ନୂଆଦିଲ୍ଲୀ: ବେସାମରିକ ବିମାନ ଚଳାଚଳ ସଚିବ ସମୀର କୁମାର ସିନହାଙ୍କୁ ପରିବହନ, ପର୍ଯ୍ୟଟନ ଓ ସଂସ୍କୃତି ସମ୍ପର୍କିତ ସଂସଦୀୟ ସ୍ଥାୟୀ ସମିତି ୮ ଜୁଲାଇରେ ଦେଶର ବିମାନ ଉଡାଣ ସୁରକ୍ଷା ସମୀକ୍ଷା ପାଇଁ ତଲବ କରିଛି। ଏହି ବୈଠକରେ ଅହମଦାବାଦରେ ହୋଇଥିବା ଏୟାର ଇଣ୍ଡିଆ ବିମାନ ଦୁର୍ଘଟଣା (୧୨ ଜୁନ ୨୦୨୫) ଏବଂ ସାମଗ୍ରିକ ବିମାନ ଉଡାଣ ସୁରକ୍ଷା ଉପରେ ଆଲୋଚନା ହେବ। ସମିତିର ଅଧ୍ୟକ୍ଷ ରାଜ୍ୟସଭା ସାଂସଦ ସଞ୍ଜୟ ଝା ଏହି ବୈଠକରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଡିଜିସିଏ (DGCA), ଏୟାର ଇଣ୍ଡିଆ ଏବଂ ବୋଇଂର ପ୍ରତିନିଧିଙ୍କ ସହ ଆଲୋଚନା କରିବେ।
ଅହମଦାବାଦରେ ଏୟାର ଇଣ୍ଡିଆର ବୋଇଂ ୭୮୭-୮ ଡ୍ରିମଲାଇନର ଦୁର୍ଘଟଣାରେ ୨୭୦ ଜଣଙ୍କର ମୃତ୍ୟୁ ଘଟିଥିଲା। ଏହି ଘଟଣା ପରେ ବେସାମରିକ ବିମାନ ଚଳାଚଳରେ ସୁରକ୍ଷା ଏବଂ ବିମାନ ରକ୍ଷଣାବେକ୍ଷଣ ଉପରେ ଅଧିକ ଧ୍ୟାନ କେନ୍ଦ୍ରିତ କରାଯାଉଛି। ଏହାସହିତ ସମିତି ବିମାନର ରକ୍ଷଣାବେକ୍ଷଣ ତଥା ପାଇଲଟଙ୍କ ମାନସିକ ସ୍ୱାସ୍ଥ୍ୟ ଏବଂ ତାଲିମ ଉପରେ ମଧ୍ୟ ଆଲୋଚନା କରିବ। ଏହା ସହିତ ଚାରଧାମ ତୀର୍ଥଯାତ୍ରା ମାର୍ଗରେ ସମ୍ପ୍ରତି ଘଟିଥିବା ହେଲିକପ୍ଟର ଦୁର୍ଘଟଣାଗୁଡ଼ିକୁ ମଧ୍ୟ ବିଚାର କରାଯିବ।
ଏହା ପୂର୍ବରୁ ସମିତି ବେସାମରିକ ବିମାନ ଚଳାଚଳ ସୁରକ୍ଷା ବ୍ୟୁରୋ (BCAS) ଏବଂ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ ବ୍ୟୁରୋ (AAIB) ପାଇଁ କମ୍ ବଜେଟ ବଣ୍ଟନକୁ ନେଇ ଚିନ୍ତା ପ୍ରକାଶ କରିଥିଲା। ୨୦୨୫-୨୬ ଆର୍ଥିକ ବର୍ଷ ପାଇଁ DGCAକୁ ୩୦ କୋଟି, AAIBକୁ ୨୦ କୋଟି ଏବଂ BCASକୁ ୧୫ କୋଟି ଟଙ୍କା ବଣ୍ଟନ ହୋଇଛି। ଯାହା ସୁରକ୍ଷା ଭିତ୍ତିଭୂମି ଏବଂ ତଦନ୍ତ କ୍ଷମତା ପାଇଁ ଅପର୍ଯ୍ୟାପ୍ତ ବୋଲି ସମିତି ଉଲ୍ଲେଖ କରିଛି।
ଏହି ବୈଠକରେ ସମିତି ବେସାମରିକ ବିମାନ ଚଳାଚଳ କ୍ଷେତ୍ରରେ ଥିବା ଅନେକ ଅଭାବ, ଯନ୍ତ୍ରାଂଶ ରକ୍ଷଣାବେକ୍ଷଣ ଏବଂ ସୁରକ୍ଷା ନୀତି ଉପରେ ଏକ ବିସ୍ତୃତ ରିପୋର୍ଟ ପ୍ରସ୍ତୁତ କରିବାକୁ ଯୋଜନା କରୁଛି। ଏହା ଦେଶର ବେସାମରିକ ବିମାନ ଚଳାଚଳ ସୁରକ୍ଷାକୁ ଆହୁରି ମଜବୁତ କରିବା ଲାଗି ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।
