ଭୁବନେଶ୍ୱର,୨୬/୦୮ : ଥମିଲା ଅମଲା ଆନ୍ଦୋଳନ । ୧୫ ଦିନ ପରେ ରାଜସ୍ୱ ଅମଲାଙ୍କ ଆନ୍ଦୋଳନ ସ୍ଥଗିତ । ଏନେଇ ଅମଲା ସଂଘ ସଭାପତି ତ୍ରିପତି ବାଳାଜୀ ସାହୁ ସୂଚନା ଦେଇଛନ୍ତି। ସରକାରଙ୍କ ଠାରୁ ପ୍ରତିଶ୍ରୁତି ପରେ ଅମଲାମାନେ ଆନ୍ଦୋଳନକୁ ସ୍ଥଗିତ ରଖିଛନ୍ତି । ବନ୍ୟା ସ୍ଥିତି ଓ ପୂଜା ପାର୍ବଣକୁ ଦୃଷ୍ଟିରେ ରଖି ସଂଘ ଏହି ନିଷ୍ପତ୍ତି ନେଇଛି । ଆଜିଠୁ କାର୍ଯ୍ୟରେ ଯୋଗଦେବେ ରାଜସ୍ୱ ବିଭାଗର ଅମଲ ମାନେ ।
ସୂଚନା ଅନୁଯାୟୀ ଦୀର୍ଘ ୧୪ ଦିନ ହେଲା ରାଜସ୍ୱ ଅମଲା କର୍ମଚାରୀମାନେ ଆନ୍ଦୋଳନ ବସିଥିଲେ । ଫଳରେ ରାଜସ୍ୱ କାର୍ଯ୍ୟାଳୟରେ ଅଚଳାବସ୍ଥା ଜାରି ଥିଲା । ବାରମ୍ବାର ଅନୁରୋଧ ପରେ ନାଲି ଆଖି ଦେଖାଇଥିଲେ ସରକାର । କାମ ଛାଡ଼ି ଆନ୍ଦୋଳନରେ ମାତିଥିବା ରାଜସ୍ୱ ଅମଲା କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଜିଲ୍ଲାପାଳଙ୍କୁ ତାଗିଦ କରାଯାଇଛି । ସେ ସମ୍ପର୍କରେ ତଥ୍ୟ ଦାଖଲ କରିବାକୁ କୁହାଯାଇଛି । ଏନେଇ ସୋମବାର ସମସ୍ତ ଜିଲ୍ଲାପାଳଙ୍କୁ ରାଜସ୍ୱ ବିଭାଗ ପକ୍ଷରୁ ଚିଠି କରାଯାଇଥିଲା। ଜିଦ୍ ଛାଡ଼ି ରାଜସ୍ୱ କର୍ମଚାରୀ ତୁରନ୍ତ କାର୍ଯ୍ୟରେ ଯୋଗଦେବାକୁ କୁହାଯାଇଥିଲା।
ସେହିଭଳି ରାଜସ୍ୱ ଅମଲା କର୍ମଚାରୀ କାମ ଛାଡ଼ି ଆନ୍ଦୋଳନରେ ବସିବାରୁ ସାଧାରଣ ଲୋକେ ହଇରାଣ ହରକତ ହେଉଥିଲେ । ଅଫିସ୍ କାମ ଛାଡ଼ି ଲୋକଙ୍କୁ ସେବା ନ ଯୋଗାଇ ଆନ୍ଦୋଳନ କରୁଥିବା କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ହେବା ଆବଶ୍ୟକ ବୋଲି ଦାବି ହୋଇଆସୁଥିଲା। ତେବେ ରାଜ୍ୟ ସରକାରଙ୍କ ସହ ଅମଲା ସଂଘ ଆଲୋଚନ ପରେ ସମାଧାନର ବାଟ ବାହାରିଛି । ରାଜସ୍ବ କର୍ମଚାରୀଙ୍କ ଦାବି ପୂରଣ କରିବାକୁ ସରକାରଙ୍କ ପ୍ରତିଶ୍ରୁତି ଦେଇଛନ୍ତି । ଫଳରେ ଜିଦ୍ ଛାଡ଼ି ୧୫ ଦିନ ପରେ କାର୍ଯ୍ୟ ଯୋଗ ଦେବାକୁ ନିଷ୍ପତ୍ତି ହୋଇଛି । ଏନେଇ ଅମଲା ସଂଘ ସଭାପତି ତ୍ରିପତି ବାଳାଜୀ ସାହୁ ସୂଚନା ଦେଇଛନ୍ତି।
