ମୋହନା,୧୨/୧୨: ଗଜପତି ଜିଲ୍ଲା ମୋହନା ବ୍ଲକ୍ ଅନ୍ତର୍ଗତ ଚିଟିଙ୍ଗ ଘାଟିରେ ଏକ ପିକ୍ଅପ୍ ଭ୍ୟାନ୍ ଓଲଟିବାରୁ ୪ ଜଣଙ୍କର ମୃତ୍ୟୁ ହୋଇଛି । ମୃତକମାନେ ହେଲେ ରାୟଗଡ଼ ବ୍ଲକ୍ ରାମଗିରି ଥାନା ଅଧୀନ କେକେସିଂ ଗ୍ରାମର ବାସନ୍ତୀ ଭୂୟାଁ(୬୫), ଚନ୍ଦ୍ରମା ଭୂୟାଁ(୬୬), ରାଧା କୁଡୁମ୍ବ (୫୬) ଓ ହରିବନ୍ଧୁ ଗମାଙ୍ଗ (୬୦) । ବାସନ୍ତୀ ଓ ଚନ୍ଦ୍ରମାଙ୍କର ଚନ୍ଦ୍ରଗିରି ମେଡିକାଲରେ ମୃତ୍ୟୁ ହୋଇଥିବା ବେଳେ ରାଧା ଓ ହରିବନ୍ଧୁଙ୍କର ବ୍ରହ୍ମପୁର ଡାକ୍ତରଖାନାରେ ମୃତ୍ୟୁ ହୋଇଥିବା ମୋହନା ଥାନା ଅଧିକାରୀ ବସନ୍ତ ସେଠୀ କହିଛନ୍ତି ।
ଏହି ଦୁର୍ଘଟଣାରେ ୩୦ରୁ ଅଧିକ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଚନ୍ଦ୍ରଗିରି ଡାକ୍ତରଖାନାରେ ୧୨ ଜଣ ଓ ବ୍ରହ୍ମପୁର ଡାକ୍ତରଖାନାରେ ୨୨ ଜଣଙ୍କୁ ଭର୍ତ୍ତି କରାଯାଇଛି । ସବିତା ଭୂୟାଁ, ସୁଶୀଳା ଭୂୟାଁ ଓ ସଞ୍ଜୁ ଭୂୟାଁଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି ବୋଲି ଡା.ଏନ ଜୟ ପ୍ରକାଶ କହିଛନ୍ତି । ବ୍ରହ୍ମପୁର ଏମ୍କେସିଜି ଆଇସିୟୁରେ ଜଣେ ଆହତଙ୍କୁ ଭର୍ତ୍ତି କରାଯାଇଛି । ଡ୍ରାଇଭର ଘଟଣାସ୍ଥଳରୁ ଚମ୍ପଟ୍ ମାରିଛି । ବୁଧବାର ସକାଳ ୧୦ଟାରେ ଅନ୍ୟ ଏକ ଗାଡ଼ିକୁ ଓଭରଟେକ୍ କରିବା ସମୟରେ ଏହି ଦୁର୍ଘଟଣା ଘଟିଥିବା ପୁଲିସ ତଦନ୍ତରୁ ଜଣାପଡ଼ିଛି ।
ଏକ ପିକ୍ଅପ୍ ଭ୍ୟାନ୍ (ଓଡି ୦୫ ଏଏ ୯୬୭୬)ରେ ୩୬ ଜଣ ରାମଗିରି କେକେସିଂ ଗାଁରୁ ମୋହନା ଥାନା ଘାଇବାଲି ଗାଁକୁ ଶୁଦ୍ଧିକ୍ରିୟା ଭୋଜିକୁ ଯାଉଥିଲେ । ୩୫ କିଲୋମିଟର ଆସିବା ପରେ ଚନ୍ଦ୍ରଗିରି ଚିଟିଙ୍ଗ ଘାଟିରେ ଭାରସାମ୍ୟ ହରାଇ ଭ୍ୟାନ୍ଟି ଓଲଟି ପଡ଼ିଥିଲା । ରାସ୍ତା କଡ଼କୁ ଛିଟିକି ଖଣ୍ଡିଆ ଖାବରା ହୋଇ ଏଣେତେଣେ ପଡ଼ିଥିଲେ ଯାତ୍ରୀ । କାନ୍ଦ, ବୋବାଳି, ଚିତ୍କାର ଶୁଣି ସ୍ଥାନୀୟ ଲୋକ ଦୌଡ଼ି ଆସିଥିଲେ। ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । ମାତ୍ର କର୍ମଚାରୀ ଧର୍ମଘଟରେ ଥିବାରୁ ଗାଡ଼ି ଆସିଲା ନାହିଁ । ଆହତଙ୍କୁ ମେଡିକାଲ ନେବାରେ ସମସ୍ୟା ହୋଇଥିଲା । ସ୍ଥାନୀୟ ଲୋକ ସମସ୍ତ ଆହତଙ୍କୁ ଉଦ୍ଧାର କରି ଅଟୋ, ବାଇକ୍ରେ ଚନ୍ଦ୍ରଗିରି ଡାକ୍ତରଖାନା ନେଇଥିଲେ ।
ମୋହନା ଥାନା ପୁଲିସ, ରା. ଉଦୟଗିରି ଏସ୍ଡିପିଓ ଆଲୋକ ରାଏ ଘଟଣା ସ୍ଥଳରେ ପହଞ୍ଚି ତଦନ୍ତ କରିଛନ୍ତି । ଥାନାରେ ମାମଲା ରୁଜୁ କରାଯାଇ ତଦନ୍ତ ଜାରି ରହିଥିବା ଥାନା ଅଧିକାରୀ କହିଛନ୍ତି ।
