ବ୍ରହ୍ମପୁର, ୨୪/୦୪ : ୨୪ ନିର୍ବାଚନ ପାଇଁ ହିଞ୍ଜିଳିରୁ ଶଙ୍ଖନାଦ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ନିର୍ବାଚନ ପ୍ରଚାର ପାଇଁ ହିଞ୍ଜିଳିରେ ପହଞ୍ଚିଛନ୍ତି ବିଜେଡି ସୁପ୍ରିମୋ। ତାଙ୍କ ସହ ଉପସ୍ଥିତ ଅଛନ୍ତି ଆମ ଓଡ଼ିଶା ଅଧ୍ୟକ୍ଷ ଭି.କେ ପାଣ୍ଡିଆନ। ଜନସଭାରେ ଉଦବୋଧନ ଦେଇ ନବୀନ ପ୍ରଚାର ଆରମ୍ଭ କରିଛନ୍ତି। ସେ କହିଛନ୍ତି ଯେ, ସାଢେ ୪ କୋଟି ଓଡ଼ିଆ ମୋ ପରିବାର। ମୋ ଜୀବନ ଥିବା ଯାଏଁ ଆପଣମାନଙ୍କ ପାଇଁ ଲଢିବି। ହିଞ୍ଜିଳିରୁ ପ୍ରଚାର କରି ମୁଁ ବହୁତ ଖୁସି। 

ମୁଖ୍ୟମନ୍ତ୍ରୀ ପୁଣି କହିଛନ୍ତି ଯେ, ହିଞ୍ଜିଳିରୁ ବିଜେଡିର ବିଜୟ ଯାତ୍ରା ଆରମ୍ଭ ହେଲା। ଆପଣମାନେ ସବୁବେଳେ ମୋ ସହିତ ଅଛନ୍ତି। ମୋତେ ସେବା କରିବାର ସୁଯୋଗ ଦେଇଛନ୍ତି। ସେଥିପାଇଁ ମୁଁ ସାଢେ ୪ କୋଟି ଓଡ଼ିଆଙ୍କ କଲ୍ୟାଣ ପାଇଁ କାମ କରୁଛି। ହିଞ୍ଜିଳିରୁ ଆମ ହସ୍ପିଟାଲ ଯୋଜନା ଆରମ୍ଭ ହୋଇଥିଲା। ମା ତାରାତାରିଣୀ ମନ୍ଦିରରୁ ମନ୍ଦିର ପୁନରୁଦ୍ଧାର କାମ ଆରମ୍ଭ ହୋଇଥିଲା। ବିଏସକେୱାଇ ଯୋଜନା ଦେଶରେ ପ୍ରଥମ। ମାଗଣାରେ ସମସ୍ତଙ୍କୁ ମେଡିକାଲ ସୁବିଧା ଯୋଗାଇ ଦିଆଯାଉଛି। ହିଞ୍ଜିଳି ଓ ଶେରଗଡ଼ ବିକାଶର ନୂଆ ମଡେଲ ସାଜିଛି। 

ହିଞ୍ଜିଳି ଜନସଭାରେ ବିରୋଧୀଙ୍କୁ ଟାର୍ଗେଟ୍ କରିଛନ୍ତି ନବୀନ। ସେ କହିଛନ୍ତି ଯେ, ବିରୋଧୀ ଅପପ୍ରଚାର କରୁଛନ୍ତି। ବିରୋଧୀ ଦଳ ବିକାଶ କାମରେ ବାଧା ସୃଷ୍ଟି କରୁଛନ୍ତି। ବିକାଶକୁ ବିରୋଧ କରି କେହି କେବେ ସଫଳ ହୋଇନାହାଁନ୍ତି। ଓଡ଼ିଶାବାସୀ ବିରୋଧୀଙ୍କ ଅସଲ ରୂପ ଜାଣିଛନ୍ତି। ଆପଣଙ୍କ ଆଶୀର୍ବାଦରେ ବିଜେଡି ବିପୁଳ ବିଜୟ ହାସଲ କରିବ। ବିଜୟ ଧାରା ଜାରି ରହିବ। ଲୋକସଭାରେ ବି ବହୁ ଭଲ କରିବୁ। ୨୦୩୬ ସୁଦ୍ଧା ଓଡ଼ିଶା ଏକ ନମ୍ବର ହେବ।