ନୂଆଦିଲ୍ଲୀ: ତାମିଲନାଡୁର କୋଇମ୍ବାଟୁର ଜିଲ୍ଲାରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଯେଉଁଠାରେ ଜଣେ ଅଷ୍ଟମ ଶ୍ରେଣୀର ଛାତ୍ରୀଙ୍କୁ ତାଙ୍କ ମାସିକ ଋତୁସ୍ରାବ ଚାଲିଥିବା କାରଣରୁ କ୍ଲାସରୁମ ବାହାରେ ପରୀକ୍ଷା ଦେବାକୁ ବାଧ୍ୟ କରାଯାଇଥିବା ଅଭିଯୋଗ ହୋଇଛି। ଏହି ଘଟଣା କୋଇମ୍ବାଟୁର ଜିଲ୍ଲାର କିନାଥୁକଡ଼ଭୁ ତାଲୁକ ଅନ୍ତର୍ଗତ ସେଙ୍ଗୁଟ୍ଟେଇପାଲୟମ ଗାଁରେ ଥିବା ସ୍ୱାମୀ ଚିଦ୍ଭବାନନ୍ଦ ମାଟ୍ରିକ୍ୟୁଲେସନ ହାୟର ସେକେଣ୍ଡାରୀ ସ୍କୁଲରେ ଘଟିଛି।
ଏହି ଛାତ୍ରୀ ଅରୁନ୍ଥାଥିୟାର ସମ୍ପ୍ରଦାୟ (ଅନୁସୂଚିତ ଜାତି)ର ବୋଲି ଜଣାପଡିଛି। ତାଙ୍କର ପ୍ରଥମ ମାସିକ ଋତୁସ୍ରାବ ଏପ୍ରିଲ ୫, ୨୦୨୫ରେ ଆରମ୍ଭ ହୋଇଥିଲା। ଅଭିଯୋଗ ଅନୁସାରେ, ସ୍କୁଲ ପରିଚାଳନା ତାଙ୍କୁ ଏପ୍ରିଲ ୭ରେ ବିଜ୍ଞାନ ପରୀକ୍ଷା ଏବଂ ଏପ୍ରିଲ ୯ରେ ସାମାଜିକ ବିଜ୍ଞାନ ପରୀକ୍ଷା ପାଇଁ କ୍ଲାସରୁମ ବାହାରେ ବସାଇଥିଲା। ଏହି ଘଟଣା ସାମ୍ନାକୁ ଆସିବା ପରେ ଛାତ୍ରୀଙ୍କ ମାଆ ସ୍କୁଲକୁ ଯାଇ ଏକ ଭିଡିଓ ରେକର୍ଡ କରିଥିଲେ। ଯେଉଁଥିରେ ତାଙ୍କ ଝିଅ କ୍ଲାସରୁମ ବାହାରେ ବସି ପରୀକ୍ଷା ଦେଉଥିବା ଦୃଶ୍ୟ ଦେଖାଯାଇଛି। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଲୋକଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ଛାତ୍ରୀଙ୍କ ମାଆ ଅଭିଯୋଗ କରିଛନ୍ତି ଯେ ସ୍କୁଲର ପ୍ରିନ୍ସିପାଲ ତାଙ୍କ ଝିଅକୁ ଏଭଳି ଅସମ୍ମାନଜନକ ବ୍ୟବହାର କରିଛନ୍ତି। ଭିଡିଓରେ ସେ ପ୍ରିନ୍ସିପାଲଙ୍କୁ ପଚାରୁଥିବା ଶୁଣାଯାଇଛି ଯେ, ମାସିକ ଋତୁସ୍ରାବ ସମୟରେ ଏକ ଛୋଟ ଝିଅକୁ ଏଭଳି ବ୍ୟବହାର କରିବା କଣ ନ୍ୟାୟସଙ୍ଗତ? ଅନ୍ୟପକ୍ଷରେ, ସ୍କୁଲ ପରିଚାଳନା ଦାବି କରିଛି ଯେ ଛାତ୍ରୀଙ୍କ ମାଆ ନିଜେ ତାଙ୍କ ଝିଅକୁ ଅଲଗା ଭାବେ ପରୀକ୍ଷା ଦେବାକୁ ଅନୁରୋଧ କରିଥିଲେ, ଯାହାକୁ ପ୍ରିନ୍ସିପାଲ ସମର୍ଥନ କରିଥିଲେ।
ଏହି ଘଟଣା ସାମ୍ନାକୁ ଆସିବା ପରେ ତାମିଲନାଡୁ ଶିକ୍ଷା ବିଭାଗ ଏନେଇ ତଦନ୍ତ ଆରମ୍ଭ କରିଛି। ଶିକ୍ଷା ବିଭାଗର ଜଣେ ଅଧିକାରୀ କହିଛନ୍ତି, “ଯଦି କୌଣସି ଅନ୍ୟାୟ ପ୍ରମାଣିତ ହୁଏ, ତେବେ ସ୍କୁଲ ପରିଚାଳନା ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।” ସ୍ଥାନୀୟ ଗ୍ରାମବାସୀମାନେ ମଧ୍ୟ ଏହି ଘଟଣାରେ କ୍ଷୁବ୍ଧ ହୋଇ ପୋଲ୍ଲାଚିର ସବ୍-କଲେକ୍ଟରଙ୍କୁ ଭେଟି ସ୍କୁଲ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।
ଅନ୍ୟପଟେ ତାମିଲନାଡୁ ସରକାର ଏହି ବିଷୟକୁ ଗମ୍ଭୀରତାର ସହ ଗ୍ରହଣ କରିଛନ୍ତି। ଶିକ୍ଷା ମନ୍ତ୍ରୀ ଅନ୍ବିଲ ମହେଶ ପୋୟୟାମୋଝି ଆଶ୍ୱାସନା ଦେଇଛନ୍ତି ଯେ ବାଳିକାମାନଙ୍କ ବିରୋଧରେ କୌଣସି ପ୍ରକାର ଅତ୍ୟାଚାରକୁ ସହ୍ୟ କରାଯିବ ନାହିଁ। ତେବେ ଏହି ଘଟଣାର ତଦନ୍ତ ଜାରି ରହିଛି ଏବଂ ସ୍କୁଲର ପ୍ରିନ୍ସିପାଲଙ୍କୁ ନିଲମ୍ବନ କରାଯାଇଥିବା ସୂଚନା ମିଳିଛି।
