ମୁମ୍ବାଇ,୦୯/୦୧: ସେୟାର ବଜାରରେ ଏବେ ଅନେକ ଉତ୍ଥାନ ପତନ ଦେଖିବାକୁ ମିଳୁଛି । ତେବେ ଭାରତୀୟ ସେୟାର ବଜାରକୁ ନେଇ ଆଶାବାଦୀ ଅଛି ସିଟି ଗ୍ରୁପ୍ । ନିଜ ରିପୋର୍ଟରେ ଆମେରିକାର ଏହି ପ୍ରମୁଖ ବ୍ୟାଙ୍କ ଆକଳନ କରିଛି ଯେ, ଭାରତର ୫ ଟ୍ରିଲିୟନ ଡଲାର ସେୟାର ବଜାରରେ ଲଗାତର ଦଶମ ବର୍ଷ ବୃଦ୍ଧି ଦେଖିବାକୁ ମିଳିବ । ବ୍ୟାଙ୍କ୍ର କହିବାନୁସାରେ, ଆର୍ଥିକ ବିକାଶରେ ସୁଧାର ସହ ମଜଭୁତ କର୍ପୋରେଟ୍ ଆୟ ଯୋଗୁ ଘରୋଇ ସେୟାର୍ ବଜାରରେ ଦ୍ରୁତ ବୃଦ୍ଧି ଅନୁମାନ ରହିଛି । ଏହା ଏ ବର୍ଷ ୧୮% ବଢ଼ିପାରେ ।
ଚଳିତବର୍ଷ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୫୦ ସୂଚକାଙ୍କ ୨୬,୦୦୦ ପଏଣ୍ଟ ଛୁଇଁବ ବୋଲି ଅନୁମାନ କରିଛି ସିଟି ଗ୍ରୁପ୍। ଅର୍ଥାତ୍ ଏ ବର୍ଷ ଏଥିରେ ୧୦% ବୃଦ୍ଧି ଦେଖିବାକୁ ମିଳିବ । ଗତବର୍ଷ ସିଟି ବ୍ୟାଙ୍କ ପକ୍ଷରୁ ୨୨,୫୦୦ ପଏଣ୍ଟ ପର୍ଯ୍ୟନ୍ତ ନିଫ୍ଟି ଯିବ ବୋଲି ଅନୁମାନ କରାଯାଇଥିବାବେଳେ ଏହାଠାରୁ ୫% ଅଧିକ ବଢ଼ିଛି ନିଫ୍ଟି ।
ବ୍ୟାଙ୍କ ପକ୍ଷରୁ କୁହାଯାଇଛି ଯେ, ପୁଞ୍ଜି ବଜାରରେ ତାଲିକାଭୁକ୍ତ କମ୍ପାନିଗୁଡ଼ିକର ବିବିଧ ବ୍ୟବସାୟକୁ ଦୃଷ୍ଟିରେ ରଖି ଭାରତର ଅଭିବୃଦ୍ଧି ଦୃଶ୍ୟପଟ ମଜଭୁତ ଏବଂ ଅପେକ୍ଷାକୃତ କମ୍ ରିସ୍କପୂର୍ଣ୍ଣ ଲାଗୁଛି । କିଛି ନୀତିଗତ ସହାୟତା ସହ ବର୍ଷ ୨୦୨୫ରେ ଅର୍ଥନୀତି ୬.୫% ଅଭିବୃଦ୍ଧିକୁ ଫେରିପାରେ । କିନ୍ତୁ ଘରୋଇ ନିବେଶରେ ମଜଭୁତ ସୁଧାର ଏତେ ଶୀଘ୍ର ଆସି ନ ପାରେ ।
ସିଟି ଗ୍ରୁପ୍ ପୂର୍ବରୁ ମୋର୍ଗାନ ଷ୍ଟେନ୍ଲୀ ବି ଭାରତୀୟ ବଜାର ପାଇଁ ଦୁଇ ଅଙ୍କ ରିଟର୍ଣ୍ଣର ଭବିଷ୍ୟବାଣୀ କରିଥିଲା । ବ୍ରୋକରେଜ୍ ସଂସ୍ଥାର କହିବାନୁସାରେ, ବିଏସ୍ଇ ସେନ୍ସେକ୍ସ ୨୦୨୫ରେ ୧୮% ରିଟର୍ଣ୍ଣ ଦେବ । ଏହାର କାରଣ ହେଉଛି ଖୁଚୁରା କ୍ରୟ ନୂଆ ସେୟାର ଯୋଗାଣଠାରୁ ଆଗରେ ରହିବ ।
ସୂଚନାଯୋଗ୍ୟ, ୨୦୨୪ରେ ବ୍ୟକ୍ତିଗତ ନିବେଶକ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ ଅଫ୍ ଇଣ୍ଡିଆ ଲିମିଟେଡ୍ରେ ୧.୫ ଲକ୍ଷ କୋଟି ଟଙ୍କାର ସେୟାର କିଣିଛନ୍ତି, ଯାହା ଏକ ରେକର୍ଡ । ବଜାର ବିଶେଷଜ୍ଞମାନଙ୍କ କହିବାନୁସାରେ, ମଜଭୁତ ଘରୋଇ ପୁଞ୍ଜି ପ୍ରବାହ ମନ୍ଥର ଚାହିଦା, ନିମ୍ନମୁଖୀ ମୁଦ୍ରା ଭଣ୍ଡାର ଏବଂ ବର୍ଦ୍ଧିତ ବିଶ୍ୱ ଅନିଶ୍ଚିତତା ବିରୋଧରେ ବଫର୍ ହୋଇ ରହିବ ।
ବିଶେଷଜ୍ଞଙ୍କ ଅନୁସାରେ, ଘରୋଇ ବଜାରକୁ ପୁଞ୍ଜି ପ୍ରବାହ ମଜଭୁତ ରହିଛି ଏବଂ ବଜାରରେ ପତନ ସମୟରେ ଖୁଚୁରା ନିବେଶକ ଲଗାତର ସେୟାର କିଣୁଛନ୍ତି । ବୁଧବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ୫୦.୬୨ ପଏଣ୍ଟ ଅର୍ଥାତ୍ ୦.୦୬% ହ୍ରାସ ସହିତ ୭୮,୧୪୮.୪୯ ପଏଣ୍ଟରେ ବନ୍ଦ ହୋଇଛି । ଅନ୍ୟପକ୍ଷରେ, ନିଫ୍ଟି ୧୮.୯୫ ପଏଣ୍ଟ ଖସି ୨୩,୬୮୮.୯୫ ପଏଣ୍ଟରେ ବନ୍ଦ ହୋଇଛି ।
