ସୋର, ୨୩/୦୬: ବାଲେଶ୍ୱର ଜିଲ୍ଲା ସୋର ଥାନା ଶିଙ୍ଗାଖୁଣ୍ଟା ପଞ୍ଚାୟତ ସିନ୍ଧୁଆ ଗ୍ରାମରେ ବିଷଧର ସାପ କାମୁଡାରେ ଜଣେ ନାବାଳିକାଙ୍କର ମୃତ୍ୟୁ ହୋଇଯାଇଛି । ମୃତ ନାବାଳିକା ହେଉଛନ୍ତି ସିନ୍ଧୁଆ ଗ୍ରାମର ଚନ୍ଦନ ସିଂଙ୍କ ଝିଅ ରାଧା ସିଂ (୧୩ ବର୍ଷ) ।
ସୂଚନା ଅନୁସାରେ, ସିନ୍ଧୁଆ ଗ୍ରାମର ଚନ୍ଦନ ସିଂଙ୍କ ଝିଅ ରାଧା ସିଂ ସ୍ଥାନୀୟ ହାଇସ୍କୁଲରେ ଅଷ୍ଟମ ଶ୍ରେଣୀରେ ପାଠ ପଢ଼ନ୍ତି । ରବିବାର ରାତିରେ ରାଧା ଶୋଇଥିବା ବେଳେ ବିଳମ୍ବିତ ରାତିରେ ଏକ ବିଷଧର ସାପ ତାଙ୍କୁ କାମୁଡ଼ିଥିଲା । ଏ ବାବଦରେ ସେ ତାଙ୍କ ବାପା ଚନ୍ଦନଙ୍କୁ ଜଣାଇଥିଲେ । ଏହା ଶୁଣି ତୁରନ୍ତ ତାଙ୍କୁ ୧୦୮ ଆମ୍ବୁଲାନ୍ସରେ ସୋର ମେଡିକାଲରେ ଭର୍ତ୍ତି କରିଥିଲେ ପରିବାରଲୋକେ । ସେଠାରେ ଚିକିତ୍ସାଧୀନ ଅବସ୍ଥାରେ ରାଧାର ମୃତ୍ୟୁ ହୋଇଥିଲା । ଘଟଣା ସମ୍ପର୍କରେ ଖବର ପାଇ ସୋର ପୁଲିସ ଡାକ୍ତରଖାନାରେ ପହଞ୍ଚି ଏକ ମାମଲା ରୁଜୁ କରି ମୃତଦେହ ଜବତ କରି ବ୍ୟବଚ୍ଛେଦ କରି ପରିବାର ଲୋକଙ୍କୁ ହସ୍ତାନ୍ତର କରିଛି । ଏହା ସହ ଘଟଣାର ତଦନ୍ତ ଆରମ୍ଭ କରିଛି ।
