ଭୁବନେଶ୍ୱର,୧୩/୧୨: ସରିଆସୁଛି ବର୍ଷ । ଆଉ ଦିନ କେଇଟା ପରେ ବଡ଼ଦିନ । ଏଥିପାଇଁ କେବଳ ଖ୍ରୀଷ୍ଟଧର୍ମାବଲମ୍ବୀ ନୁହନ୍ତି, ସମସ୍ତଙ୍କ ମନରେ ଉତ୍ସାହ । ଚର୍ଚ୍ଚଠାରୁ ଆରମ୍ଭ କରି ବିଭିନ୍ନ ଶୋ’ରୁମ୍ ସବୁଠି ଆରମ୍ଭ ହୋଇଗଲାଣି ପ୍ରସ୍ତୁତି । ଏହାକୁ ଦୃଷ୍ଟିରେ ରଖି ରାଜଧାନୀରେ ଦୋକାନ ବଜାର ବି ଖୋଲିଲାଣି । ସିଆରପି ଓ ବରମୁଣ୍ଡା, ସତ୍ୟନଗର, ୟୁନିଟ୍-୧ ସହ ସହରର ବିଭିନ୍ନ ସ୍ଥାନରେ ପ୍ରଭୁ ଯୀଶୁଙ୍କୁ ପ୍ରାର୍ଥନା ପାଇଁ ବିଭିନ୍ନ ସାମଗ୍ରୀ, ସାନ୍ତା କ୍ଲଜ୍ ପୋଷାକ, ଟୋପି, ମୁଖା, ଖ୍ରୀଷ୍ଟମାସ ଟ୍ରି, କାର୍ଟୁନ ଓ ଦୋଳିରେ ବସିଥିବା ସାନ୍ତା ଆଦି ବିକ୍ରି ହେଉଛି । ମନ ପସନ୍ଦର ସାନ୍ତାଙ୍କୁ ଘରକୁ ଆଣିବାକୁ ଗୋଟିଏ ପରେ ଗୋଟିଏ ଦୋକାନ ବୁଲୁଛନ୍ତି ଉତ୍ସାହୀ ରାଜଧାନୀବାସୀ ।
ସାନ୍ତାର ଦାମ୍ ୫୦ଟଙ୍କାରୁ ଆରମ୍ଭ । ବାଉଁଶ, କୁଟା, ନଡ଼ିଆ କତା ଓ କାଠିରେ ଘର ତିଆରି କରି ବିକ୍ରି କରାଯାଉଛି । ଯେଉଁଥିରେ ଯୀଶୁଙ୍କ ଜନ୍ମ ସମୟ ସହ ବିଭିନ୍ନ ଘଟଣାବଳୀ ରହିଛି । ଏହାର ମୂଲ୍ୟ କେଉଁଠି ୩୦୦ ତ ଆଉ କେଉଁଠି ୫୦୦ରୁ ଆରମ୍ଭ । ଏହି ହାତ ତିଆରି ଯୀଶୁଙ୍କ ଘରର ଚାହିଦା ବହୁତ ଅଧିକ । ସେହିପରି ଖ୍ରୀଷ୍ଟମାସ ଟ୍ରି ୫୦ଟଙ୍କାରୁ ଆରମ୍ଭ । ସେଥିରେ ଲାଇଟ୍, ଗିପ୍ଟ ଓ ବେଲ୍ ଲଗାଇବା ଲାଗି ଅଲଗା ଦାମ୍ ରହିଛି । ଷ୍ଟାର ୨୦ ଟଙ୍କାରୁ ଆରମ୍ଭ ହୋଇ ୧୦୦୦ଟଙ୍କା, ଲାଇଟିଙ୍ଗ ଷ୍ଟାର ୧୦୦ରୁ ୩ହଜାର ରହିଛି ।
ବଲ ଓ ବେଲ୍ ୨୫ଟଙ୍କାରୁ ଆରମ୍ଭ, ସାନ୍ତା ଟ୍ରି ୧ଫିଟ୍ରୁ ୧୦ ଫିଟ୍ ଉଚ୍ଚର ମିଳୁଛି । ସେହିପରି ଟେବୁଲ ଟ୍ରି ୧୦ରୁ ୧୪ହଜାର, ସାନ୍ତା ଡ୍ରେସ ୧୦୦ରୁ ୨୦୦ଟଙ୍କା, ଟୋପି ୩୦ରୁ ୨୦୦ଟଙ୍କା, ଘର ସଜାଇବା ପାଇଁ ଝୁମର ୨୫୦ରୁ ଆରମ୍ଭ । ଘର ସାଜସଜ୍ଜା ପାଇଁ ରେଡ୍ ୱାଇନ୍ ଜରିମାଳ, ବଲ୍ ଷ୍ଟାର ପରି ବିଭିନ୍ନ ରଙ୍ଗବେରଙ୍ଗ ଜରିମାଳ (ଟେନିସ୍ ହାର) ୫୦ରୁ ୧୨୦ ଟଙ୍କାରେ ବିକ୍ରି ହେଉଛି । ଗୋଆରୁ କ୍ରିପ୍ ସେଟ୍, କୋଲକାତା, ଗୋଆ, କେରଳରୁ ଏସବୁ ସାମଗ୍ରୀ ଅଣାଯାଇଛି । ରିତ୍ ୨୦ଟଙ୍କାରୁ ଆରମ୍ଭ ହୋଇ ୨ହଜାର ଯାଏ ରହିଛି । ଉପହାର ସେଟ୍ ମଧ୍ୟ ୧୦୦ରୁ ଆରମ୍ଭ ।
