ଗୋଲାମୁଣ୍ଡା ୦୮/୦୯: ଗୋଲାମୁଣ୍ଡା ଥାନା ଦଶପୁର ଫାଣ୍ଡି ଅଧିନ ବନ୍ଧାଗାଁର ଜଣେ କଲେଜ ଛାତ୍ରୀଙ୍କ ଆତ୍ମହତ୍ୟା ଘଟଣାରେ ସ୍ଥାନୀୟ ସ୍କୁଲର ଜଣେ ଶିକ୍ଷକ ଗିରଫ ହୋଇଛନ୍ତି । ଗିରଫ ଶିକ୍ଷକ ଜଣକ ହେଲେ ସରକାରୀ ଉଚ୍ଚପ୍ରାଥମିକ ବିଦ୍ୟାଳୟର ଶିକ୍ଷକ ସୁନୀଲ ଚନ୍ଦ୍ର ଭୋଇ । ତାଙ୍କ ଘର କେସିଙ୍ଗା ଥାନା ଅନ୍ତର୍ଗତ ବ୍ରାହ୍ମଣୀ ଗାଁରେ ।
ପୁଲିସ ସୂଚନା ଅନୁଯାୟୀ, ବନ୍ଧାଗାଁର ଜଣେ କଲେଜ ଛାତ୍ରୀଙ୍କ ସହ ସେଠାକାର ସରକାରୀ ଉଚ୍ଚପ୍ରାଥମିକ ବିଦ୍ୟାଳୟର ଶିକ୍ଷକ ସୁନୀଲର ବର୍ଷେ ହେଲା ପ୍ରେମସମ୍ପର୍କ ଗଢି ଉଠିଥିଲା । ଛାତ୍ରୀ ଜଣକଙ୍କୁ ବିଭିନ୍ନ ପ୍ରଲୋଭନ ଓ ବିବାହ ପ୍ରତିଶ୍ରୁତି ଦେଇ ଶିକ୍ଷକ ଜଣକ ଅନେକ ଥର ଯୌନ ଶୋଷଣ କରିଥିଲେ । କୌଣସି କାରଣରୁ ଦୀର୍ଘ ୨ମାସହେବ ଉଭୟ ପ୍ରେମସମ୍ପର୍କରେ ଫାଟ ସୃଷ୍ଟି ହୋଇଥିଲା । ଶିକ୍ଷକ ଜଣକ ଉକ୍ତ ଛାତ୍ରୀ ସହ କଥାବାର୍ତ୍ତା ହେବା ସମ୍ପୂର୍ଣ୍ଣ ରୂପରେ ବନ୍ଦକରି ଦୂରେଇ ଯାଇଥିଲେ । ଏଣୁ ଛାତ୍ରୀ ଜଣକ ଲୋକଲଜ୍ଜା ଭୟ ଓ ଶିକ୍ଷକଙ୍କ ପ୍ରତାରଣା ସହିନପାରି ଗତ ୩୧.୮.୨୫ତାରିଖ ନିଜ ଘରେ ବିଷପିଇ ଆତ୍ମହତ୍ୟା କରିଥିଲେ । ଖବରପାଇ ଦଶପୁର ଫାଣ୍ଡି ଅଧିକାରୀ ସୁଶାନ୍ତ ପଣ୍ଡା ପହଞ୍ଚି ଶବ ଜବତ କରିଥିଲେ । ଶବ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ଶବ ହସ୍ତାନ୍ତର କରିଥିଲେ । ଘଟଣାସ୍ଥଳରୁ ଛାତ୍ରୀଙ୍କ ଏକ ଡାଏରୀ ଓ ବିଭିନ୍ନ ପ୍ରକାର ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଥିଲା । ପୁଲିସ ଏହାର ଖୋଳତାଡ଼ କରିଥିଲା । ଏଥିରେ ସଂପୃକ୍ତ ଶିକ୍ଷକଙ୍କ ସଂପୃକ୍ତି ଜଣାପଡ଼ିଥିଲା । ଏହାକୁ ଆଧାରକରି ପୁଲିସ ଏକ ମାମଲା ରୁଜୁକରି ଶିକ୍ଷକ ସୁନୀଲ ଚନ୍ଦ୍ର ଭୋଇଙ୍କୁ ଗିରଫକରି ଆଜି କୋର୍ଟଚାଲାଣ କରିଛି । ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ।
