ନୂଆଦିଲ୍ଲୀ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସରକାରରେ କ୍ୟାବିନେଟ ମନ୍ତ୍ରୀ ଥିବା ଫୱାଦ ଚୌଧୁରୀ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପ୍ରଶଂସା କରିଛନ୍ତି । ସେ କହିଛନ୍ତି ଯେ ରାହୁଲ ଗାନ୍ଧୀଙ୍କ ପାଖରେ ତାଙ୍କ ଜେଜେବାପା ଜବାହରଲାଲ ନେହେରୁଙ୍କ ଗୁଣ ଦେଖିବାକୁ ମିଳେ । ଉଭୟ ସମାଜବାଦୀ ଚିନ୍ତାଧାରାର ବ୍ୟକ୍ତିତ୍ବ । ସ୍ୱାଧୀନତାର ୭୫ ବର୍ଷ ପରେ ମଧ୍ୟ ପାକିସ୍ତାନ ଏବଂ ଭାରତ ଗୋଟିଏ ସମସ୍ୟା ସହ ସଂଘର୍ଷ କରୁଛନ୍ତି ।

ଫୱାଦ ଚୌଧୁରୀ ସୋସିଆଲ ମିଡିଆ ପ୍ଲାଟଫର୍ମ X ରେ ଲେଖିଛନ୍ତି ଯେ, ରାହୁଲ ଗାନ୍ଧୀ ତାଙ୍କ ଜେଜେବାପା ଜବାହରଲାଲଙ୍କ ପରି ସମାଜବାଦୀ । ବିଭାଜନର ୭୫ ବର୍ଷ ପରେ ମଧ୍ୟ ଭାରତ ଏବଂ ପାକିସ୍ତାନର ସମସ୍ୟା ସମାନ । ରାହୁଲ ସାହେବ ଗତକାଲି ରାତିରେ ତାଙ୍କ ଅଭିଭାଷଣରେ କହିଛନ୍ତି ଯେ ୩୦ ରୁ ୫୦ ପରିବାର ପାଖରେ ଭାରତର ୭୦% ସମ୍ପତ୍ତି ଅଛି। ପାକିସ୍ତାନରେ ମଧ୍ୟ ସମାନ ସମସ୍ୟା ରହିଛି । ପାକ୍ ବିଜନେସ୍ କାଉନସିଲ୍ ନାମକ ଏକ ବ୍ୟବସାୟ କ୍ଲବ୍ ଏବଂ କିଛି ରିଅଲ୍ ଇଷ୍ଟେଟ୍ ବ୍ୟକ୍ତି ବିଶେଷ ପାକ୍ ସମ୍ପତ୍ତିର ୭୫% ମାଲିକ ଅଟନ୍ତି । ସମ୍ପଦର ଉଚିତ ବଣ୍ଟନ ହେଉଛି ପୁଞ୍ଜିବାଦର ସବୁଠାରୁ ବଡ ଆହ୍ବାନ । 

ଫୱାଦ ଚୌଧୁରୀଙ୍କ ଏହି ପୋଷ୍ଟ ପରେ ବିଜେପି ଆକ୍ରମଣ କରିଛି । ବିଜେପି ମୁଖପାତ୍ର ତଥା ରାଜ୍ୟସଭା ସାଂସଦ ସୁଧାଂଶୁ ତ୍ରିବେଦୀ କହିଛନ୍ତି ଯେ, ପାକିସ୍ତାନର ପୂର୍ବତନ ମନ୍ତ୍ରୀ ଫୱାଦ ଚୌଧୁରୀ ଭାରତ ବିରୋଧୀ କଥା କହିଛନ୍ତି । ସେ ସମାନ କଥା କହୁଛନ୍ତି, ଯାହା ବିରୋଧୀ ଦଳ ମଧ୍ୟ କହୁଛନ୍ତି ଯେ ଭାରତରେ ବିଜେପିକୁ ପରାସ୍ତ କରିବାକୁ ପଡିବ। ପ୍ରଧାନମନ୍ତ୍ରୀ ହେବାକୁ ଆଉ ନରେନ୍ଦ୍ର ମୋଦୀଙ୍କୁ ସୁଯୋଗ ଦିଆନଯାଉ । ମୁଁ ପ୍ରତ୍ୟେକ ଭାରତୀୟଙ୍କୁ ଫୱାଦ ଚୌଧୁରୀଙ୍କ ଟ୍ୱିଟକୁ ଦେଖିବା ପାଇଁ କହିବାକୁ ଚାହେଁ । କଂଗ୍ରେସକୁ ପାକିସ୍ତାନରୁ ଭଲ ପାଇବା ମିଳୁଛି ।