ନୂଆଦିଲ୍ଲୀ,୨୧/୦୮: ଆମେରିକାର ତଦନ୍ତକାରୀ ସଂସ୍ଥା ଏଫବିଆଇକୁ ବଡ଼ ସଫଳତା । ୧୦ ଜଣ ମୋଷ୍ଟ ୱାଣ୍ଟେଡ୍ ପଳାତକ ତାଲିକାରେ ଥିବା ମହିଳା ସିଣ୍ଡି ରୋଡ୍ରିଗେଜ୍ ସିଂହକୁ ଭାରତରେ ଗିରଫ କଲା ଏଫବିଆଇର । ଭାରତୀୟ ପୁଲିସ ସହିତ ମିଶି ସିଣ୍ଡି ରୋଡ୍ରିଗେଜ୍କୁ ଗିରଫ କରିଛି ଏଫବିଆଇ। ତେବେ ସିଣ୍ଡି ରୋଡ୍ରିଗେଜ୍ ଆମେରିକାର ମୋଷ୍ଟ ୱାଣ୍ଟେଡ୍ ଅଫରାଧୀ ମଧ୍ୟରୁ ଜଣେ । ତାଙ୍କ ଉପରେ ନିଜ ୬ ବର୍ଷର ପୁଅକୁ ହତ୍ୟା କରିବାର ଅଭିଯୋଗ ଥିଲା। ରୋଡ୍ରିଗେଜ୍ଙ୍କୁ ଗିରଫ କରି ଆମେରିକା ଫେରାଇ ନିଆଯାଇଛି। ତାଙ୍କୁ ଟେକ୍ସାସ ପୁଲିସକୁ ହସ୍ତାନ୍ତର କରିବ ଏଫବିଆଇ। ଟେକ୍ସାସରେ ହିଁ ସିଣ୍ଡିଙ୍କ ବିରୋଧରେ ଏକ ମାମଲା ରୁଜୁ କରାଯାଇଛି।
ଏଫବିଆଇ ନିର୍ଦ୍ଦେଶକ କାଶ ପଟେଲ ସୋସିଆଲ ମିଡିଆରେ ସେୟାର କରାଯାଇଥିବା ଏକ ପୋଷ୍ଟରେ କହିଛନ୍ତି ଯେ, ଏଫବିଆଇ ଆମେରିକାର ଶ୍ରେଷ୍ଠ ୧୦ ପଳାତକ ଅପରାଧୀଙ୍କ ମଧ୍ୟରୁ ଜଣେ ସିଣ୍ଡି ରୋଡ୍ରିଗ୍ୱେଜ୍ ସିଂହଙ୍କୁ ଗିରଫ କରିଛି। ସିଣ୍ଡି ତାଙ୍କ ପୁଅର ହତ୍ୟା ପାଇଁ ଖୋଜାଯାଉଥିଲା। କାଶ ପଟେଲ କହିଛନ୍ତି ଯେ, ମାର୍ଚ୍ଚ ୨୦୨୩ ରେ, ଟେକ୍ସାସର ଏଭରମ୍ୟାନର ପୁଲିସ ସିଣ୍ଡିଙ୍କ ପୁଅକୁ ଖୋଜିବା ଆରମ୍ଭ କରିଥିଲା। ସିଣ୍ଡି ତାଙ୍କ ପୁଅ ବିଷୟରେ ପୁଲିସକୁ ମିଛ କହିଥିଲେ ଏବଂ ପୁଲିସକୁ ଭ୍ରମିତ କରିଥିଲେ। ପୁଲିସ ପଚରାଉଚରା ପରେ ସିଣ୍ଡି ଆମେରିକାରୁ ପଳାଇ ଭାରତରେ ପହଞ୍ଚିଥିଲେ।
ଅକ୍ଟୋବର ୨୦୨୩ରେ,ସିଣ୍ଡିଙ୍କ ବିରୁଦ୍ଧରେ ତାଙ୍କ ପୁଅର ହତ୍ୟା ମାମଲା ରୁଜୁ ହୋଇଥିଲା। ସେହି ବର୍ଷ ନଭେମ୍ବରରେ, ପୁଲିସ ସିଣ୍ଡିଙ୍କ ଗିରଫଦାରୀ ପାଇଁ ୱାରେଣ୍ଟ ଜାରି କରିଥିଲା। କାଶ ପଟେଲ କହିଛନ୍ତି ଯେ ଗତ ୭ମାସରେ, ଏଫବିଆଇ ଶ୍ରେଷ୍ଠ ୧୦ ପଳାତକଙ୍କ ମଧ୍ୟରୁ ଚାରି ଜଣଙ୍କୁ ଗିରଫ କରିଛି। ଭାରତୀୟ ପୁଲିସ ଏବଂ ପ୍ରଶାସନକୁ ସେମାନଙ୍କର ସହଯୋଗ ପାଇଁ ଧନ୍ୟବାଦ ମଧ୍ୟ ଦେଇଛନ୍ତି କାଶ ପଟେଲ। ସିଣ୍ଡି ରୋଡ୍ରିଗେଜଙ୍କ ଉପରେ ୫ ହଜାର ଡଲାର ପୁରସ୍କାର ଘୋଷଣା କରାଯାଇଥିଲା। ତେବେ ସିଣ୍ଡି ରୋଡ୍ରିଗେଜ ମେକ୍ସିକାନ୍ ଏବଂ ଭାରତୀୟ ବଂଶୋଦ୍ଭବ।
