ନୂଆଦିଲ୍ଲୀ: ଇସ୍ରାଏଲ-ହାମାସ ଯୁଦ୍ଧବିରତିକୁ ନେଇ ମଧ୍ୟସ୍ଥତା ପରେ ଏବେ ଇସ୍ରାଏଲ ଗସ୍ତରେ ଅଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସୋମବାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଇସ୍ରାଏଲୀ ବନ୍ଧୁ ତଥା ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ବିରୁଦ୍ଧରେ ଥିବା ଦୁର୍ନୀତି ମାମଲାରେ ତାଙ୍କୁ କ୍ଷମା ଦେବାକୁ ଇସ୍ରାଏଲ ରାଷ୍ଟ୍ରପତିଙ୍କୁ ଅନୁରୋଧ କରିଛନ୍ତି। ଆମେରିକୀୟ ରାଷ୍ଟ୍ରପତି ନେତାନ୍ୟାହୁଙ୍କ ବିରୁଦ୍ଧରେ ଥିବା ଅଭିଯୋଗକୁ ପରିହାସ କରିଛନ୍ତି । ସେ କହିଛନ୍ତି କି "ସିଗାର ଏବଂ ସାମ୍ପେନ ବିଷୟରେ କିଏ ଚିନ୍ତା କରୁଛି ?"। ନେତାନ୍ୟାହୁ ହେଉଛନ୍ତି ପ୍ରଥମ ଇସ୍ରାଏଲୀ ପ୍ରଧାନମନ୍ତ୍ରୀ ଯିଏ ବିଚାର ପାଇଁ ଠିଆ ହୋଇଛନ୍ତି। ଏହି ସମୟରେ ସେ କହିଛନ୍ତି କି, ରାଷ୍ଟ୍ରପତି ମହାଶୟ (ଆଇଜାକ୍ ହର୍ଜୋଗ୍), ଆପଣ ତାଙ୍କୁ କାହିଁକି କ୍ଷମା ଦେଉନାହାଁନ୍ତି ।
ତେବେ ଟ୍ରମ୍ପ ତାଙ୍କ ଭାଷଣ ସମୟରେ ଇସ୍ରାଏଲୀ ପ୍ରଧାନମନ୍ତ୍ରୀଙ୍କ ପାଇଁ ଏହା ଯୋଡିଥିଲେ। ସେ ଇସ୍ରାଏଲୀ ପ୍ରଧାନମନ୍ତ୍ରୀଙ୍କ ବିରୁଦ୍ଧରେ ଦୁର୍ନୀତି, ଠକେଇ ଏବଂ ମନି ଲଣ୍ଡରିଂ ଅଭିଯୋଗ ବିଷୟରେ କହିଥିଲେ। ସେ ଆହୁରି ମଧ୍ୟ କହିଥିଲେ ଯେ, ମୁଁ ଏଠାରେ ଏହି ଭଦ୍ରଲୋକଙ୍କୁ ପସନ୍ଦ କରୁଛି ।
ସୂଚନାଥାଉକି, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ବିରୋଧରେ ଚାଲିଥିବା ଦୁର୍ନୀତି ମାମଲା ସମ୍ପର୍କରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ପ୍ରମୁଖ ବିବୃତ୍ତି ଜାରି କରିଛନ୍ତି। ଟ୍ରମ୍ପ ଏହାକୁ ଏକ ରାଜନୈତିକ ଷଡ଼ଯନ୍ତ୍ର ଏବଂ ପାଗଳାମି ବୋଲି କହିଛନ୍ତି। ସେ ଏହା ମଧ୍ୟ କହିଛନ୍ତି ଯେ ଆମେରିକା ଏହାକୁ ସହିବ ନାହିଁ। ଟ୍ରମ୍ପ ସ୍ପଷ୍ଟ ଭାବରେ କହିଛନ୍ତି ଯେ ଆମେରିକା ପ୍ରତିବର୍ଷ ଇସ୍ରାଏଲର ସୁରକ୍ଷା ପାଇଁ କୋଟି କୋଟି ଡଲାର ଖର୍ଚ୍ଚ କରେ, ଅନ୍ୟ କୌଣସି ଦେଶ ଅପେକ୍ଷା ବହୁତ ଅଧିକ। ତେଣୁ, ସେ ନେତାନ୍ୟାହୁଙ୍କ ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନରେ ସହ୍ୟ କରିପାରିବେ ନାହିଁ।
ସିଗାର ଏବଂ ସାମ୍ପେନ୍ ମାମଲା କ’ଣ ?
ଏହି ମାମଲାରେ, ନେତାନ୍ୟାହୁ ଏବଂ ତାଙ୍କ ପତ୍ନୀ ସାରାଙ୍କ ଉପରେ ରାଜନୈତିକ ଅନୁଗ୍ରହ ବଦଳରେ ଧନୀ ବ୍ୟବସାୟୀଙ୍କ ଠାରୁ ସିଗାର, ଅଳଙ୍କାର ଏବଂ ସାମ୍ପେନ୍ ଭଳି ମହଙ୍ଗା ଉପହାର ଗ୍ରହଣ କରିବାର ଅଭିଯୋଗ ହୋଇଛି, ଯାହାର ମୂଲ୍ୟ ପ୍ରାୟ ୨ ଲକ୍ଷ ୬୦ ହଜାର ଡଲାର ।
