ଷେପ ନେବ ଏବଂ ଦ୍ୱିପାକ୍ଷିକ ସହଯୋଗ ପାଇଁ ଏକ ସୁରକ୍ଷିତ ପରିବେଶ ସୃଷ୍ଟି କରିବ ।’ ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀ ଅବସରରେ ପାକିସ୍ତାନ ପ୍ରଧାନମନ୍ତ୍ରୀଙ୍କ ସହ ଏକ ବୈଠକରେ ଜିନପିଙ୍ଗ ଏହା କହିଥିବା ଜଣାପଡ଼ିଛି । ଯଦିଓ ପାକିସ୍ତାନ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ହୋଇଥିବା ପ୍ରେସ୍ ବ୍ରିଫ୍ରେ ଜିନପିଙ୍ଗଙ୍କ ସହ ସାକ୍ଷାତ ବିଷୟରେ ଉଲ୍ଲେଖ କରାଯାଇଛି, କିନ୍ତୁ ସୁରକ୍ଷା ପ୍ରସଙ୍ଗ ଉଲ୍ଲେଖ କରାଯାଇ ନାହିଁ ।
ପାକିସ୍ତାନ ସରକାର ଚୀନ୍ ପ୍ରକଳ୍ପ ଏବଂ କର୍ମଚାରୀମାନଙ୍କୁ ସୁରକ୍ଷା ଦେବା ପାଇଁ ହଜାର ହଜାର ସୈନ୍ୟ, ଅର୍ଦ୍ଧସାମରିକ ବାହିନୀ ଏବଂ ପୁଲିସ ମୁତୟନ କରିଛନ୍ତି। କିନ୍ତୁ ବେଜିଂ ତାର ସୁରକ୍ଷା କର୍ମୀମାନଙ୍କୁ ନିୟୋଜିତ କରିବାକୁ ଅନୁମତି ଦେବା ପାଇଁ ଇସଲାମାବାଦ ଉପରେ ଚାପ ପକାଉଛି । ଗତ ୧୦ ବର୍ଷ ମଧ୍ୟରେ ଚୀନ୍ ପାକିସ୍ତାନରେ ବିଦ୍ୟୁତ୍ ପ୍ଲାଣ୍ଟ ଏବଂ ରାସ୍ତା ନିର୍ମାଣ କରିଛି । ଭାରତ ମହାସାଗରରେ ପାକିସ୍ତାନର ଗ୍ୱାଦର ବନ୍ଦରକୁ ବିକଶିତ କରିଛି । ଏହା ବ୍ୟତୀତ, ଚୀନ୍ ପାକିସ୍ତାନରେ ଆହୁରି ଅନେକ ନିବେଶ କରିଛି । କିନ୍ତୁ ସୁରକ୍ଷା ଚିନ୍ତା ଯୋଗୁଁ ଚୀନ୍ ଦ୍ୱାରା ଯୋଜନା କରାଯାଇଥିବା ୬୦ ବିଲିୟନ ଡଲାରର ବେଲ୍ଟ ଆଣ୍ଡ ରୋଡ୍ ନିବେଶର ଅଧିକାଂଶ ସ୍ଥଗିତ ରଖାଯାଇଛି ।
ଜିହାଦୀ ଏବଂ ବିଚ୍ଛିନ୍ନତାବାଦୀ ଉଭୟ ଚୀନ୍ କର୍ମଚାରୀଙ୍କୁ ଟାର୍ଗେଟ କରୁଛନ୍ତି । ବିଶେଷକରି ଦକ୍ଷିଣ-ପଶ୍ଚିମ ବେଲୁଚିସ୍ତାନ ପ୍ରଦେଶରେ ଯେଉଁଠାରେ ଗ୍ୱାଦର ଅବସ୍ଥିତ, ସେଠାରେ ଚୀନ୍ ପ୍ରକଳ୍ପଗୁଡ଼ିକ କ୍ଷତିଗ୍ରସ୍ତ ହୋଇଛି । ବିଚ୍ଛିନ୍ନତାବାଦୀମାନେ ମଧ୍ୟ ଏହି ଅଞ୍ଚଳରେ ପାକିସ୍ତାନୀ ସୁରକ୍ଷା ବାହିନୀ ଉପରେ ଆକ୍ରମଣ ବୃଦ୍ଧି କରିଛନ୍ତି । ଫଳରେ ଚୀନ୍ ଭବିଷ୍ୟତ ଯୋଜନା ବିଷୟରେ ଚିନ୍ତିତ ହୋଇପଡ଼ିଛି ବୋଲି କୁହାଯାଉଛି ।
